​(ភ្នំពេញ)៖ លោកស្រី ចម និម្មល រដ្ឋមន្រ្តីក្រសួងពា​ណិជ្ជកម្ម មានសុទិដ្ឋិនិយមថា កម្ពុជានឹងសម្រេចបាននូវគោលដៅក្លាយអធិរាជស្វាយចន្ទី ក្នុងពេលខាងមុខនេះ ខណៈបច្ចុប្បន្ននេះ វិស័យស្វាយចន្ទីបានបង្ហាញការរីកចម្រើនជាបន្តបន្ទាប់ ទាំងការនាំចេញ និងការដាំដុះ។

​ថ្លែងប្រាប់អ្នកសារព័ត៌មានក្នុងទិវាកម្មសិទ្ធិបញ្ញាពិភពលោក លោកស្រី ចម និម្មល បានឱ្យដឹងថា ស្វាយចន្ទី គឺជាដំណាំដ៏មានសក្តានុពល ជាពិសេសកម្ពុជាមានពូជប្រភេទ M23 និង M26 ដែលជាប្រភេទពូជលេចធ្លោ ខុសប្លែកពីពូជផ្សេងនៅលើពិភពលោក ដែលធ្វើឱ្យអ្នកវិនិយោគមានការចាប់អារម្មណ៍ ដោយសារវាមានគ្រាប់ធំ និងមានរសជាតិឆ្ងាញ់ជាងគ្រាប់ធម្មតា។ ហើយដើម្បី​ឱ្យវិស័យស្វាយចន្ទីនៅកម្ពុជា កាន់តែរីកចម្រើន រដ្ឋាភិបាលបានបង្កើតនូវសួនឧស្សាហកម្មពិសេសមួយ សម្រាប់តែស្វាយចន្ទី​ ដែលនឹងជួយជំរុញទីផ្សារស្វាយចន្ទីនេះ បានកាន់តែប្រសើរ។

ទន្ទឹមគ្នានេះ លោកស្រីបានឱ្យដឹងថា តាមរយៈក្រសួងពាណិជ្ជកម្ម សហគមន៍ និងអ្នកកែច្នៃបានពង្រីកទីផ្សារនាំចេញបានយ៉ាងច្រើន ​ខណៈពេលថ្មីៗនេះ ក្រសួងពាណិជ្ជកម្ម ​ទើបតែចរចាទទួលបានទីផ្សារ ដែលទទួលទិញស្វាយចន្ទីកម្ពុជាដាក់លក់ប្រមាណជាង​ ៦០០ហាងបន្ថែមទៀតនៅហុងកុង ដែលជាប្រភេទម៉ាតធំៗ។

សូមជម្រាបផងដែរថា ក្រោមកិច្ចសហការយ៉ាងជិតស្និទ្ធរវាងក្រសួងពាណិជ្ជកម្ម និងក្រុមហ៊ុន Mirarth Holdings និងក្រុមហ៊ុន ITOCHU Corporation ​គ្រាប់ស្វាយចន្ទីកែច្នៃរបស់កម្ពុជា បាននិងកំពុងដាក់លក់នៅក្នុងផ្សារទំនើប Family Mart ដ៏ល្បីល្បាញជាង១ម៉ឺន៦ពាន់ទីតាំងនៅប្រទេសជប៉ុន។

យោងតាមគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ បាន​ដាក់គោលដៅ​ជំរុញការកែច្នៃគ្រាប់ស្វាយចន្ទីឱ្យបានយ៉ាងតិច២៥% នៅត្រឹមឆ្នាំ២០២៧ និងកើនឡើងដល់យ៉ាងតិច ៥០% នៅឆ្នាំ២០៣២។ តាមគោលនយោបាយនេះ មានគោលបំណងប្រែក្លាយកម្ពុជា ឱ្យទៅជាប្រទេសកែច្នៃ និងនាំចេញគ្រាប់ស្វាយចន្ទីដ៏ធំមួយ ដើម្បីបង្កើនតម្លៃបន្ថែមសេដ្ឋកិច្ច។

ក្នុងជំរុញការកែច្នៃ និងនាំចេញគ្រាប់ចន្ទីទៅទីផ្សារអន្តរជាតិ ធនាគារ ជីប ម៉ុង បានសម្រេចបង្កើនទំហំហិរញ្ញប្បទានរហូតដល់ ៥០០លានដុល្លារ ជួយដល់វិស័យស្វាយចន្ទី និង​ស្រូវ-អង្ករ ​ដើម្បីគាំទ្រ និងលើកកម្ពស់ វិស័យស្នូលទាំងពីរនេះឱ្យមានលទ្ធភាព​ និងសមត្ថភាពប្រកួតប្រជែង​ នៅលើទីផ្សារអន្ដរជាតិ។

