(ភ្នំពេញ)៖ ថ្លែងទៅកាន់បណ្តាធុរជនជាតិ និងអន្តរជាតិជាច្រើនរូបមកពីបណ្តាប្រទេសក្នុងតំបន់អាស៊ាន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា បានរំលេចពីភាពលេចធ្លោ និងសក្តាសក្តានុពលរបស់កម្ពុជា សម្រាប់ការធ្វើធុរកិច្ច ដែលអ្នកជំនួញមិនគួរមើលរំលង ក្នុងការមកបណ្តាក់ទុនវិនិយោគ។

ក្នុងពិធីបើកកិច្ចប្រជុំកំពូលធុរកិច្ចអាស៊ានកម្ពុជាឆ្នាំ២០២៦ នៅសណ្ឋាគារសូហ្វីតែលភ្នំពេញ នាព្រឹកថ្ងៃទី០៤ ខែមីនា ឆ្នាំ២០២៦នេះ អ្នកឧកញ៉ា គិត ម៉េង បានគូសបញ្ជាក់ថា ប្រទេសកម្ពុជាកំពុងឆ្លងកាត់បរិវត្តកម្មសេដ្ឋកិច្ចដ៏ស៊ីជម្រៅបំផុតមួយ ចាប់តាំងពីទសវត្សរ៍ឆ្នាំ ១៩៩០ តាមរយៈការអនុវត្តដោយជោគជ័យនៃ «គោលនយោបាយឈ្នះ-ឈ្នះ» ដែលបង្កើតឡើងដោយសម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដែលបាននាំមកនូវការបញ្ចប់ជម្លោះជាស្ថាពរ។

អ្នកឧកញ៉ាបានកត់សម្គាល់ថា អស់រយៈពេលជាច្រើនឆ្នាំមកហើយ ពិភពលោកមើលឃើញប្រទេសកម្ពុជា ថាជាប្រទេសមួយដែលកំពុងត្រូវបានស្ដារឡើងវិញជាចម្បង ពីជម្លោះ ឬពឹងផ្អែកលើឧស្សាហកម្មកាត់ដេរ។ បច្ចុប្បន្ននេះ ការលើកឡើងបែបនោះ លែងឆ្លុះបញ្ចាំងពីតថភាពពិតរបស់កម្ពុជាទៀតហើយ។

អ្នកឧកញ៉ា គិត ម៉េង បានលើកឡើងថា ប្រទេសកម្ពុជាបានអនុវត្តគំរូនៃការបើកចំហរជាយុទ្ធសាស្ត្រ ដោយប្រែក្លាយប្រទេសទៅជាមជ្ឈមណ្ឌលឌីជីថល និងឧស្សាហកម្មដែលកំពុងរីកចម្រើននៅក្នុងតំបន់អាស៊ាន ខណៈនៅឆ្នាំ ២០២៦ សេដ្ឋកិច្ចកម្ពុជាត្រូវបានព្យាករថានឹងកើនឡើង ៥ ភាគរយ ដែលឆ្លុះបញ្ចាំងមិនត្រឹមតែការស្ដារឡើងវិញប៉ុណ្ណោះទេ ប៉ុន្តែរួមបញ្ចូលការផ្លាស់ប្តូររចនាសម្ព័ន្ធឆ្ពោះទៅរកតម្លៃខ្ពស់ និងភាពធន់កាន់តែខ្លាំងជាងមុន។

