សេដ្ឋវិទូ ADB បារម្ភថា វិបត្តិកំណើនតម្លៃប្រេងឥន្ធនៈនឹងធ្វើឱ្យភាពក្រីក្រនៅកម្ពុជាកើនឡើង ១%
11-04-2026 10:05
(ភ្នំពេញ)៖ សេដ្ឋវិទូរបស់ធនាគារអភិវឌ្ឍន៍អាស៊ី (ADB) បានបង្ហាញការព្រួយបារម្ភ ចំពោះវិបត្តិកំណើនប្រេងឥន្ធនៈនាពេលបច្ចុប្បន្ននេះ អាចនឹងធ្វើឱ្យភាពក្រីក្រនៅកម្ពុជា កើនឡើង១%បន្ថែមទៀត បើក្នុងករណីស្ថានភាពមិនធូរស្រាល។
ថ្លែងក្នុងសន្និសិទសារព័ត៌មាន ដែលបានរៀបចំឡើងនៅថ្ងៃទី១០ ខែមេសា ឆ្នាំ២០២៦ នៅទីស្នាក់ការធនាគារអភិវឌ្ឍន៍អាស៊ី(ADB) លោក Milan Thomas សេដ្ឋវិទូរបស់ធនាគារអភិវឌ្ឍន៍អាស៊ី បានលើកឡើងថា គ្រួសារដែលរងផលប៉ះពាល់ខ្លាំង គឺគ្រួសារដែលរស់នៅក្បែរនឹងបន្ទាត់ក្រីក្រ ដូចជា គ្រួសារនៅតំបន់ជនបទ គ្រួសារកម្មកររោងចក្រកាត់ដេរ និងសហគ្រាសខ្នាតតូច ដោយសារកើនឡើងនៃថ្លៃទំនិញ ដែលបង្កឡើងពីការឡើងថ្លៃប្រេងឥន្ទនៈ។
លោកបានលើកឡើងថា ការកិច្ចគាំពារសង្គមមានសារៈសំខាន់ណាស់ ដើម្បីគាំទ្រទៅដល់ពួកគេ។
ជាមួយគ្នានេះ លោក ឌួង ពូឡង់ សេដ្ឋវិទូរបស់ធនាគារអភិវឌ្ឍន៍អាស៊ី បានលើកឡើង ឆ្លងកាត់បទពិសោធន៍នៃវិបត្តិកូវីដ រដ្ឋាភិបាលបានដាក់ចេញនូវវិធានការជាច្រើន ដើម្បីជួយទៅដល់ប្រជាជនក្រីក្រ ហើយវិបត្តិលើកនេះ រដ្ឋាភិបាលកម្ពុជា នឹងបន្តដាក់ចេញនូវវិធានការបន្ថែមទៀត ដើម្បីជនងាយរងគ្រោះ និងបន្ថយហានិភ័នៃការធ្លាក់ចូលក្រោយបន្ទាត់ក្រីក្រ។
លោកបញ្ជាក់ថា ជុំវិញបញ្ហានេះដែរ ADB នឹងរួមចំណែកក្នុងការជួយទៅដល់រដ្ឋាភិបាល ដែលការជួយនេះ អាចនឹងធ្វើឡើង តាមរយៈគម្រោងកម្ចីថវិកា សម្រាប់ស្ថានភាពមានអាសន្ន ឬតាមរយៈការបង្កើនទំហំកម្ចីដែលមានសម្បទាន តាមកម្មវិធីដែលមានស្រាប់ ប៉ុន្តែក៏ទាមទារឱ្យមានកំណែទម្រង់ផងដែរ៕
