(ភ្នំពេញ)៖ ស្របពេលដែលធនាគារ ជីប ម៉ុង ទម្លាក់ទុនរហូតដល់៥០០លានដុល្លារ ជួយដល់វិស័យស្រូវអង្ករ និងស្វាយចន្ទី ធនាគារថែមទាំងបញ្ជូនអ្នកជំនាញទៅជួយដល់ម្ចាស់អាជីវកម្ម ក្នុងដំណើរការខ្សែច្រវាក់ផលិតកម្មផងដែរ។

អ្នកឧកញ៉ាលាង ម៉េង អគ្គនាយកធនាគារ ជីប ម៉ុង បានឱ្យដឹងថា យុទ្ធសាស្ត្រនេះ គឺជាយុទ្ធសាស្រ្តដំបូងដែលអនុវត្តឡើងដោយធនាគារ ជីប ម៉ុង ដើម្បីជួយឱ្យអាជីវកម្ម ក្នុងវិស័យស្នូលទាំងពីរនេះមាននិរន្តភាព និងបង្កើនភាពប្រកួតប្រជែងនៅលើទីផ្សារអន្តរជាតិកាន់តែខ្លំាងជាងមុន។

លោកបានគូសបញ្ជាក់ថា តាមរយៈយុទ្ធសាស្ត្រនេះនឹងធានាថា កម្ចីដែលទទួលបានពីធនាគារ នឹងប្រើប្រាស់ចំគោលដៅ និងមានប្រសិទ្ធភាពខ្ពស់។

សម្រាបថា វិស័យស្រូវអង្ករ និងវិស័យស្វាយចន្ទី គឺជាវិស័យអាទិភាព ដែលបាននិងកំពុងទទួលបានការគាំទ្រពីរាជរដ្ឋាភិបាល តាមរយៈការអនុគ្រោះផ្សេងៗ រួមទាំងការគាំទ្រទុនពីវិស័យធនាគារផងដែរ។

នៅឆ្នាំ២០២៥ កម្ពុជាបាននាំចេញអង្ករចំនួន ៩៤០ ៣២១ តោន គិតជាទឹកប្រាក់បានចំនួន ៦០២.៤១លានដុល្លារសហរដ្ឋអាមេរិក។ ខណៈការនាំចេញស្រូវចំនួន ៦ ៨៥៩ ៩៣០ តោនស្រូវសើម ដែលគិតជាទឹកប្រាក់ប៉ាន់ប្រមាណបានចំនួន ១ ៥៧៩.៨៦ លានដុល្លារសហរដ្ឋអាមេរិក។

កម្ពុជាមានបំណងសម្រេចបាននូវគោលដៅក្លាយអធិរាជស្វាយចន្ទី។ របាយការណ៍របស់សមាគមស្វាយចន្ទីកម្ពុជា បានឱ្យដឹងថា ក្នុងឆ្នាំ២០២៥ ការនាំចេញស្វាយចន្ទីមិនទាន់កែច្នៃមានបរិមាណជាង ១លានតោន ដោយទទួលបានទឹកប្រាក់ជាង ១៥០០លានដុល្លារ៕