តើលំនៅឋានតម្លៃសមរម្យទាំង ៣ប្រភេទ ដែលទទួលការគាំទ្រពីរាជរដ្ឋាភិបាល ត្រូវគោរពលក្ខខណ្ឌដូចម្ត៉េចខ្លះ?
19-05-2026 15:24
(ភ្នំពេញ)៖ លំនៅឋានតម្លៃសមរម្យ ៣ប្រភេទ នឹងទទួលបានការគាំទ្រពីរាជរដ្ឋាភិបាល រួមមាន លំនៅឋានសង្គម, លំនៅឋានតម្លៃសមរម្យកម្មសិទ្ធិ, លំនៅឋានតម្លៃសមរម្យសម្រាប់ជួល ដែលអ្នកអភិវឌ្ឍន៍អាចសុំវិនិយោគ ដើម្បីទទួលបានការគាំទ្រពីរាជរដ្ឋាភិបាល និងផ្គត់ផ្គង់ដល់ពលរដ្ឋដែលមានចំណូលទាប។
យោងតាមគោលនយោបាយអភិវឌ្ឍន៍លំនៅឋានសង្គម និងលំនៅឋានតម្លៃសមរម្យ ដែលរដ្ឋាភិបាលបានដាក់ចេញកាលពីពេលថ្មីៗនេះ បានឱ្យដឹងថា គ្រប់គម្រោង លំនៅឋានដែលទទួលបានការគាំទ្រពីរាជរដ្ឋាភិបាល ត្រូវប្រើប្រាស់ទំហំដីយ៉ាងច្រើនបំផុត៧០% នៃផ្ទៃដីសរុប របស់គម្រោងសម្រាប់សាងសង់លំនៅឋាន និងមានរក្សានូវលម្អបៃតង ព្រមទាំងមានភ្ជាប់ជាមួយរបាយការណ៍បឋម នៃការវាយតម្លៃហេតុប៉ះពាល់បរិស្ថាន និងសង្គម។
គម្រោងទាំងនេះ អាចត្រូវបានអភិវឌ្ឍជាសហគមន៍ បញ្ចូលគ្នារវាងលំនៅឋាន ដែលទទួលបានការគាំទ្រពីរាជរដ្ឋាភិបាល និងលំនៅឋានប្រភេទផ្សេងទៀតក្នុង គម្រោងតែមួយ ដោយសមាមាត្រនៃចំនួនលំនៅឋានទាំងនោះ ធៀបនឹងចំនួនលំនៅឋាន ឬសំណង់ផ្សេងទៀត ក្នុងគម្រោងទាំងមូល នឹងត្រូវកំណត់ក្នុងការសិក្សាគម្រោង ដោយផ្អែកលើទីតាំង អតិថិជនគោលដៅ និងរចនាសម្ព័ន្ធហិរញ្ញវត្ថុរបស់គម្រោងជាអាទិ៍។
ការអភិវឌ្ឍលំនៅឋានសង្គម ដែលទទួលបានការគាំទ្រពីរាជរដ្ឋាភិបាល ត្រូវអនុលោមតាមលក្ខខណ្ឌដែលបានកំណត់។ គម្រោងលំនៅឋានសង្គម អាចជាគម្រោងដែលស្នើឡើង ដោយរាជរដ្ឋាភិបាល ស្ថាប័ន ដៃគូអភិវឌ្ឍ ឬអង្គការមិនមែនរដ្ឋាភិបាល ឬ វិស័យឯកជន។
រដ្ឋាភិបាលបានកំណត់ថា គម្រោងនេះត្រូវមានទីតាំងនៅជិតសាលារៀន ឬសាកលវិទ្យាល័យ មណ្ឌលសុខភាព និងជិតកន្លែងដែលអាចប្រកបមុខរបរ ចិញ្ចឹមជីវិតបាន ព្រមទាំង ជាលំនៅឋានប្រកបដោយគុណភាព សុវត្ថិភាព ផាសុកភាព និងមានការតភ្ជាប់ ហេដ្ឋារចនាសម្ព័ន្ធជាមូលដ្ឋាន រួមមាន ជាអាទិ៍៖ ទឹកស្អាត អគ្គិសនី ទូរគមនាគមន៍ និង ការដឹកជញ្ជូន។
