(ភ្នំពេញ)៖ អ្នកជំនួញក្នុងវិស័យស្រូវអង្ករ និងអាហារ ឧកញ៉ា សុង សារ៉ន ជំរុញឱ្យ SMEs ព្យាយាមអភិវឌ្ឍន៍ខ្លួនឯងឱ្យកាន់តែខ្លាំង តាមរយៈការចាប់យកបច្ចេកវិទ្យា និង AI ជួយដល់ការផលិតរបស់ខ្លួន ស្របពេលឱកាសហុចឱ្យ។

មានបទពិសោធន៍រកស៊ី ក្នុងវិស័យកែច្នៃអង្ករ និងចំណីអាហារជាច្រើនឆ្នាំ ឧកញ៉ា សុង សារ៉ន អគ្គនាយកក្រុមហ៊ុនអេមរុរាយស៍កម្ពុជា (Amru Rice) បានលើកឡើងថា សហគ្រាសតូចៗដែលផលិតដោយដៃ ត្រូវតែដំឡើងមកបច្ចេកវិទ្យាពាក់កណ្តាលស្វ័យប្រវត្តិ និងឈានទៅដល់ការដំឡើង ទៅជាស្វ័យប្រវត្តិ ១០០% ។

ទន្ទឹមគ្នានេះ ពួកគេត្រូវតែងាកទៅរក AI ជំនួយដល់ការផលិត ព្រោះការផលិត ត្រូវមានតែជាក់លាក់ និងមានស្តង់ដារត្រឹមត្រូវ បើមិនដូច្នេះទេ អ្នកបញ្ជាទិញនឹងគ្មានទំនុកចិត្តទៅលើផលិតផលយើងនោះឡើយ ដូច្នេះ AI និងប្រព័ន្ធស្វ័យប្រវត្តិ គឺជាឧបករណ៍មួយ ដែលធ្វើឱ្យអ្នកទិញមានការជឿជាក់ ទៅលើប្រភេទទំនិញដែលបានទាំងនោះ។

លោកបានពន្យល់ទៀតថា «យើងត្រូវតែរៀបចំខ្លួនឯង និងកសាងមូលដ្ឋានគ្រឹះ។ នៅពេលកសាងមូលដ្ឋានឱ្យបានរឹងមាំហើយ យើងដល់ចំណុចមួយ ត្រូវធ្វើសមាហរណកម្មបញ្ចូលគ្នាជាមួយបច្ចេកវិទ្យា យើងផ្តុំចូលគ្នាហើយ បានយើងចាប់ផ្តើមផលិតឱ្យបានច្រើន ព្រោះឥឡូវតម្រូវការច្រើនមែនទែន ប៉ុន្តែយើងធ្វើអត់ទាន់ទេ ដែលត្រូវផលិតនៅវៀតណាម ឬពីប្រទេសផ្សេងមកវិញ»។

លោកបន្ថែមថា នេះគឺជាចំណុចមួយដែល SMEs ត្រូវតែគិតគូរ។ បើទោះបីជាបច្ចុប្បន្ន SMEs មានការកើនឡើងក៏ដោយ ប៉ុន្តែប្រសិនបើមិនព្រមអភិវឌ្ឍន៍ ឬកែសម្រួលខ្លួនទេនោះ នឹងមានបញ្ហាក្នុងការប្រកួតប្រជែងនាពេលខាងមុខ។

ជាមួយគ្នានេះ ត្រូវរៀបចំអាជីវកម្មឱ្យមានស្តង់ដារ និងមានបញ្ជីស្នាម ព្រោះសហគ្រាសខ្លះបើទោះបីជាមានឱកាសចង់ពង្រីក ប៉ុន្តែខ្វះខាតទុន ហើយពិបាកក្នុងការទទូលបានកម្ចី ដោយសារមិនទាន់ចេះរៀបចំបញ្ជីស្នាមឱ្យបានត្រឹមត្រូវ៕

សូមស្តាប់ប្រសាសន៍បន្ថែមរបស់ ឧកញ៉ា សុង សារ៉ន៖