អ្នកឧកញ៉ាបញ្ជាក់បន្ថែមថា «យើងកំពុងផ្លាស់ប្តូរយ៉ាងសកម្មឆ្ពោះទៅរកកម្មន្តសាលកម្រិតខ្ពស់ ជាពិសេសនៅក្នុងវិស័យអេឡិចត្រូនិក និងគ្រឿងបន្លាស់រថយន្ត ដោយមានការគាំទ្រពីថវិកាជាតិចំនួន ១០.១ពាន់លានដុល្លារអាមេរិក ដែលផ្តល់អាទិភាពដល់ការធ្វើទំនើបកម្ម ភាពប្រកួតប្រជែង និងអធិបតេយ្យភាពសេដ្ឋកិច្ច។ ប្រទេសកម្ពុជាកំពុងផ្លាស់ប្តូរយ៉ាងម៉ឺងម៉ាត់ពីសេដ្ឋកិច្ចដែលផ្តោតលើការផ្គុំ ទៅជាសេដ្ឋកិច្ចដែលជំរុញដោយនវានុវត្តន៍។ សសរស្តម្ភសំខាន់នៃការផ្លាស់ប្តូរនេះ គឺរបបនៃការវិនិយោគរបស់យើង។ ច្បាប់ស្តីពីការវិនិយោគឆ្នាំ ២០២១ របស់ប្រទេសកម្ពុជា នៅតែស្ថិតក្នុងចំណោមច្បាប់ដែលបើកចំហរ និងមានការប្រកួតប្រជែងបំផុតនៅក្នុងតំបន់។

តាមច្បាប់វិនិយោគ កម្ពុជាបានអនុញ្ញាតឱ្យជនបរទេសមានភាគហ៊ុន ១០០ ភាគរយនៅក្នុងស្ទើរតែគ្រប់វិស័យទាំងអស់ ដោយមិនចាំបាច់មានតម្រូវការភាគហ៊ុនក្នុងស្រុកជាកាតព្វកិច្ចឡើយ ហើយកម្ពុជាផ្តល់ជូននូវការលើកទឹកចិត្តពន្ធរហូតដល់ប្រាំបួនឆ្នាំ ដោយផ្តល់ឱ្យវិនិយោគិននូវភាពច្បាស់លាស់ ទំនុកចិត្ត និងភាពអាចព្យាករបានរយៈពេលវែង។

អ្នកឧកញ៉ា គិត ម៉េង មានប្រសាសន៍បន្តថា អ្វីដែលមានសារៈសំខាន់ស្មើគ្នាដែរនោះ គឺការលោតផ្លោះទៅមុខផ្នែកឌីជីថលរបស់ប្រទេសកម្ពុជា។ នៅក្នុងការវាយតម្លៃភាពត្រៀមជាស្រេចសម្រាប់ធុរកិច្ច Business Ready ឬ B-READY ឆ្នាំ ២០២៥ របស់ធនាគារពិភពលោក ប្រទេសកម្ពុជាបានជាប់ចំណាត់ថ្នាក់លេខមួយ នៅក្នុងតំបន់អាស៊ានក្នុងវិស័យសេវាកម្មហិរញ្ញវត្ថុ ដោយទទួលបានពិន្ទុ ៨៤.៤៥ លើ ១០០ ដែលជាភស្តុតាងនៃកំណែទម្រង់ប្រកបដោយប្រសិទ្ធភាព និងការទទួលយកបច្ចេកវិទ្យាឌីជីថល។

យ៉ាងណាក៏ដោយ ទ្រព្យសម្បត្តិដ៏មានតម្លៃបំផុតរបស់កម្ពុជា មិនមែនជាគោលនយោបាយ ឬហេដ្ឋារចនាសម្ព័ន្ធតែមួយមុខនោះទេ តែគឺប្រជាជនកម្ពុជា។ ជាមួយប្រជាជនជាង ៦៥ ភាគរយដែលមានអាយុក្រោម ៣៥ ឆ្នាំ ប្រទេសកម្ពុជាផ្តល់ជូននូវកម្លាំងពលកម្មវ័យក្មេង ងាយសម្របខ្លួន និងមានជំនាញកាន់តែខ្លាំងឡើង នៅពេលដែលសេដ្ឋកិច្ចនៅតាមបណ្ដាប្រទេសជាច្រើន កំពុងប្រឈមមុខនឹងការធ្លាក់ចុះនៃប្រជាសាស្ត្រ។

