(ក្រចេះ)៖ កម្ពុជាទទួលបានរោងចក្រ «ផលិតសំបកកង់រថយន្ដ» ថ្មីមួយទៀត ក្នុងទំហំទុនវិនិយោគ ចំនួន៤៥០លានដុល្លារអាម៉េរិក និងអាចបង្កើតការងារ បានចំនួន ៣,០០០កន្លែង នៅក្នុងខេត្ដក្រចេះ។ នេះបើតាមការចុះផ្សាយពីក្រុមប្រឹក្សាអភិវឌ្ឍន៍កម្ពុជា នៅថ្ងៃទី១៩ ខែមីនា ឆ្នាំ២០២៦។

ក្រុមប្រឹក្សាអភិវឌ្ឍន៍កម្ពុជា បានអបអរសាទរ ដល់ប្រជាពលរដ្ឋស្រុកស្នួល ខេត្តក្រចេះ ដែលទទួលបានគម្រោងវិនិយោគបង្កើតរោងចក្រផលិតសំ​បកកង់រថយន្ត និងពោះវៀនកង់ ស្ថិតក្នុងតំបន់សេដ្ឋកិច្ចពិសេស យូ ប៊ី អ៊ី ស្នួល ក្នុងទំហំទុនវិនិយោគ ៤៥០លានដុល្លារអាម៉េរិក និងអាចបង្កើតការងារបានចំនួន ៣,០០០កន្លែង។

គម្រោងវិនិយោគនេះ គឺជាគម្រោងរោងចក្រផលិតសំបកកង់រថយន្តទី ៣ហើយ ដែលបានមកបោះទីតាំងវិនិយោគ នៅខេត្តក្រចេះ ហើយក៏ជារោងចក្រផលិតសំបកកង់រថយន្តទី៨ ដែលបានមកបោះទីតាំងវិនិយោគក្នុងព្រះរាជាណាចក្រកម្ពុជា។

សូមជម្រាបថា បច្ចុប្បន្នកម្ពុជា មានរោងចក្រផលិតសំបកកង់រថយន្តចំនួន៨ ដែលបានបោះទីតាំងនៅតំបន់សេដ្ឋកិច្ចចំនួន៥ នៃខេត្តស្វាយរៀង ព្រះសីហនុ និងខេត្តក្រចេះ។ រោងចក្រទាំងនោះ បានកំពុងតែស្រូបយកវត្ថុធាតុដើមជាជ័រកៅស៊ូ ក្នុងស្រុកមួយចំនួនធំ ដែលអាចចាត់ទុកថា ជាការនាំចេញនៅនឹងកន្លែង។

របាយការណ៍របស់អគ្គនាយកដ្ឋានកៅស៊ូ នៃក្រសួងកសិកម្ម បានបញ្ជាក់ថា នៅឆ្នាំ២០២៥ ចំណូលលក់ជ័រកៅស៊ូក្នុងស្រុក ចំនួន២២៣ ០៤១ ២៥៩ដុល្លារ។ កម្ពុជាមានផ្ទៃដីកៅស៊ូ សរុបមានចំនួន ៤៤៨ ០៥១ហិកតា ក្នុងនោះផ្ទៃដីចៀរជ័រមានចំនួន ៣៤៦ ៨៤២ហិកតា ស្មើនឹង៧៧% និងផ្ទៃដីថែទាំមានចំនួន ១០១ ២០៨​ហិកតា ស្មើនឹង២៣%។

របាយការណ៍របស់ក្រសួងពាណិជ្ជកម្មបានឱ្យដឹងថា នៅឆ្នាំ២០២៥ កម្ពុជាបានសម្រេចការនាំចេញសំបកកង់រថយន្ដ ក្នុងទំហំទឹកប្រាក់ ១ ៣៨០លានដុល្លារ កើនឡើង៥៧.៨៦% បើធៀបនឹងរយៈពេលដូចគ្នា ឆ្នាំ២០២៤​ មានចំនួន ៨៧៤លានដុល្លារ៕