(ភ្នំពេញ)៖ ដីធ្លីមិនបានប្រើប្រាស់ សំដៅដល់ដីមានសំណង់ ឬគ្មានសំណង់ដែលមិនបានប្រើប្រាស់ និងមានវិសាលភាពអនុវត្ត ចំពោះដីធ្លីមិនបានប្រើប្រាស់ ដែលស្ថិតនៅក្រៅទីតាំងភូមិសាស្ត្រ ដែលជាកម្មវត្ថុនៃពន្ធលើអចលនទ្រព្យ នៅក្នុងព្រះរាជាណាចក្រកម្ពុជា។

យ៉ាងណាមិញ ពន្ធនេះក៏មានការលើកលែង មិនខុសពីប្រភេទពន្ធអាករផ្សេងទៀតនោះដែរ។

យោងលើប្រការ៧ នៃប្រកាសលេខ ៥៧៣ សហវ.ប្រក.អពដ ចុះថ្ងៃទី១៩ ខកញ្ញា ឆ្នាំ២០២៤ ស្តីពីពន្ធលើដីធ្លីមិនបានប្រើប្រាស់ បានចែងថា ពន្ធលើដីធ្លីមិនបានប្រើប្រាស់ ត្រូវបានលើកលែងដូចខាងក្រោម៖

* ១៖ ដីធ្លីមិនបានប្រើប្រាស់ ដែលមានផ្ទៃក្រឡាតិចជាង ឬស្មើ៥ហិកតា សម្រាប់ដីមួយកន្លែង។

* ២៖ ដីធ្លីមិនបានប្រើប្រាស់ ដែលមានផ្ទៃក្រឡាលើសពី៥ ហិកតា ត្រូវបានលើកលែងពន្ធលើដីធ្លី មិនបានប្រើប្រាស់ស្របតាមលក្ខខណ្ឌណាមួយដូចខាងក្រោម៖

ក៖ ដីកសិកម្មកំពុងបង្កបង្កើនផល ដោយមានការបញ្ជាក់ពីគណៈកម្មការ ឬអនុគណៈកម្មការវាយតម្លៃដីសម្រាប់ពន្ធ លើដីធ្លីមិនបានប្រើប្រាស់។
ខ៖ ដីកំពុងបម្រើសកម្មភាពសេដ្ឋកិច្ច របស់រូបវន្តបុគ្គល ឬនីតិបុគ្គលដែលបានចុះបញ្ជីពន្ធដារ នៅរដ្ឋបាលសារពើពន្ធ។
គ៖ ដីមានសំណង់ ឬគ្មានសំណង់ស្ថិតក្រោមកិច្ចសន្យាជួល។
ឃ៖ ដីដែលជាកម្មសិទ្ធិរបស់រាជរដ្ឋាភិបាល ឬស្ថាប័នរាជរដ្ឋាភិបាល។
ង៖ ដីដែលជាកម្មសិទ្ធិរបស់សហគមន៍។
ច៖ ដីសម្បទានសេដ្ឋកិច្ច ដែលជួលពីរដ្ឋសម្រាប់ប្រើប្រាស់ជាសកម្មភាពសេដ្ឋកិច្ចផ្សេងៗ។
ឆ៖ ដីជាកម្មសិទ្ធិរបស់រដ្ឋ ដែលបានជួលទៅឱ្យនីតិបុគ្គល ឬរូបវន្តបុគ្គលណាមួយ សម្រាប់ប្រើប្រាស់ជាសកម្មភាពសេដ្ឋកិច្ចផ្សេងៗ តាមកិច្ចសន្យា ឬកិច្ចព្រមព្រៀងរវាងភាគីទាំងពីរ។
ជ៖ ដីដែលស្ថិតនៅក្នុងតំបន់សេដ្ឋកិច្ចពិសេស ដែលបម្រើផ្ទាល់ដល់សកម្មភាពកសិកម្ម ឧស្សាហកម្ម និងសេវាកម្ម។
ឈ៖ ដីដែលត្រូវបានចុះបញ្ជីជាទ្រព្យសម្បត្តិរបស់សហគ្រាសក្នុងវិស័យអប់រំ សិក្សាធិការ និងបណ្តុះបណ្តាល វិជ្ជាជីវៈសម្រាប់គោលដៅ បម្រើការងារ ក្នុងវិស័យទាំងនេះ។

ក្នុងករណីដែលដីនេះ ត្រូវបានលក់ ឬមិនត្រូវបានប្រើប្រាស់តាមគោលដៅខាងលើ ត្រូវបំពេញ កាតព្វកិច្ចសារពើពន្ធស្របតាមច្បាប់ និងលិខិតបទដ្ឋានគតិយុត្តស្តីពីពន្ធដារជាធរមាន៕