(ភ្នំពេញ)៖ លោក ឡុង ណារ៉ូ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយករដ្ឋាករទឹកស្វយ័តក្រុងភ្នំពេញ បានបង្ហាញពីសមិទ្ធផលសំខាន់ៗ ដែលរដ្ឋាករទឹកស្វយ័តក្រុងភ្នំពេញ​សម្រេចបានក្នុងឆ្នាំ២០២៥កន្លងទៅនេះ ដែលធ្វើឱ្យរាជធានីភ្នំពេញមិនប្រឈមនឹងការខ្វះខាតទឹកស្អាតប្រើប្រាស់។

ថ្លែងប្រាប់អ្នកសារព័ត៌មានក្នុង​សន្និបាតបូកលទ្ធផលការងារអាជីវកម្មឆ្នាំ២០២៥ និងទិសដៅការងាររបស់រដ្ឋាករទឹកស្វយ័តក្រុងភ្នំពេញឆ្នាំ២០២៦ នៅថ្ងៃទី២០ ខែកុម្ភៈ ឆ្នាំ២០២៦ លោក ឡុង ណារ៉ូ បានឱ្យដឹងថា ក្នុងឆ្នាំ២០២៥កន្លងទៅនេះ រដ្ឋាករទឹកស្វយ័តក្រុងភ្នំពេញ សម្រេចបាននូវសមិទ្ធផលសំខាន់ៗជាច្រើន ក្នុងនោះរួមមាន ការសម្ពោធដាក់ឱ្យប្រើប្រាស់រោងចក្រផលិតទឹកស្អាតតាខ្មៅ ដែលមានសមត្ថភាពផលិតទឹកស្អាតបាន ៣០.០០០ ម៉ែត្រគូបក្នុងមួយថ្ងៃ ដែល​បានជួយបន្ថែមសមត្ថភាពផលិតទឹកស្អាតរបស់រដ្ឋាករទឹកស្វយ័តក្រុងភ្នំពេញឱ្យដល់ជាង១ លានម៉ែត្រគូបក្នុងមួយថ្ងៃ។

លើសពីនេះ រដ្ឋាករទឹកស្វយ័តក្រុងភ្នំពេញ បានពង្រីកបណ្តាញចែកចាយទឹកបានប្រមាណជាង៣០០គីឡូម៉ែត្រ ដែលធ្វើឱ្យបណ្តាញចែកចាយបច្ចុប្បន្ននេះ កើនឡើងដល់ជាង៦ពាន់គីឡូម៉ែត្រ។ ចំណែកចំនួនអតិថិជន កើនឡើងប្រមាណ២ម៉ឺន បន្ថែមពីលើអតិថិជនចាស់ដែលមានជាង៥សែន២ម៉ឺននាក់​ និងពង្រីកផ្ទៃសេវា បានចំនួន៨៨៧ភូមិ នៅក្នុងរាជធានីភ្នំពេញ។ រដ្ឋាករទឹកស្វយ័តក្រុងភ្នំពេញ បានដាក់គោលដៅនឹងពង្រីកការផ្គត់ផ្គង់ទឹកស្អាតដល់ប្រជាជនដែលនៅសល់១១២ភូមិទៀត ​ឱ្យទទួលបានទឹកស្អាតប្រើប្រាស់គ្រប់ភូមិទាំងអស់ នៅក្នុងឆ្នាំ២០២៦ និងដើមឆ្នាំ២០២៧។

ដោយឡែកអត្រាទឹកបាត់បង់ បានថយចុះប្រមាណ១.៧% នៃអត្រាទឹកបាត់បង់សរុបចំនួន​២៧.២៧% ដោយក្នុងឆ្នាំ២០២៥ អត្រាទឹកបាត់បង់បានចុះមក២៥.៥០%។

តាមរយៈសមិទ្ធសំខាន់ៗនេះ បានធ្វើឱ្យឆ្នាំ២០២៥ រដ្ឋាករទឹកស្វយ័តក្រុងភ្នំពេញ រកបានប្រាក់ចំណេញប្រមាណ៩៦ពាន់លានរៀល ឬប្រមាណជាង២៣លានដុល្លារ(មិនទាន់ធ្វើសវកម្ម)។
​
​នៅឆ្នាំ២០២៦នេះ ​ទឹកស្វយ័តក្រុងភ្នំពេញបានដាក់ទិសដៅបង្កើនចំនួនអតិថិជន និងសមត្ថភាពនៃការផលិតទឹកស្អាត ដើម្បីបំពេញតម្រូវការទឹកស្អាតជូនប្រជាពលរដ្ឋ និងបញ្ចប់នូវគម្រោងធំៗ ដូចការដាក់នូវបំពង់បន្ថែម ដើម្បីធានាឱ្យរោងចក្របាក់ខែងជំហានទី៣ដាក់ឱ្យដំណើរការនៅក្នុងឆ្នាំ២០២៧។ បន្ថែមពីនេះ ទឹកស្វយ័តក្រុងភ្នំពេញ នឹងបន្តពង្រីកផ្ទៃសេវា និងចាប់ផ្តើមលក់ទឹកដុំ ជូនដល់ប្រតិបត្តិករនៅតាមទីតាំងជុំវិញរាជធានីភ្នំពេញ ដែលមានការលំបាកក្នុងការផ្គត់ផ្គង់ទឹកស្អាតជូនប្រជាពលរដ្ឋ ព្រមទាំងពិនិត្យលទ្ធភាពផ្គត់ផ្គង់ទឹកទៅតំបន់អាកាសយានដ្ឋានតេជោផងដែរ។

បើតាមអគ្គនាយករដ្ឋាករទឹកស្វយ័តក្រុងភ្នំពេញ បច្ចុប្បន្ននេះ រដ្ឋាករទឹកស្វយ័តក្រុងភ្នំពេញ មានរោងចក្រផលិតទឹកស្អាតចំនួន៧នៅរាជធានីភ្នំពេញ ដែលមានសមត្ថភាពផលិតទឹកស្អាតជាង១លានម៉ែត្រគូបក្នុងមួយថ្ងៃ ខណៈបរិមាណផ្គត់ផ្គង់ទឹកប្រចាំថ្ងៃបានកើនឡើងដល់ជាង៩០ម៉ឺនម៉ែត្រគូប ក្នុងមួយថ្ងៃ។ ជាមួយគ្នានេះ​រដ្ឋាករទឹកស្វយ័តក្រុងភ្នំពេញ ក៏មានរោងចក្រផលិតទឹកស្អាត២ទៀតនៅខេត្តកំពត និងត្បូងឃ្មុំ៕