(ព្រះសីហនុ)៖ លោក ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយកផ្សារមូលបត្រកម្ពុជា (CSX) នៅថ្ងៃទី០៦ ខែមេសា ឆ្នាំ២០២៦នេះ បានលើកឡើងថា ការថមថយសកម្មភាពជួញដូរភាគហ៊ុន នៅក្នុងប្រទេសកម្ពុជា រយៈពេល៣ឆ្នាំចុងក្រោយនេះ ដោយសារកត្តាម៉ាក្រូសេដ្ឋកិច្ច តែលោកសង្ឃឹមថា អ្វីៗនឹងល្អឡើងវិញ នៅពេលខាងមុខ។

ការលើកឡើងបែបនេះ ធ្វើឡើងក្នុងឱកាសដែល លោក ហុង សុហួរ អញ្ជើញចូលរួម ក្នុងវេទិកាក្រុមហ៊ុនចុះបញ្ជី ក្រោមប្រធានបទ «សក្ដានុពលរបស់កំពង់ផែស្វយ័តក្រុងព្រះសីហនុ» នៅថ្ងៃទី០៦ ខែមេសា ឆ្នាំ២០២៦ នៅកំពង់ផែស្វយ័តក្រុងព្រះសីហនុ ខេត្ដព្រះសីហនុ។

លោក ហុង សុហួរ បានបញ្ជាក់យ៉ាងដូច្នេះថា «យើងឃើញថ្លៃភាគហ៊ុនរបស់កំពង់ផែក្រុងព្រះសីហនុ បែរជាធ្លាក់ចុះ ពី២៣,០០០រៀល មកនៅ១៣,០០០រៀល មានន័យថា ការធ្លាក់ចុះនេះ ប្រហែលមិនមែនមកពីស្ថានភាពក្រុមហ៊ុនផ្ទាល់នោះទេ (ស្ថានភាពអាជីវកម្មក្រុមហ៊ុនល្អ) អាចមកពីស្ថានភាពម៉ាក្រូសេដ្ឋកិច្ច»។

លោក ហុង សុហួរ ​បានលើកឡើងថា ការធ្លាក់ចុះផ្សារហ៊ុននេះ ដោយសារស្ថានភាពសេដ្ឋកិច្ច, ស្ថានភាពនយោបាយ, ស្ថានភាពក្នុងតំបន់ ក៏ដូចជាស្ថានភាពផ្សារមូលបត្រកម្ពុជា អត់ទាន់មានលទ្ធភាពអភិវឌ្ឍន៍ទីផ្សារឲ្យធំ ដូចទៅនឹងប្រទេសជិតខាងនៅឡើយ។

បន្ថែមពីនោះទៀត លោក ហុង សុហួរ ​បានគូសបញ្ជាក់ថា កត្ដាថមថយសកម្មភាពជួញដូរភាគហ៊ុននៅកម្ពុជា បានធ្វើឲ្យថ្លៃភាគហ៊ុន របស់កំពង់ផែស្វយ័តក្រុងព្រះសីហនុ ក៏អត់សូវមានការកើនឡើងផងដែរ បើទោះបីជាស្ថានភាពអាជីវកម្ម របស់សហគ្រាសផ្ទាល់ល្អប្រសើរក៏ដោយ។

អគ្គនាយកផ្សារមូលបត្រកម្ពុជារំពឹងថា ស្ថានភាពគ្រប់យ៉ាង នឹងមានការធូរស្រាល និងមានការប្រសើរឡើង ហើយរំពឹងថា ការចូលរួមរបស់វិនិយោគិននៅក្នុងទីផ្សារភាគហ៊ុន នឹងមានការចូលរួមកាន់តែច្រើន ដែលធ្វើឲ្យទំហំជួញដូរភាគហ៊ុន នឹងមានភាពកាន់តែល្អប្រសើរ៕