អ្នកឧកញ៉ា លាង ម៉េង អគ្គនាយកធនាគារ ជីប ម៉ុង ​មានប្រសាសន៍ថា ការបង្កើននូវបញ្ចប់ហិរញ្ញប្បទានសម្រាប់វិស័យស្រូវ-អង្ករ និងស្វាយចន្ទីនេះ ធ្វើឡើងក្នងគោលដៅជំរុញវិស័យទាំងពីរនេះឱ្យកាន់តែរឹងមាំ។

លោកបន្ថែមថា តាមរយៈផ្តល់ឥណទាន ក្នុងទំហំធំនេះ​នឹងជួយឱ្យរោងចក្រសហគ្រាសកែច្នៃ និងអ្នកនាំចេញផលិតផលស្វាយចន្ទី ​មានលទ្ធភាពប្រមូលទិញពីកសិករ យកមកស្តុកទុក សម្រាប់កែច្នៃ នាំចេញ។ ក្រៅពីការផ្តល់ទុន ជីប ម៉ុង ​ក៏​​ផ្ដល់ជាយុទ្ធសាស្រ្ដក្នុងការគ្រប់អាជីវកម្មឱ្យកាន់តែរីកចម្រើនផងដែរ។ លោកគូសបញ្ជាក់ថា តាមរយៈយុទ្ធសាស្រ្តនេះ នឹងបង្កើតការងារយ៉ាងច្រើនដល់ប្រជាជននៅមូលដ្ឋាន​។

លោក អាន ដារ៉ា ប្រធានសហព័ន្ធស្វាយចន្ទីកម្ពុជា បានលើកឡើងថា ​កម្ពុជា​ត្រូវបានចាត់ទុកថា ប្រទេសមួយដែលផលិតស្វាយចន្ទីច្រើនជាងគេ នៅលើពិភពលោក ដោយកាលពីឆ្នាំ២០២៥ កម្ពុជាមានសមត្ថភាពផលិតបានជាង ១លានតោន។ ប៉ុន្តែយ៉ាងនេះក្តី កម្ពុជាលទ្ធភាពតិចតួចក្នុងការកែច្នៃ ដោយស្វាយចន្ទីភាគច្រើនត្រូវបាននាំចេញ ​ជាប្រភេទគ្រាប់ស្រស់ មិនទាន់កែច្នៃ ​​ក្នុងនោះចេញទៅវៀតណាមជាង៩៩ម៉ឺនតោន។

បើតាមលោកអាន ដារ៉ា បច្ចុប្បន្ននេះ នៅកម្ពុជា មានរោងចក្រកែច្នៃប្រមាណ ៤៥រោងចក្រ ទាំងខ្នាតតូច និងខ្នាតធំ ដែលជាមធ្យមក្នុងមួយថ្ងៃ រោងចក្រមួយមានលទ្ធភាពកែច្នៃគ្រាប់ស្រស់ បានប្រមាណ ១០តោន​។ លោកគូសបញ្ជាក់ថា ប្រសិនរោងចក្រទាំងនោះ មានទុនគ្រប់គ្រាន់ប្រមូលទិញគ្រាប់ស្វាយចន្ទី យកមកកែច្នៃឱ្យអស់លទ្ធភាព នឹងអាចកែច្នៃបានប្រមាណ១៥%នៃចំនួនស្វាយចន្ទីសរុបប្រមាណ ១លានតោន។

លោកបានសម្តែងការសាទរចំពោះធនាគារ ជីប ម៉ុង ដែលបានទម្លាក់ទុនរហូត ៥០០លានដុល្លារ ដល់អ្នកកែច្នៃស្វាយចន្ទី និងស្រូវអង្ករក្នុងស្រុក ដើម្បីឱ្យពួកគេមានលទ្ធភាពកាន់តែខ្ពស់ ក្នុងការប្រមូលទិញគ្រាប់ស្រស់ មកស្តុកទុក សម្រាប់កែច្នៃ នាំចេញទៅកាន់ទៅផ្សារអន្តរជាតិ​​ ស្របពេលបច្ចុប្បន្នសមាជិកសហព័ន្ធស្វាយចន្ទី ទទួលបានទុនបណ្តើរសម្រាប់ប្រមូលទិញស្វាយចន្ទីពីកសិករ យកមកស្តុកទុក សម្រាប់កែច្នៃផងដែរ៕