កម្ពុជានាំចេញគ្រាប់ស្វាយចន្ទីឆៅជាង ៨៣ម៉ឺនតោន ទទួលបានទឹកប្រាក់ជាង ១ ៤៤០លានដុល្លារ កើនឡើងជាង២៤% (Video inside)
19-05-2026 14:48
(ភ្នំពេញ)៖ ក្នុងរយៈពេល៤ខែ ដើមឆ្នាំ២០២៦នេះ កម្ពុជាបាននាំចេញគ្រាប់ស្វាយចន្ទីឆៅប្រមាណ ៨៣១ ១៧៩ តោន ទៅកាន់ប្រទេសវៀតណាម ដោយរកចំណូលបានប្រមាណ ១ ៤៤០ លានដុល្លារ កើនឡើង ២៤.១៧% ធៀបនឹងឆ្នាំមុន។ នេះបើយោងតាមទិន្នន័យនាំចេញក្រៅផ្លូវការ ដែលទទួលបានពីសមាគមស្វាយចន្ទីកម្ពុជា។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់បណ្តាញព័ត៌មាន Fresh News នៅថ្ងៃទី១៩ ខែឧសភា ឆ្នាំ២០២៦នេះ ស្របពេលដែលកំណើននៃការនាំចេញកើនឡើង តម្លៃស្វាយចន្ទីឆៅដែលកសិករបានលក់ចេញក៏មានការកើនឡើងផងដែរ ពោលគឺតម្លៃកើនឡើងលើសឆ្នាំមុនប្រមាណ២០%។
បើតាមប្រធានសមាគមស្វាយចន្ទីកម្ពុជា តម្លៃស្វាយចន្ទីឆៅជាមធ្យមក្នុងឆ្នាំ២០២៦នេះ ក្នុងខែមករា មានតម្លៃជាមធ្យម ៧២០០រៀលក្នុងមួយគីឡូក្រាម (គ្រាប់សើម), នៅខែកុម្ភៈ មានតម្លៃជាមធ្យម ៦១០០ រៀលក្នុងមួយគីឡូក្រាម (គ្រាប់សើម), ខែមីនា មានតម្លៃប្រមាណ ៦៣០០រៀលក្នុងមួយគីឡូក្រាម (គ្រាប់សើម) និងក្នុងខែមេសា មានតម្លៃ ៦២០០រៀលក្នុងមួយគីឡូក្រាម (គ្រាប់សើម)។
លោកបានលើកឡើងថា លទ្ធផលនៃការនាំចេញនេះ ហាក់ផ្ទុយស្រឡះពីការព្រួយបារម្ភកាលពីដើមឆ្នាំ ពីផលប៉ះពាល់អវិជ្ជមាននៃការប្រែប្រួលអាកាសធាតុមកលើទិន្នផលចន្ទី។
កំណើននេះកើតឡើងចំពេលមានលក្ខខណ្ឌអាកាសធាតុប្រឈម រួមមាន អាកាសធាតុត្រជាក់អូសបន្លាយ ភ្លៀងកក់ខែ និងកម្ដៅខ្លាំងលើសពី ៤០អង្សាសេ ដែលដំបូងឡើយបានបង្កឱ្យមានការភ័យខ្លាច ក្នុងចំណោមអ្នកជំនាញឧស្សាហកម្ម អំពីការធ្លាក់ចុះនៃទិន្នផល និងគុណភាព។
លោកនិយាយទៀតថា «សញ្ញានេះ ជាសញ្ញានេះ គឺជាសញ្ញាវិជ្ជមានសម្រាប់កសិករ ពីព្រោះក្នុងរយៈពេល ២០ឆ្នាំមកនេះ។ ក្នុងឆ្នាំ២០២៦នេះជាឆ្នាំប្រវត្តិសាស្រ្តហើយ ដែលដំណាំស្វាយចន្ទីផ្តល់ផលល្អ ហើយតម្លៃមានស្ថេរភាព។ ប៉ុន្តែមិនមែនជាការដំណើរការល្អ សម្រាប់ការកែច្នៃក្នុងស្រុកនោះទេ ដោយសារការកែច្នៃរបស់យើងនៅមានកម្រិត ដូច្នេះហេដ្ឋារចនាសម្ព័ន្ធទុកដាក់របស់យើង មិនមានសមត្ថភាពគ្រប់គ្រាន់ ដូច្នេះហើយទើបធ្វើឱ្យលំហូរគ្រាប់ឆៅរបស់យើងចេញទៅវៀតណាមយ៉ាងគំហុក ខណៈវៀតណាមមានតម្រូវការកែច្នៃក្នុងមួយឆ្នាំប្រមាណ ៣.៥លានតោន»។
លោកបន្ថែមថា ការកើនឡើងនៃការនាំចេញនេះ ត្រូវបានមើលឃើញថា ភាគច្រើនដោយសារវិធានការសកម្មរបស់ក្រសួងកសិកម្ម រុក្ខាប្រមាញ់ និងនេសាទ ដែលបានដាក់ពង្រាយមន្ត្រីកសិកម្មឃុំ ដើម្បីជួយកសិករដោយផ្ទាល់។ មន្ត្រីទាំងនេះបានដើរតួនាទីយ៉ាងសំខាន់ ក្នុងការជួយកសិករវាយតម្លៃហានិភ័យ និងបន្សុំាខ្លួនទៅនឹងការប្រែប្រួលអាកាសធាតុ តាមរយៈការគាំទ្រផ្ទាល់នៅតាមកសិដ្ឋាន។
យ៉ាងនេះលោក អួន ស៊ីឡុត ប្រធានសមាគមស្វាយចន្ទីកម្ពុជា បានដាស់តឿនឱ្យមានការប្រុងប្រយ័ត្ន ចំពោះការបកស្រាយលទ្ធផលទាំងនេះ។ លោកបានកត់សម្គាល់ថា ទោះបីជាសកម្មភាពក្នុងត្រីមាសទីមួយ មានភាពគួរឱ្យលើកទឹកចិត្តក៏ដោយ ប៉ុន្តែវានៅលឿនពេកក្នុងការកំណត់ថា តើនិន្នាការកើនឡើងនេះនឹងបន្តពេញមួយឆ្នាំ ឬយ៉ាងណា ជាពិសេសដោយសារភាពមិនច្បាស់លាស់នៃអាកាសធាតុដែលកំពុងបន្តកើតមាន៕
