(ភ្នំពេញ)៖ លោក កែវ រតនៈ អនុប្រធានទី៣នៃក្រុមប្រឹក្សាអភិវឌ្ឍន៍កម្ពុជា និងជារដ្ឋមន្ដ្រីក្រសួងរ៉ែ និងថាមពល បានបញ្ជាក់ឲ្យដឹងថា រាជរដ្ឋាភិបាលកម្ពុជានឹងបង្កលក្ខខណ្ឌងាយស្រួល ដើម្បីឲ្យវិស័យឯកជន អាចចូលរួមអភិវឌ្ឍន៍រ៉ែ និងថាមពល រាប់ទាំងការចម្រាញ់ប្រេង នៅក្នុងប្រទេសកម្ពុជា។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក កែវ រតនៈ អញ្ជើញចូលរួមបិទវេទិកាវិនិយោគកម្ពុជា ឆ្នាំ២០២៦ ក្រោមមូលបទ «ការពង្រឹងភាពធន់តាមរយៈ ការថែទាំវិនិយោគ ប្រកបដោយភាពបុរេសកម្ម និងភាពជាដៃគូយុទ្ធសាស្ត្រ» នៅថ្ងៃទី០៧ ខែឧសភា ឆ្នាំ២០២៦។

រដ្ឋមន្ដ្រី កែវ រតនៈ បានបញ្ជាក់យ៉ាងដូច្នេះថា «ក្នុងវិស័យរ៉ែ និងថាមពល ក៏នៅតែមានកាលានុវត្ដភាពខ្ពស់ ក្នុងការចូលរួមរបស់វិស័យឯកជន, រាជរដ្ឋាភិបាល នឹងបង្កលក្ខខណ្ឌទាំងឡាយណាចាំបាច់ទាំងអស់ ឲ្យវិស័យឯកជនអាចចូលរួមអភិវឌ្ឍន៍រ៉ែ និងថាមពល រាប់ទាំងការចម្រាញ់ប្រេង»។

ស្របជាគ្នានេះ រដ្ឋមន្ដ្រី កែវ រតនៈ ក៏បានលើកឡើងផងដែរថា រឿងបញ្ហារ៉ែរបស់កម្ពុជា ក៏ដូចជារ៉ែនៅក្នុងពិភពលោក គឺកម្ពុជានឹងនូវអភិវឌ្ឍន៍រ៉ែ ដែលជាវិស័យយុទ្ធសាស្ដ្រមួយ សម្រាប់ប្រទេសនានាលើពិភពលោក ក៏ដូចជាកម្ពុជាផងដែរ។

រដ្ឋមន្ដ្រី កែវ រតនៈ បានលើកឡើងថា បើសិនជានៅប្រទេសគេ ចេះយកថ្មមកធ្វើជាផ្ទះ និងផ្លូវបាន កម្ពុជាក៏ត្រូវការយកថ្មមកធ្វើផ្ទះ និងធ្វើផ្លូវបានដូចគ្នា ប៉ុន្ដែកម្ពុជាមានអភិក្រមច្បាស់លាស់របស់យើង។

រដ្ឋមន្ដ្រី កែវ រតនៈ បានបញ្ជាក់ថា កន្លែងធ្វើរ៉ែដាច់ខាតត្រូវតែជាកន្លែងមួយ ដែលត្រូវបានសិក្សាច្បាស់លាស់ និងមានការឯកភាពពីសហគមន៍ ពីក្រសួងបរិស្ថាន។

បន្ថែមពីនោះទៀត រដ្ឋមន្ដ្រី កែវ រតនៈ បានគូសបញ្ជាក់ថា នៅប្រទេសកម្ពុជា ដីកោះ ដីព្រៃ ដីមាត់បឹង ដីជ្រោះ សុទ្ធសឹងតែជាដីរបស់រដ្ឋ និងជាតំបន់ការពារ ប៉ុន្ដែនៅក្នុងតំបន់ការពារ មានកន្លែងខ្លះអភិវឌ្ឍន៍បាន និងកន្លែងខ្លះអភិវឌ្ឍន៍មិនបាន៕

សូមស្តាប់ការលើកឡើងរបស់លោក កែវ រតនៈ៖