(ភ្នំពេញ)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (CDC) បានថ្លែងបញ្ជាក់ថា ដើម្បីទាក់ទាញវិនិយោគិនឱ្យមកបណ្តាក់ទុននៅកម្ពុជាឱ្យបានច្រើន សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញការណែនាំជាបន្តបន្ទាប់ដល់គ្រប់ស្ថាប័ន សំដៅធ្វើយ៉ាងណាកាត់បន្ថយភាពស្មុគស្មាញ ដល់បណ្តាអ្នកវិនិយោគដែលមកបណ្តាក់ទុននៅកម្ពុជា។

លោក ស៊ុន ចាន់ថុល បានថ្លែងដូចនេះនាព្រឹកថ្ងៃទី០៧ ខែឧសភា ឆ្នាំ២០២៦នេះ នាឱកាសអញ្ជើញជាអធិបតីបើកវេទិកាវិនិយោគកម្ពុជាឆ្នាំ២០២៦ ក្រោមមូលបទ «ការពង្រឹងភាពធន់តាមរយៈការថែទាំវិនិយោគប្រកបដោយភាពបុរេសកម្ម និងភាពជាដៃគូយុទ្ធសាស្ត្រ» ដោយមានការចូលរួមពីលោករដ្ឋមន្ត្រីក្រសួងរ៉ែ និងថាមពល រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ, រដ្ឋមន្ត្រីក្រសួងបរិស្ថាន រួមទាំងមានលោក លោកស្រី លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រីអ្នកពាក់ព័ន្ធជាច្រើនរូបទៀត។

លោកឧបនាយករដ្ឋមន្ត្រី ស៊ុន ចាន់ថុល បានថ្លែងដូចនេះថា «គោលដៅធំរបស់រាជរដ្ឋាភិបាលយើង គឺកាត់បន្ថយភាពក្រីក្ររបស់ប្រជាពលរដ្ឋយើង អីចឹងត្រូវតែរកអ្នកវិនិយោគិនមកដាក់ទុនឱ្យបានច្រើន ហើយអ្នកវិនិយោគនឹងមិនមកទេ បើយើងមាននីតិវិធីស្មុគស្មាញ តម្លៃថ្លៃពេកក៏គេមិនមកដែរ គេអាចទៅដាក់ទុននៅប្រទេសផ្សេងបាន ដូចនេះយើងត្រូវធ្វើយ៉ាងណាទាក់ទាញគេឱ្យបាន»។

លោកឧបនាយករដ្ឋមន្ត្រី ស៊ុន ចាន់ថុល បានបន្ថែមថា ដើម្បីឱ្យយើងទាក់ទាញអ្នកវិនិយោគិនឱ្យមកវិនិយោគក្នុងប្រទេសយើងបាន លុះណាដែរយើងត្រូវធ្វើការកែទម្រង់ស៊ីជម្រៅ តាមរយៈការកាត់បន្ថយការចំណាយគ្រប់បែបយ៉ាងទាំងអស់ ទាំងនីតិវិធីកុំឱ្យមានភាពស្មុគស្មាញ ទើបធ្វើឱ្យវិនិយោគិនមកដាក់ទុនក្នុងស្រុកយើងបាន៕