​(ភ្នំពេញ)៖ សេដ្ឋវិទូរបស់ធនាគារអភិវឌ្ឍន៍អាស៊ី (ADB) លោក Milan Thomas បានលើកឡើងពីបញ្ហាប្រឈមធំៗចំនួន៣ ដែលបានប៉ះពាល់ដល់ទស្សនៈវិស័យកំណើនសេដ្ឋកិច្ចកម្ពុជា នៅឆ្នាំ២០២៦ ខណៈ ADB បានព្យាករណ៍ថា កំណើនសេដ្ឋកិច្ចកម្ពុជា នឹងកើនឡើងក្នុងរង្វង់​៤.៥%។

ថ្លែងក្នុងសន្និសិទសារព័ត៌មាន ដែលបានរៀបចំឡើងនៅថ្ងៃទី១០ ខែមេសា ឆ្នាំ២០២៦នេះ នៅទីស្នាក់ការ ធនាគារអភិវឌ្ឍន៍អាស៊ី (ADB) លោក Milan Thomas ឱ្យដឹងថា បញ្ហាប្រឈមទាំង៣នោះ រួមមាន ការបិទព្រំដែន, គោលនយោបាយពន្ធរបស់សហរដ្ឋអាមេរិក និងការកើនឡើងនៃតម្លៃប្រេង ដោយសារតែសង្រ្គាមនៅតំបន់មជ្ឈឹមបូព៌ា។

លោកបានពន្យល់ថា ​ក្នុងឆ្នាំ២០២៦នេះ ដោយសារការបិទព្រំដែនបានធ្វើឱ្យ GDP នឹងធ្លាក់១.៤% ដោយសារការបាត់បង់ការផ្ទេរប្រាក់ចូលក្នុងប្រទេស ខណៈ​ពាណិជ្ជកម្មទ្វេភាគីបានធ្លាក់ចុះពី ៣៥%មក ២៨%។​ ផលប៉ះពាល់នេះ ​ នឹងបន្តជះដល់ឆ្នាំ២០២៧ ទៅឆ្នាំ២០២៩។

បញ្ហាប្រឈមទី២ គឺគោលនយោបាយពាណិជ្ជកម្មរបស់អាមេរិក។ លោកកត់សម្គាល់ថា ពន្ធបដិកាដែលអាមេរិកដាក់លើកម្ពុជា មានការប្រែប្រួល​លឿន។ កាលពីខែមេសា ឆ្នាំ២០២៥ ប្រធានាធិបតីអាមេរិក​ លោក ដូណាល់ ត្រាំ បានប្រកាសដំឡើងពន្ធលើទំនិញនាំចូលពីប្រទេសកម្ពុជាដល់ទៅ ៤៩​​% ក្រោយមកធ្លាក់ដល់៣៦% ហើយបន្ទាប់ពីការចរចាធ្លាក់មក១៩% ហើយចុងក្រោយនេះ ក្រោយការសម្រេចរបស់តុលាការអាមេរិក អត្រាពន្ធថ្មីត្រូវបានកំណត់ត្រឹម១៥% ស្មើនឹងបណ្តាប្រទេស ដែលនាំចេញទំនិញដូចគ្នានឹងកម្ពុជា ដូចវៀតណាម ចិន បង់ក្លាដេស ជាដើម។

លោក Milan Thomas លើកឡើងថា ដោយសារកម្ពុជា​នាំចេញ​ ទៅអាមេរិក ប្រមាណ ៤០%នៃការនាំចេញសរុប។ ដូច្នេះហើយប្រែប្រួលនៃការកំណត់ពន្ធនេះ នឹងជះឥទ្ធពលដល់ GDP របស់កម្ពុជា។ ប្រសិនបើ​ បើពន្ធដែលដាក់លើកម្ពុជាខ្ពស់ជាងគេ ១០% នោះ GDP នឹងធ្លាក់ចុះ ០.៨% ប៉ុន្តែបើពន្ធទាបជាងគេ១០% នោះ នឹងកើនឡើង១.៨%វិញ។