សម្រាប់អតិថិជនគោលដៅត្រូវតែជាប្រជាជនកម្ពុជា មានអាយុយ៉ាងតិច ១៨ ឆ្នាំ និងពុំមានលំនៅឋានសម្រាប់រស់នៅ ជាប្រជាជនងាយរងគ្រោះ មានចំណូលកម្រិតទាប ឬប្រជាជនដែលត្រូវរើទីលំនៅ ពីតំបន់សំណង់មិនរៀបរយ ឬតំបន់សំណង់បណ្តោះអាសន្ន ឬតំបន់ការពារ ឬក្រុមប្រជាជនដែលទទួល បានការលើកទឹកចិត្តពីរាជរដ្ឋាភិបាល។
ទន្ទឹមនេះ អតិថិជនអាចនឹងតម្រូវឱ្យមានការចូលរួមបង់ប្រាក់ច្រើនបំផុតត្រឹម ១០% នៃប្រាក់ចំណូលគ្រួសារក្នុងមួយខែ ឬក្នុងចំនួនសមស្របណាមួយផ្អែកលើការសិក្ស គម្រោង និង ការសម្រេចរបស់រាជរដ្ឋាភិបាល។ អតិថិជនគោលដៅ អាចលក់លំនៅឋានបន្ត ៥ឆ្នាំ នៃការទទួលបានកម្មសិទ្ធិជាផ្លូវការ។
ចំណែកការអភិវឌ្ឍលំនៅឋានតម្លៃសមរម្យកម្មសិទ្ធិ ដែលទទួលបានការគាំទ្រពីរាជរដ្ឋាភិបាលត្រូវអនុលោម តាមលក្ខខណ្ឌមួយចំនួនដូចជា៖ ត្រូវមានទីតាំងស្ថិតនៅជិតតំបន់ឧស្សាហកម្ម តំបន់សេដ្ឋកិច្ចពិសេស រោងចក្រ សាលារៀន ឬសាកលវិទ្យាល័យ តំបន់ពាណិជ្ជកម្ម និងទីប្រជុំជន និងជាលំនៅឋានប្រកបដោយគុណភាព សុវត្ថិភាព ផាសុកភាព និង មានការតភ្ជាប់នូវហេដ្ឋារចនាសម្ព័ន្ធជាមូលដ្ឋាន ដូចជាទឹកស្អាត អគ្គិសនី ទូរគមនាគមន៍ និងការដឹកជញ្ជូន។
អតិថិជនត្រូវតែជាប្រជាជនកម្ពុជា មានអាយុយ៉ាងតិច ១៨ ឆ្នាំនិង ពុំមានលំនៅឋានផ្ទាល់ខ្លួន មានចំណូលប្រចាំខែច្រើនបំផុត បីលានពីរសែនរៀល (៣ ២០០ ០០០រៀល) ឬ ស្មើ នឹងប្រមាណ៨០០ដុល្លារអាមេរិកក្នុងមួយគ្រួសារ ឬអាចពិនិត្យកែសម្រួលក្នុង កម្រិតសមស្របណាមួយផ្អែកលើការសិក្សាគម្រោង និង តាមការសម្រេចរបស់គណៈកម្មាធិការអន្តរក្រសួងសម្រាប់គម្រោងអភិវឌ្ឍន៍លំនៅឋានសង្គម និងលំនៅឋានតម្លៃសមរម្យ (គ.អ.ល) ស្របតាមស្ថានភាពសង្គម-សេដ្ឋកិច្ច និង តម្រូវឱ្យមានគណនីសន្សំនៅធនាគារ ឬ គ្រឹះស្ថានមីក្រូហិរញ្ញវត្ថុ ឬគណនីប្រាក់បៀវត្ស ឬ ឯកសារបញ្ជាក់យថាប្រភេទផ្សេងៗ។ អតិថិជនគោលដៅ អាចលក់លំនៅឋានបន្តបានបន្ទាប់ ពីរយៈពេល៥ឆ្នាំ នៃការទទួលបានកម្មសិទ្ធិជាផ្លូវការ ឬតាមការស្នើសុំក្នុងលក្ខខណ្ឌចាំបាច់ណាមួយ ដោយមានការឯកភាពជាគោលការណ៍ពីរដ្ឋមន្ត្រីក្រសួងដែនដី និងនគររូបនីយកម្ម។
