(ភ្នំពេញ)៖ ​លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា «គ.ក.ប.»​ បានជំរុញភាគីពាក់ព័ន្ធ ​ពង្រឹងការអនុវត្តច្បាប់ពាក់ព័ន្ធនឹងវិស័យកម្មសិទ្ធិបញ្ញា ឱ្យកាន់តែមានប្រសិទ្ធភាព ដើម្បីចូលរួមប្រយុទ្ធប្រឆាំងនឹងផលិតផលក្លែងបន្លំកម្មសិទ្ធិបញ្ញា និងទប់ស្កាត់សកម្មភាពបំពានកម្មសិទ្ធិបញ្ញា នៅតាមប្រព័ន្ធអ៊ីនធឺណេត ដែលជាឧបសគ្គរារាំងដល់ការលើកទឹកចិត្តឱ្យមានការបង្កើតថ្មី ឬការវិនិយោគលើការផ្សព្វផ្សាយពីកីឡា។​

ថ្លែងក្នុងទិវាកម្មសិទ្ធិបញ្ញាពិភពលោក ឆ្នាំ២០២៦ ក្រោមប្រធានបទ «កម្មសិទ្ធិបញ្ញា និងកីឡា​ ៖ ការត្រៀមរួចរាល់ ការកំណត់ និងច្នៃប្រឌិត» ​នាថ្ងៃទី២៨ ខែមេសា ឆ្នាំ២០២៦នេះ លោកស្រី ចម និម្មល មានប្រសាសន៍ទៀតថា ​ក្នុងការ​ទប់ស្កាត់ការលួចចម្លងជំរុញ និងជំរុញការធ្វើពាណិជ្ជូបនីយកកម្មសិទ្ធិបញ្ញាលើវិស័យកីឡា ទាមទារឱ្យមានការពង្រឹងការអនុវត្តច្បាប់កម្មសិទ្ធិបញ្ញា និងការលើកកម្ពស់ការយល់ដឹង អំពីកម្មសិទ្ធិបញ្ញា ជាពិសេស សិទ្ធិអ្នកនិពន្ធនិងសិទ្ធិប្រហាក់ប្រហែល ម៉ាក ការកសាងកេរ្តិ៍ឈ្មោះម៉ាក ប្រកាសនីយបត្រតក្កកម្ម គំនូរឧស្សាហកម្ម ដល់គ្រូបង្វឹកកីឡា អត្តពលិក អ្នកសារព័ត៌មានកីឡា អ្នកសម្តែងសិល្បៈបែបកីឡា ក្រុមហ៊ុនផ្សព្វផ្សាយ និងតួអង្គពាក់ព័ន្ធនឹងវិស័យកីឡា។

​ជាមួយគ្នានេះ លោកស្រី បានលើកទឹកចិត្តដល់ក្រសួងស្ថាប័នពាក់ព័ន្ធសិក្សា និងវាយតម្លៃលើលិខិតបទដ្ឋានគតិយុត្ត ពាក់ព័ន្ធនឹងកម្មសិទ្ធិបញ្ញាឡើងវិញ ដើម្បីរៀបចំធ្វើវិសោធនកម្មឡើងវិញ ដើម្បីឱ្យស្របតាមបរិបទនៃសង្គមសេដ្ឋកិច្ចកម្ពុជា និងជំរុញ​គណៈកម្មាធិការជាតិគ្រប់គ្រងកម្មសិទ្ធិបញ្ញា ត្រូវបន្តខិតខំសម្របសម្រួលជាមួយ ក្រសួង-ស្ថាប័នពាក់ព័ន្ធ និងដៃគូអភិវឌ្ឍន៍ ក្នុងការអនុវត្តគោលនយោបាយជាតិ ស្តីពីកម្មសិទ្ធិបញ្ញាឆ្នាំ២០២៣-២០២៨។

យោងតាមគណៈកម្មាធិការជាតិគ្រប់គ្រងកម្មសិទ្ធិបញ្ញា បានឱ្យដឹងថា ក្នុងឆ្នាំ២០២៥ បានទទួលពាក្យស្នើសុំចុះបញ្ជីម៉ាកតាមប្រព័ន្ធជាតិ និងអន្តរជាតិ មានចំនួន ១៥ ៦៨៣ម៉ាក កើនឡើង ២០,៦៤% ការចុះបញ្ជីប្រកាសនីយបត្រតក្កកម្មមានចំនួន ១១៣ កើនឡើងចំនួន ៣៩,៥% និងការចុះបញ្ជីស្នាដៃសិទ្ធិអ្នកនិពន្ធនិងសិទ្ធិប្រហាក់ប្រហែលមាន ចំនួន ១៤៦ កើនឡើង ២៩,៧៣%។ ជាងនេះទៅទៀត ក្រសួងពាណិជ្ជកម្ម បានចុះបញ្ជីម៉ាកសម្គាល់ភូមិសាស្ត្រទំនិញប្រហុកសៀមរាប ផងដែរ​៕