(ភ្នំពេញ)៖ លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានថ្លែងឲ្យដឹងថា ក្រសួងពាណិជ្ជកម្មនឹងផ្តោតលើការចរចាបន្តទទួលបានភាពអនុគ្រោះពន្ធពី បណ្តាប្រទេសដែលកម្ពុជានាំចេញ នៅពេលដែលកម្ពុជា ចាកចេញពីប្រទេសអភិវឌ្ឍន៍តិចតួចនៅចុងឆ្នាំ២០២៩។

ការលើកឡើងរបស់លោកស្រី ចម និម្មល ធ្វើឡើងក្នុងឱកាសលោកស្រី អញ្ជើញជាអធិបតីក្នុងពិធីបិទ «មហាសន្និបាតបូកសរុបលទ្ធផលការងារ សភាពាណិជ្ជកម្មកម្ពុជាឆ្នាំ២០២៥ និងលើកទិសដៅការងារ ឆ្នាំ២០២៦» នៅថ្ងៃទី២៨ ខែមករា ឆ្នាំ២០២៦។

លោកស្រី ចម និម្មល បានថ្លែងឲ្យដឹងថា «ខ្ញុំសូមលើកទឹកចិត្តដល់ក្រុមហ៊ុន និងសហគ្រាសធំៗក្នុងស្រុក បន្ដអភិវឌ្ឍន៍ ពង្រឹងសមត្ថភាព និងផលិតភាពរបស់ខ្លួន ដើម្បីអាចទាយយកអត្ថប្រយោជន៍ ជាអតិបរិមាណពីភាពអនុគ្រោះពាណិជ្ជកម្ម និងកិច្ចព្រមព្រៀងពាណិជ្ជកម្មសេរីទាំងក្នុងតំបន់ និងទ្វេភាគី»។

លោកស្រីបានបន្ដថា កម្ពុជាកំពុងត្រៀមខ្លួន ក្នុងការចាកចេញពីប្រទេស ដែលមានការអភិវឌ្ឍន៍តិចតួចទៅជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០២៩ ពិតណាស់កម្ពុជាយើងពិតជាបានពឹងផ្អែកលើ ការអនុគ្រោះពន្ធ ដូច្នេះបន្ទាប់ពីចាកចេញពីប្រទេស ដែលមានការអភិវឌ្ឍន៍តិចតួចក្នុងឆ្នាំ២០២៩ តើកម្ពុជានឹងទទួលបានអត្ថប​្រយោជន៍អ្វីខ្លះ? តើការប្រកួតប្រជែងទាន់សភាពការណ៍ ឬទេ?

លោកស្រីបានបញ្ជាក់ថា ត្បិតតែកម្ពុជានឹងចាកចេញពីប្រទេស មានការអភិវឌ្ឍន៍តិចតួច ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០២៩ក៏ពិតមែន ប៉ុន្ដែយើងអាចចរចារឲ្យបាន ១ឆ្នាំ ឬបាន៣ -៥ឆ្នាំ នៃភាពអនុគ្រោះបន្ដទៀត៕