យល់ដឹងពីជំនួញ៖ អ្នកជំនួញជើងចាស់លើកឡើងថា ការបង្កើត ឬរៀបចំឱ្យមានខ្សែច្រវាក់ផ្គត់ផ្គង់ដែលអាចគ្រប់គ្រងបាន នឹងអាចជៀសវាងបាននូវការក្លែងបន្លំផលិតផលនាំចូល ថាជាផលិតផលក្នុងស្រុក (Video inside)
10-05-2026 07:30
(ភ្នំពេញ)៖ ការគ្រប់គ្រងខ្សែច្រវាក់ផ្គត់ផ្គង់ មានសារៈសំខាន់សម្រាប់អាជីវកម្មគ្រប់ប្រភេទ មិនថាទាំងអាជីវកម្មទំហំធំ ឬតូចនោះទេ ក៏ដូចជាការជំរុញការផលិតសម្រាប់ផ្គត់ផ្គង់នៅក្នុងប្រទេស។
អ្នកជំនួញជើងចាស់ ឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកសហគ្រាស PPM-Confirel មានប្រសាសន៍ថា ការគ្រប់គ្រងខ្សែច្រវាក់ផ្គត់ផ្គង់ (Supply Chain) នៅក្នុងប្រទេសមានសារៈសំខាន់ក្នុងខ្សែច្រវាក់នៃការផលិត និងផ្គត់ផ្គង់នៅកម្ពុជា ជាពិសេសនឹងជួយជៀសវាងបាននូវការក្លែងបន្លំផលិតផលនាំចូល ថាជាផលិតផលក្នុងស្រុក។ ជាក់ស្តែង បើសិនជាយើងអាចគ្រប់បាននូវបរិមាណផលិតផល ចាប់តាំងដំណើរការផលិត រហូតដល់ដៃអតិថិជន នោះនឹងមិនអាចមានការនាំចូលផលិតផលដូចគ្នានោះមកបន្លំបានឡើយ។
ការគ្រប់គ្រងខ្សែច្រវាក់ផ្គត់ផ្គង់ (Supply Chain Management) គឺជាការគ្រប់គ្រងលំហូរទំនិញ ឬសេវាកម្ម រួមទាំងព័ត៌មាន និងទិន្នន័យពាក់ព័ន្ធផ្សេងៗ ដោយគិតចាប់តាំងពីដំណើរការផលិតវត្ថុធាតុដើម រហូតផលិតផលដល់ដៃអតិថិជន។
ឧកញ៉ាឱសថបណ្ឌិត ហៃ លីអ៊ាង មានប្រសាសន៍ថា ដោយសារតែការមិនអាចគ្រប់គ្រងបាននូវខ្សែច្រវាក់ផ្គត់ផ្គង់ ងាយនាំឱ្ អ្នករកស៊ីខ្លះបន្លំផលិតផល។ ដើម្បីគ្រប់គ្រងបាននូវខ្សែច្រវាក់ផ្គត់ផ្គង់ ទាមទារឱ្យមានការចូលរួមទាំងអស់គ្នា ចាប់តាំងពីអ្នកដាំ អ្នកផលិត អ្នកចែកចាយ និងអ្នកផ្គត់ផ្គង់ជាដើម៕
សូមស្តាប់ការលើកឡើងរបស់ឧកញ៉ាឱសថបណ្ឌិត ហៃ លីអ៊ាង៖
