(ភ្នំពេញ)៖ វេទិកាពាណិជ្ជកម្មពហុភាគី ឆ្នាំ២០២៦ ក្រោមមូលបទ៖ «ការរៀបចំយុទ្ធសាស្រ្តឡើងវិញរបស់រដ្ឋតូច ក្នុងបរិបទការប្រែប្រួលនៃប្រព័ន្ធពាណិជ្ជកម្មសកល» ត្រូវបានរៀបចំឡើងជាលើកដំបូងនៅកម្ពុជា នៅថ្ងៃទី៩ ខែមេសា ឆ្នាំ២០២៦ ដោយបានប្រមូលផ្តុំនូវអ្នកជំនាញសេដ្ឋកិច្ច ទាំងជាតិ និងអន្តរជាតិជាច្រើនរូប។

វេទិកាកម្រិតខ្ពស់នេះត្រូវបានរៀបចំឡើងជាការឆ្លើយតបទៅនឹងភាពចាំបាច់សម្រាប់ប្រទេសកម្ពុជា ក្នុងការកែតម្រូវគោលនយោបាយពាណិជ្ជកម្មរបស់ខ្លួន ក្នុងកំឡុងពេលដែលកម្ពុជាកំពុងត្រៀមខ្លួនក្នុងការចាកចេញពីក្រុមប្រទេសអភិវឌ្ឍន៍តិចតួច (LDC) នៅក្នុងបរិបទសកលដែលមានភាពប្រែប្រួលខ្លាំង។

វេទិកានេះ ត្រូវបានបើកដោយលោកសាស្រ្តាចារ្យបណ្ឌិតសភាចារ្យ សុក ស៊ីផាន់ណា ទេសរដ្ឋមន្រ្តីទទួលបន្ទុកបេសកកម្មពិសេស (វិស័យពាណិជ្ជកម្ម និងសេដ្ឋកិច្ចអន្តរជាតិ) និងជាប្រធានគណៈកម្មាធិការផ្តល់យោបល់លើគោលនយោបាយពាណិជ្ជកម្ម (គ.ផ.គ.ព.)។

កម្មវិធីវេទិកាពហុពាណិជ្ជកម្មឆ្នាំ២០២៦ មានកិច្ចពិភាក្សាសំខាន់ៗចំនូន២ទៀត ដែលមានការអញ្ជើញចូលរួមពីវាគ្មិនកិត្តិយសរួមមាន ឧបនាយករដ្ឋមន្រ្តី សុខ ចិន្តាសោភា; លោកស្រី Tania Meyer នាយិកានៃធនាគារពិភពលោកប្រចាំប្រទេសកម្ពុជា; លោកស្រី Yasmin Siddiqi នាយិកានៃធនាគារអភិវឌ្ឍន៍អាស៊ី (ADB) ប្រចាំប្រទេសកម្ពុជា; លោក សុខ ណារិន តំណាងអង្គការ UNIDO ប្រចាំប្រទេសកម្ពុជា និងអ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល នៃក្រុមហ៊ុន WorldBridge Group រួមនឹងវាគ្មិនសំខាន់ៗ ជាច្រើនរូបទៀត៕