ដោយឡែក សម្រាប់គម្រោងអភិវឌ្ឍលំនៅឋានតម្លៃសមរម្យសម្រាប់ជួល ដែលទទួលបានការគាំទ្រពីរាជរដ្ឋាភិបាល ត្រូវអនុលោមតាមលក្ខខណ្ឌ ត្រូវមានទីតាំងស្ថិតនៅជិតតំបន់ឧស្សាហកម្ម តំបន់សេដ្ឋកិច្ចពិសេស រោងចក្រ សាលារៀន ឬ សាកលវិទ្យាល័យ តំបន់ពាណិជ្ជកម្ម និង ទីប្រជុំជន និង ជាលំនៅឋានប្រកបដោយគុណភាព សុវត្ថិភាព ផាសុកភាព និង មានការតភ្ជាប់នូវហេដ្ឋារចនាសម្ព័ន្ធជាមូលដ្ឋាន ដូចជាទឹកស្អាត អគ្គិសនី ទូរគមនាគមន៍ និង ការដឹកជញ្ជូន។
អតិថិជនត្រូវតែជាប្រជាជនកម្ពុជា មានអាយុយ៉ាងតិច ១៨ ឆ្នាំ និងជាសិស្សនិស្សិត កម្មករនិយោជិត អ្នកធ្វើចំណាកស្រុកមកទីក្រុង ឬ ទីប្រជុំជន ឬ ជាក្រុមប្រជាជនដែល ទទួលបានការលើកទឹកចិត្តពីរាជរដ្ឋាភិបាល និងតម្រូវឱ្យមានគណនីសន្សំនៅធនាគារ ឬ គ្រឹះស្ថានមីក្រូហិរញ្ញវត្ថុ ឬ គណនីប្រាក់បៀវត្ស ឬ ឯកសារបញ្ជាក់យថាប្រភេទផ្សេងៗ។
អតិថិជនត្រូវមានចំណូលប្រចាំខែច្រើនបំផុត ១ ៦០០ ០០០ រៀល ឬ ស្មើនឹងប្រមាណ៤០០ ដុល្លារអាមេរិក ក្នុងមួយគ្រួសារ ឬ អាចពិនិត្យកែសម្រួលក្នុងកម្រិតសមស្របណាមួយផ្អែកលើការសិក្សា គម្រោង និង តាមការសម្រេចរបស់ គ.អ.ល. ស្របតាមស្ថានភាពសង្គម-សេដ្ឋកិច្ច។
រាជរដ្ឋាភិបាលអាចពិនិត្យលទ្ធភាព អនុវត្តយន្តការគាំទ្រដល់លំនៅឋានផ្សេងៗ រួមមាន ជាអាទិ៍ ការកែលម្អ ឬ ជួសជុលលំនៅឋានដែលមានស្រាប់ ការសាងសង់ហេដ្ឋារចនាសម្ព័ន្ធផ្លូវ ការតភ្ជាប់ បណ្តាញទឹកស្អាត អគ្គិសនី និងទូរគមនាគមន៍ ដើម្បីគាំទ្រដល់គម្រោងកែលម្អលំនៅឋានផ្ទាល់ខ្លួន ឬ គម្រោងសាងសង់លំនៅឋានសម្រាប់ប្រជាជន ដែលមានដីផ្ទាល់ខ្លួន តាមរយៈការស្នើសុំពី គ.អ.ល.។ ការគាំទ្រនេះ គួរធ្វើឡើងលើតំបន់ដែលមានលក្ខណៈជាសហគមន៍ ឬនៅទីតាំងដែលកំណត់ដោយរាជរដ្ឋាភិបាល៕
