(ភ្នំពេញ)៖ បន្ទាប់ពីមានផ្ទុះការលើកឡើងរបស់មហាជន ចែកចាយព្រោងព្រៀត នៅលើបណ្ដាញសង្គម អំពី «ផ្លែទុរេន» ដែលសង្ស័យលួចនាំចូលពីថៃ នៅក្នុងខេត្ដបាត់ដំបង នាពេលថ្មីៗនេះ លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម ថ្លែងប្រាប់បណ្ដាញព័ត៌មាន Fresh News នៅថ្ងៃទី០៤ ខែឧសភា ឆ្នាំ២០២៦នេះថា ភ្លាមៗបន្ទាប់ពីទទួលដំណឹងនេះ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានចាត់ឱ្យមន្ត្រីជំនាញ ក.ប.ប សហការជាមួយមន្ទីរពាណិជ្ជកម្មខេត្តបាត់ដំបង ចុះធ្វើការសម្ភាសន៍ជាមួយអាជីវកម្ម លក់ទុរេន នៅផ្សារភូពុយ ដោយពួកគាត់បានបញ្ជាក់ថា ទុរេនទាំងនោះទិញពីផ្សារនាគមាស និងពីខេត្តកំពង់ចាម មិនមែនជាទុរេនរបស់ថៃនោះទេ។

លោក ប៉ែន សុវិជាតិ បានគូសបញ្ជាក់ថា ការងាររបស់ក្រសួងពាណិជ្ជកម្ម គឺរក្សាសុវត្ថិភាពចំណីអាហារ សម្រាប់អ្នកប្រើប្រាស់ ដូច្នេះហើយ «ផ្លែទុរេន» ត្រូវធ្វើយ៉ាងម្ដេចកុំឲ្យមានសារធាតុគីមី ធ្វើឲ្យប៉ះពាល់ដល់សុខភាព។ ដើម្បីរក្សាសុវត្ថិភាពអ្នកប្រើប្រាស់ ក្រសួងពាណិជ្ជកម្ម បានបញ្ជូនក្រុមការងារផ្នែកមន្ទីរពិសោធន៍ចល័ត ទៅតាមផ្សារធំៗ ឬផ្សារបោះដុំ ហើយក៏ដូចជាផ្សារលក់រាយផ្សេងៗ ដើម្បីយកសំណាកគំរូមកពិនិត្យ ស្វែងរកសារធាតុហាមឃាត់។

ក្រសួងពាណិជ្ជកម្ម​ នៅតែបន្ដការយកចិត្ដទុកដាក់ និងតាមដានយ៉ាងម៉ឺងម៉ាត់ទៅលើទំនិញ «ផ្លែទុរេន» តាមការលើកឡើងរបស់មហាជន ក៏ដូចជាទៅការព្រួយបារម្ភរបស់អ្នកប្រើប្រាស់ ដើម្បីធ្វើយ៉ាងណាការពារអ្នកប្រើប្រាស់ កុំឲ្យទទួលរងគ្រោះពីចំណីអាហារគ្មានសុវត្ថិភាព។

លោក ប៉ែន សុវិជាតិ ក៏សូមឲ្យសាធារណជន ធ្វើរបាយការណ៍ ឬក៏ជូនដំណឹងមកក្រសួងពាណិជ្ជកម្ម តាមរយៈលេខ «១២៦៦» ក្នុងករណីរកឃើញថា មានទំនិញដែលប៉ះពាល់សារធាតុគីមី ឬដាក់ត្រាំសារធាតុគីមី ដូចករណីដែលលើកឡើងចំពោះផ្លែទុរេន។

លោកបន្ដទៀតថា ចំពោះករណីទាក់ទងនឹងផ្លែទុរេន នៅខេត្ដបាត់ដំបង ដែលថា លួចនាំចូលពីប្រទេសថៃ សូមបងប្អូនមហាជន ជួយផ្ដល់ព័ត៌មានបន្ថែម បើសិនជារកឃើញ ថាមានភស្ដុតាងជាក់ស្ដែងនៃការនាំចូលទំនិញរបៀបនេះ ហើយទំនិញរបៀបនេះ វាធ្វើឲ្យប៉ះពាល់ដល់សុខភាពប្រជាពលរដ្ឋ។

លោកសង្កាត់ធ្ងន់ថា ចំពោះការទប់ស្កាត់ ឬស្វែងរកប្រភពទុរេននាំចូលនោះ ខាងក្រសួងពាណិជ្ជកម្ម មិនមានសមត្ថកិច្ចដល់នោះទេ គឺជាសមត្ថកិច្ចទាំងស្រុង របស់អាជ្ញាធរមានសមត្ថកិច្ចតាមច្រកព្រំដែន ហើយបើច្រកអន្ដរជាតិ គឺជាសមត្ថកិច្ចខាងគយ៕

សូមស្តាប់ការពន្យល់របស់លោក លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម៖