(ភ្នំពេញ)៖ តាមរយៈព្រឹត្តិបត្រព័ត៌មានប្រចាំសប្តាហ៍ អគ្គនាយករដ្ឋានពន្ធដារ បានបញ្ជាក់ឱ្យដឹងអំពី អាករលើការស្នាក់នៅ ដោយលើកឡើងថា បន្ទប់ជួល ឬផ្ទះជួល មិនមែនជាកម្មវត្ថុនៃការប្រមូលអាករលើការស្នាក់នៅនោះទេ។

អាករលើការស្នាក់នៅ គឺជាអាករមួយប្រភេទក្រោមច្បាប់ ស្តីពីសារពើពន្ធ មានវិសាលភាពអនុវត្ត ចំពោះការផ្គត់ផ្គង់សេវាស្នាក់នៅ ក្នុងសណ្ឋាគារ ដែលមានលក្ខណៈជាបន្ទប់ គ្រែ និងមានផ្តល់នូវសម្បទា និងសេវាផ្សេងៗទៀតទៅតាមប្រភេទ និងទីកន្លែងផ្តល់សេវាស្នាក់នៅនីមួយៗ មានជាអាទិ៍ សណ្ឋាគារ សណ្ឋាគារអាផាម៉ិន សណ្ឋាគារស្វីត សណ្ឋាគាររីសត ម៉ូតែល ឡូដ បឹងកាឡូ ផ្ទះសំណាក់ ឬផ្ទះភ្ញៀវ កន្លែងបោះជំរំទេសចរណ៍ ឬទីកន្លែងផ្តល់សេវាស្នាក់នៅដទៃទៀត ដែលមានលក្ខណៈប្រហាក់ប្រហែល ទោះបីជាដាក់ឈ្មោះអ្វីក៏ដោយ។

ដើម្បីកាន់តែច្បាស់ សូមគូសបញ្ជាក់ផងដែរថា សម្បទា និងសេវាផ្សេងៗត្រង់ចំណុចនេះ សំដៅដល់ការផ្គត់ផ្គង់សេវាណាមួយក្នុងចំណោម សេវាទាំងឡាយ មានជាអាទិ៍ អាហារ បោសសម្អាត ផ្លាស់ប្តូរសម្ភារប្រើប្រាស់ សេវាទឹកភ្លើង បោកគក់ កន្លែងហាត់ប្រាណ ហែលទឹក ម៉ាស្សា ស្ទីម និងសូណាជាដើម។

ការផ្គត់ផ្គង់សេវាស្នាក់នៅត្រូវបានកំណត់ចំពោះ ការផ្គត់ផ្គង់សេវាស្នាក់នៅដោយបុគ្គលជាប់អាករ ក្នុងព្រះរាជាណាចក្រកម្ពុជា ការប្រើប្រាស់ផ្ទាល់ខ្លួននូវសេវាស្នាក់នៅដោយបុគ្គលជាប់អាករ និងការផ្តល់ជាអំណោយ ឬការផ្គត់ផ្គង់ក្រោមតម្លៃពិតនូវសេវាស្នាក់នៅដោយបុគ្គលជាប់ អាករ។ អាករលើការស្នាក់នៅ មិនអនុវត្តនោះទេ ចំពោះ បន្ទប់ជួល ផ្ទះឬផ្ទះល្វែងជួល តាមរយៈកិច្ចសន្យាជួលរយៈពេលខ្លី ឬរយៈពេលវែង។

អាករលើការស្នាក់នៅ ជាប្រភេទពន្ធប្រចាំខែដែលបុគ្គលជាប់អាករ មានកាតព្វកិច្ចដាក់លិខិតប្រកាសសារពើពន្ធ និងបង់ប្រាក់អាករនៅ រៀងរាល់ខែយ៉ាងយឺតបំផុតត្រឹមថ្ងៃទី២០ (ករណីដាក់លិខិតប្រកាសសារពើពន្ធតាមប្រព័ន្ធអនឡាញ e-Filing ត្រូវបានអនុញ្ញាតរហូតដល់ ថ្ងៃទី២៥) នៃខែបន្ទាប់ដែលសេវាស្នាក់នៅត្រូវបានផ្គត់ផ្គង់។

អាករនេះត្រូវបានកំណត់តាមអត្រា ២% លើមូលដ្ឋានគិតជាអាករដែលជាថ្លៃ ស្នាក់នៅរួមបញ្ចូលទាំងបន្ទុកផ្សេងៗ ព្រមទាំងពន្ធអាករនានា វៀរលែងតែអាករលើតម្លៃបន្ថែម និងអាករលើការស្នាក់នៅខ្លួនឯង៕