អ្នកឧក គិត ម៉េង បន្ថែមថា ដោយសម្លឹងទៅអនាគត ប្រទេសកម្ពុជាមានទិសដៅយុទ្ធសាស្ត្រច្បាស់លាស់។ យើងមិនត្រឹមតែចូលរួមដល់កំណើនក្នុងតំបន់ប៉ុណ្ណោះទេ ប៉ុន្តែយើងកំពុងចូលរួមចំណែកក្នុងការបង្កើតអាស៊ានដែលមានការតភ្ជាប់ និងមានឯកភាពគ្នាកាន់តែច្រើនជាងមុន។ ការប្តេជ្ញាចិត្តនេះត្រូវបានឆ្លុះបញ្ចាំង នៅក្នុងគម្រោងបរិវត្តកម្មហេដ្ឋារចនាសម្ព័ន្ធ ជាពិសេសគឺព្រែកជីកហ្វូណនតេជោ ដែលមានតម្លៃ ១.៧ ពាន់លានដុល្លារអាមេរិក ដែលនឹងភ្ជាប់ដោយផ្ទាល់នូវបេះដូងនៃសេដ្ឋកិច្ចរបស់កម្ពុជាទៅសមុទ្រ កាត់បន្ថយថ្លៃដើមដឹកជញ្ជូន និងពង្រឹងការតភ្ជាប់ជាតិ និងតំបន់។

អ្នកឧកញ៉ា បន្តថា ដោយផ្អែកលើការអភិវឌ្ឍសមត្ថភាពសេដ្ឋកិច្ច និងធនធានមនុស្សដ៏រឹងមាំរយៈពេលបីទសវត្សរ៍មកនេះ ការផ្តោតរបស់កម្ពុជានាពេលបច្ចុប្បន្ន គឺផ្លាស់ប្តូរទៅរកការកសាងប្រព័ន្ធអេកូឡូស៊ីដែលអាចទ្រទ្រង់ខ្លួនឯងបានរបស់ប្រទេសកម្ពុជានៅទូទាំងវិស័យសំខាន់ៗ។ ដំណាក់កាលបន្ទាប់នៃកំណើននេះ នឹងត្រូវផ្តោតលើផលប្រយោជន៍ជាតិ ដោយធានានូវវដ្តសេដ្ឋកិច្ចដែលមានភាពធន់ និងឯករាជ្យ។ មូលដ្ឋានគ្រឹះបែបនេះ អនុញ្ញាតឱ្យកម្ពុជា ធ្វើសមាហរណកម្មជាយុទ្ធសាស្ត្រជាមួយនឹងចំណុចខ្លាំង នៅក្នុងទេសភាពសកល និងតំបន់ ដោយកម្ពុជាដើរតួនាទីយ៉ាងសំខាន់នៅក្នុងប្លុកអាស៊ាន និង ភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) នៅទសវត្សរ៍ខាងមុខ។

ផ្អែកតាមចក្ខុវិស័យឆ្នាំ២០៥០ ប្រទេសកម្ពុជាប្តេជ្ញាចិត្តយ៉ាងមុតមាំ ចំពោះដំណើររបស់ខ្លួនឆ្ពោះទៅរកឋានៈជាប្រទេស ដែលមានប្រាក់ចំណូលខ្ពស់ ដោយឈរលើមូលដ្ឋាននៃនិរន្តរភាព នវានុវត្តន៍ និងសមាហរណកម្មក្នុងតំបន់។ ប្រធានសភាពាណិជ្ជកម្ពុជា បានលើកទឹកចិត្តដល់ធុរជនទាំង ប្រើប្រាស់រយៈពេលពីរថ្ងៃបន្ទាប់នេះ ដើម្បីចូលរួមប្រកបដោយអត្ថន័យ ដើម្បីពង្រឹងភាពជាដៃគូ និងដើម្បីកំណត់កាលានុវត្តភាពជាក់ស្តែង ដែលនឹងកំណត់នូវកំណើនសេដ្ឋកិច្ចអាស៊ានមួយទសវត្សរ៍ខាងមុខ៕