បញ្ហាប្រឈមទី៣ គឺការ​កើនឡើងនៃតម្លៃឧស្ម័ននឹងប្រេងឥន្ធនៈ ដោយសារសង្រ្គាមនៅមជ្ឈឹមបូព៌ា។ លោក Milan Thomas បានលើកឡើងថា ក្រោយផ្ទុះសង្រ្គាមនៅតំបន់មជ្ឈឹមបូព៌ា ហើយឈានទៅបិទច្រកសមុទ្រអូមូស បានធ្វើឱ្យតម្លៃឧស្ម័នកើនឡើង ៤០% LPG កើនឡើង៩៥% និងម៉ាស៊ូតកើនឡើង ១១០% ស្របពេលដែលប្រើប្រាស់ប្រេងប្រើសម្រាប់ការដឹកជញ្ជូនតាមផ្លូវគោក មានរហូតដល់៧០%។

លោកពន្យល់ថា ក្នុងរយៈពេលមួយឆ្នាំ ប្រសិនបើតម្លៃប្រេងកើនឡើង១០% នឹងធ្វើឲ្យកំណើនសេដ្ឋកិច្ចថយចុះ ០.៤%។ ជាមួយគ្នានេះ ៩៨%នៃជី ​ដែលនាំចូលមក ក៏អាចមានតម្លៃកើនឡើងផងដែរ។

លោកបន្ថែមថា កម្ពុជាហាក់ងាយរងផលប៉ះពាល់ខ្លាំងពីបញ្ហានេះ ព្រោះកម្ពុជាពឹងផ្អែកខ្លាំងលើការនាំចូល និងនាំចេញ​ តែយ៉ាងលោកនៅតែមានសុទិដ្ឋិនិយមថា កម្ពុជានឹងសម្រេចបាននូវកំណើនដែលបានព្យាករណ៍។

សូមជម្រាបថា យោងតាមបាយការណ៍សេដ្ឋកិច្ចពិសេសរបស់ធនាគារអភិវឌ្ឍន៍អាស៊ី (ADB) ដែលបានចេញផ្សាយនៅថ្ងៃទី១០ ខែមេសានេះ​ សេដ្ឋកិច្ចកម្ពុជាត្រូវបានព្យាករថានឹងកើនឡើង ៤.៥% ក្នុងឆ្នាំ២០២៦ ប្រសិនបើការរំខានដល់ទីផ្សារទំនិញសកល បង្កឡើងដោយជម្លោះនៅមជ្ឈិមបូព៌ា មិនត្រូវបានអូសបន្លាយយូរ។ ADB បានព្យាករថា វិស័យកម្មន្តសាល នឹងនៅតែជាក្បាលម៉ាស៊ីនកំណើនសំខាន់របស់សេដ្ឋកិច្ច សម្រាប់ឆ្នាំ២០២៦ ខណៈដែលទិន្នផលឧស្សាហកម្មត្រូវបានរំពឹងថានឹងកើនឡើង ៧.៣% ដោយសារការបញ្ជាទិញសម្លៀកបំពាក់ច្រើនគួរសម និង កំណើននៃការរួមចំណែកពីវិស័យកម្មន្តសាលក្រៅពីវាយនភ័ណ្ឌ ដែលរួមមានគ្រឿងបង្គុំអគ្គិសនី សំបកកង់ និង គ្រឿងសង្ហារឹម។ កំណើនមធ្យមនៃវិស័យកសិកម្មត្រូវបានរំពឹងថានឹងបន្តទទួលបាន០.៩% ដែលគាំទ្រដោយតម្រូវការនាំចេញអង្ករ និងគ្រាប់ស្វាយចន្ទី។ គំនិតផ្តួចផ្តើមរបស់រាជរដ្ឋាភិបាល ដែលលើកកម្ពស់ផលិតកម្មប្រកបដោយនិរន្តរភាព និង ធ្វើសមាហរណកម្មពលករចំណាកស្រុក ដែលវិលត្រឡប់មកក្នុងវិស័យនេះវិញ នឹងជួយពង្រឹងកំណើនក្នុងវិស័យនេះថែមទៀត៕