(ភ្នំពេញ)៖ ឧកញ៉ាបណ្ឌិត ស៊ិន ចន្ធី​ អគ្គ​នាយក​ក្រុមហ៊ុន​ ឡាញហល​ អេចប្រេស​ ខេមបូឌា​ និង​ជា​អ្នក​​ជំនាញក្នុងវិស័យ​ដឹកជញ្ជូន​ និង​ភស្តុភារ​កម្ម​​ បានឱ្យដឹងថា ការដឹកជញ្ជូនពីកម្ពុជាទៅតំបន់មជ្ឈឹមបូព៌ា ឡើងថ្លៃប្រមាណពី៥០% ទៅ១០០% ខណៈទៅប្រទេសដទៃទៀត​ ដូចជាសហរដ្ឋអាមេរិក ចិន និងក្នុងតំបន់ មិនមានសញ្ញាណឡើយថ្លៃនៅទេ។

លោកបានឱ្យដឹងថា បន្ទាប់ពីផ្ទុះសង្គ្រាម​នៅ​មជ្ឈឹមបូព៌ា​​​រវាង​អ៊ីរ៉ង់ ជាមួយ អាមេរិក និង​អ៊ីស្រាអែល ​ក្រុមហ៊ុនកប៉ាល់ខ្លះ បានជូនដំណឹងពីការដំឡើងទៅលើការដឹកជញ្ជូនពីកម្ពុជាទៅតំបន់​មជ្ឈិមបូព៌ា ក្នុងនោះតម្លៃកុងតឺន័រ ២០ហ្វីត គិតតម្លៃបន្ថែមប្រមាណ២ពាន់ដុល្លារ, សម្រាប់ កុងតឺន័រ ៤០ហ្វីត គិតតម្លៃបន្ថែមប្រមាណ ៣ពាន់ដុល្លារ។ ​ដោយឡែកកុងតឺន័រត្រជាក់ គិតតម្លៃបន្ថែមប្រមាណ ៤ពាន់ដុល្លារបន្ថែមទៀត។​

តែយ៉ាងណា លោកថា កម្ពុជាមិនទាន់សូវរងផលប៉ះពាល់ខ្លាំងនោះទេ ដោយសារកម្ពុជា ធ្វើពាណិជ្ជកម្មជាមួយតំបន់នេះនៅតិចតួចនៅឡើយ ខណៈទៅប្រទេសដទៃទៀត​ ដូចជាសហរដ្ឋអាមេរិក ចិន និងក្នុងតំបន់អាស៊ានជាដើម ដែលជាដៃគូពាណិជ្ជកម្មធំរបស់កម្ពុជា មិនមានសញ្ញាណឡើងថ្លៃនៅឡើយទេ៕

សូមស្តាប់ប្រសាសន៍ទាំងស្រុងរបស់ឧកញ៉ាបណ្ឌិត ស៊ិន ចន្ធី៖