(ភ្នំពេញ)៖ អ្នកជំនាញ និងអ្នកជំនួញក្នុងវិស័យទេសចរណ៍ បានលើកឡើងថា អ្នកអភិវឌ្ឍន៍រីស៊តនៅតំបន់ដែលមានភាពទាក់ទាញ និងមានលក្ខណៈល្អ ប្លែកពីគេ គួរតែកុំដាក់តម្លៃខ្ពស់ពេក ដែលធ្វើឱ្យអ្នកទេសចរក្នុងស្រុក មិនអាចលទ្ធភាពទៅកម្សាន្តបាន ដែលកត្តានេះ ជាការធ្វើឱ្យអាជីវកម្មរបស់ខ្លួនគ្មាននិរន្តរភាព។

ឧកញ៉ា ស្រ៊ៀត មុំសុភា អនុប្រធានសមាគមទេសចរណ៍កម្ពុជា បានកត់សម្គាល់ថា បច្ចុប្បន្ននេះ រីស៊ត មានការអភិវឌ្ឍន៍ច្រើននៅតាមតំបន់កោះ និងតំបន់ភ្នំ បែបជាអេកូទេសចរណ៍ ប៉ុន្តែរីស៊ត ដែលបានកែច្នៃមានលក្ខណៈប្លែក ដែលគួរឱ្យចង់ទៅកម្សាន្តទាំងនោះ ហាក់មានតម្លៃថ្លៃពេក ដែលធ្វើឱ្យទេសចរក្នុងស្រុក សឹងតែមិនអាចមានលទ្ធភាពអាចទៅកម្សាន្ត ឬស្នាក់នៅបាន។

លើសពីនេះ បើទោះបីជាអ្នកមានលទ្ធភាពទៅលេងកម្សាន្តក៏ដោយ ប៉ុន្តែពួកគេអាចនឹងទៅលេងតែម្តងហើយ លែងទៅលេងម្តងទៀត ហើយក៏ពិបាកណែនាំ មិត្តភក្តិ ឬប្រាប់អ្នកដទៃ និងភ្ញៀវបរទេសឱ្យទៅលេងកម្សាន្តនោះទីនោះ។ ការមិនណែនាំនេះ គឺមានទាំងកត្តាខាងក្រៅ និងខាងក្នុង ពោលគឺកត្តាខាងក្រៅ គឺស្ថានភាពផ្លូវពិបាក និងកត្តាខាងក្នុង គឺបញ្ហាតម្លៃខ្ពស់ពេក រួមនឹងការបដិសណ្ឋាកិច្ច។

មួយវិញទៀត លោកស្រីកត់សម្គាល់ឃើញ រីស៊តខ្លះ បានអភិវឌ្ឍឡើងស្រដៀងនឹងនៅប្រទេសផ្សេង ប៉ុន្តែតម្លៃខ្ពស់ជាងគេ ៣ដង។ នេះក៏ជាកត្តាដែលធ្វើភ្ញៀវរារែក ក្នុងការទៅកម្សាន្តផងដែរ។

ក្នុងនាមជាអ្នកជំនួញក្នុងវិស័យនេះ លោកស្រីលើកឡើងថា នេះគឺជាអ្វីដែលអ្នកអភិវឌ្ឍន៍ ត្រូវគិតគូរ ព្រោះបើទោះបីរីស៊ត នោះស្អាត ល្អ ប្លែកពីគេ មានតែមួយក៏ពិតមែន ប៉ុន្តែតម្លៃខ្ពស់ពេក គ្មានភ្ញៀវដែលអាចទៅទទួលសេវាកម្មនោះបាន ក៏ធ្វើឱ្យអាជីវកម្មនោះគ្មាននិរន្តរភាពផងដែរ។

លោកស្រីទទួលស្គាល់ថា ការណ៍ដែលអ្នកអភិវឌ្ឍន៍ភាគច្រើន ដំឡើងខ្ពស់បែបនេះ ដោយសារ រ៊ីសត មានលក្ខណៈខុសពីគេ ខណៈប្រាក់កម្ចីដែលយកមកអភិវឌ្ឍន៍មានអត្រាប្រាក់ខ្ពស់ តម្លៃពលកម្មខ្ពស់ ស្របពេលបរិមាណភ្ញៀវចូលតិច ដែលទាមទារឱ្យពួកគេត្រូវតែដាក់តម្លៃខ្ពស់ ដើម្បីអាចចំណេញបាន។ តែយ៉ាងណា លោកស្រី មើលឃើញថា ការដំឡើងថ្លៃខ្ពស់បែបនេះ មិនត្រឹមតែមិនទទួលបានផលចំណេញនោះទេ តែជាការឈានទៅសម្លាប់អាជីវកម្មរបស់ខ្លួនទៅវិញទេ៕

សូមស្តាប់ការលើកឡើងបន្ថែមរបស់ ឧកញ៉ា ស្រ៊ៀត មុំសុភា៖