(ភ្នំពេញ)៖ របាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានឱ្យដឹងថា នៅត្រីមាសទី១ ឆ្នាំ២០២៦នេះ ទំហំពាណិជ្ជកម្មកម្ពុជា និងអន្តរជាតិសម្រេចបានទឹកប្រាក់ជិត ១៧ពាន់លានដុល្លារ កើនឡើង១៧.២% បើធៀបនឹងរយៈពេលដូចគ្នាឆ្នាំ២០២៥ មានជាង ១៤ពាន់លានដុល្លារប៉ុណ្ណោះ។

របាយការណ៍បន្ថែមថា រយៈពេល៣ខែដំបូងឆ្នាំនេះ កម្ពុជាបាននាំចេញមានទឹកប្រាក់ ៨ ០៩៥ ៥៣៥ ០០០ដុល្លារ កើន ១៧.៧% បើធៀបនឹងរយៈពេលដូចគ្នាឆ្នាំ២០២៥ មានចំនួន ៦ ៨៧៥ ៦៦៥ ០០០ ដុល្លារ។ ចំណែកការនាំចូលវិញមានទឹកប្រាក់ ៨ ៨៣៦ ៥៣៦ ០០០ដុល្លារ កើន១៦.៧% បៀបនឹងឆ្នាំ២០២៥ ចំនួន ៧ ៥៧៣ ៤៩៨ ០០០ដុល្លារ។

ដៃគូពាណិជ្ជកម្មធំៗរបស់កម្ពុជា រួមមានប្រទេសចិនមានទឹកប្រាក់ជាង ៥.១៥ពាន់លានដុល្លារ, សហរដ្ឋអាមេរិកជាង ៣.៤៨ពាន់លានដុល្លារ, ប្រទេសវៀតណាមជាង ២.២៦ពាន់លានដុល្លារ, ប្រទេសជប៉ុនជាង ៧៥០លានដុល្លារ និងប្រទេសថៃជាង ៧៩៦លានដុល្លារ៕