តំបន់សេដ្ឋកិច្ចពិសេសទាំងពីររបស់អ្នកឧកញ៉ា គិត ម៉េង បង្ហាញកំណត់ត្រាកំណើនដ៏រឹងមាំលើឱកាសការងារ និងការនាំចេញ, កម្មករកើនដល់ជិត ៦ម៉ឺននាក់ ការនាំចេញកើនដល់ជាង ៨០០លានដុល្លារ នៅ៤ខែដំបូងឆ្នាំនេះ
22-05-2026 09:02
(ភ្នំពេញ)៖ ក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ដែលជាអ្នកអភិវឌ្ឍ និងប្រតិបត្តិករនៃតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ (RGPPSEZ) និងតំបន់សេដ្ឋកិច្ចពិសេស រ៉ូយ៉ាល់ គ្រុប កណ្ដាល (RGKSEZ) នៅតែបន្តបង្ហាញពីសន្ទុះកំណើនដ៏ខ្លាំងក្លា ដោយបានរួមចំណែកដល់ការអភិវឌ្ឍវិស័យឧស្សាហកម្ម ការបង្កើតការងារ និងបង្កើនការនាំចេញរបស់ប្រទេសកម្ពុជា។
គិតត្រឹមខែមេសា ឆ្នាំ២០២៦ ចំនួនបុគ្គលិកកម្មករសរុប ដែលកំពុងបម្រើការងារនៅក្នុងតំបន់ទាំងពី RGPPSEZ និង RGKSEZ បានកើនឡើងដល់ ៥៨ ៥៣២ នាក់ ដែលតំណាងឱ្យការកើនឡើងប្រមាណ ១៥.៣% បើធៀបនឹងចំនួនបុគ្គលិកកម្មករ៥០,៧៤៦ នាក់ ដែលបានកត់ត្រាក្នុងខែមេសា ឆ្នាំ២០២៥ កន្លងទៅ។
កំណើនដ៏មានស្ថិរភាពនេះ ឆ្លុះបញ្ចាំងពីទំនុកចិត្តឥតថមថយរបស់អ្នកវិនិយោគទាំងឡាយ មកលើប្រទេសកម្ពុជា និងការពង្រីកប្រតិបត្តិការនៃសហគ្រាសនានា នៅក្នុងតំបន់សេដ្ឋកិច្ចពិសេសទាំងពីរនេះ។
សកម្មភាពនាំចេញពីក្នុងតំបន់សេដ្ឋកិច្ចពិសេសទាំងពីរ ក៏បានបង្ហាញពីកំណើនដ៏វិជ្ជមានផងដែរ ក្នុងរយៈពេល ៤ខែដំបូងនៃឆ្នាំ២០២៦នេះ។ ការនាំចេញសរុបចាប់ពីខែមករា ដល់ខែមេសា ឆ្នាំ២០២៦ មានទំហំទឹកប្រាក់រហូតដល់ទៅ ៨០៩.០២លានដុល្លារអាមេរិក កើនឡើងពីចំនួន ៥៧៩.៨៨ លានដុល្លារអាមេរិក ដែលបានកត់ត្រាក្នុងរយៈពេលដូចគ្នាកាលពីឆ្នាំ២០២៥ ដែលតួលេខនេះ បង្ហាញពីកំណើនប្រមាណ ៣៩.៥%។
លទ្ធផលវិជ្ជមាននេះបង្ហាញពីភាពធន់ និងសមត្ថភាពប្រកួតប្រជែងរបស់វិនិយោគិនអ្នកផលិត ដែលកំពុងដំណើរការនៅក្នុងតំបន់ទាំងពីរ ជាពិសេសចំពេលដែលមានការប្រឈមនឹងឧបសគ្គ នៃបញ្ហាសេដ្ឋកិច្ចក្នុងតំបន់ និងសកលលោកនាពេលបច្ចុប្បន្ន។
សមិទ្ធផលនេះ អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន រ៉ូយ៉ាល់ គ្រុប (Royal Group of Companies) និងក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក បានលើកឡើងថា «កំណើនជាបន្តបន្ទាប់នៃតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និង រ៉ូយ៉ាល់ គ្រុប កណ្ដាល ឆ្លុះបញ្ចាំងពីទំនុកចិត្តយ៉ាងមុតមាំរបស់វិនិយោគិន ចំពោះអនាគតសេដ្ឋកិច្ចរបស់កម្ពុជា និងការប្ដេជ្ញាចិត្តរបស់ភាគីពាក់ព័ន្ធទាំងអស់ ក្នុងការធ្វើការរួមគ្នា ដើម្បីពង្រឹងប្រព័ន្ធអេកូឡូស៊ីឧស្សាហកម្មរបស់ប្រទេស យើងខ្ញុំនៅតែបន្តប្ដេជ្ញាចិត្តក្នុងការគាំទ្រដល់ការវិនិយោគ ប្រកបដោយនិរន្តរភាព ការបង្កើតការងារ និងការអភិវឌ្ឍសេដ្ឋកិច្ចរយៈពេលវែងសម្រាប់ប្រទេសកម្ពុជា»។
អ្នកឧកញ៉ា គិត ម៉េង បន្ថែមថា «យើងខ្ញុំក៏សូមសម្តែងនូវការដឹងគុណដ៏ជ្រាលជ្រៅបំផុត ចំពោះការគាំទ្រជារៀងរហូតមកពីសំណាក់រាជរដ្ឋាភិបាលកម្ពុជាក្រោមការណែនាំ និងដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណត នាយករដ្ឋមន្ត្រីនៃព្រះរាជាណាចក្រកម្ពុជា។ គោលនយោបាយគាំទ្រអាជីវកម្មរបស់រាជរដ្ឋាភិបាល គំនិតផ្តួចផ្តើមអភិវឌ្ឍន៍ហេដ្ឋារចនាសម្ព័ន្ធ និងការប្ដេជ្ញាចិត្ត ក្នុងការកែលម្អបរិយាកាសវិនិយោគ បន្តដើរតួនាទីយ៉ាងសំខាន់ក្នុងការទាក់ទាញការវិនិយោគផ្ទាល់ពីបរទេស និងជំរុញកំណើនឧស្សាហកម្ម»។
លោកសង្កត់ធ្ងន់ទៀតថា «ក្នុងនាមជាអ្នកអភិវឌ្ឍតំបន់សេដ្ឋកិច្ចពិសេសឈានមុខគេមួយនៅកម្ពុជា យើងខ្ញុំនៅតែបន្តប្តេជ្ញាចិត្ត ក្នុងការផ្តល់ជូននូវហេដ្ឋារចនាសម្ព័ន្ធ និងសេវាកម្មដែលមានគុណភាពខ្ពស់ ដល់វិនិយោគិនទាំងឡាយ ព្រមទាំងរួមចំណែកដល់គោលដៅអភិវឌ្ឍន៍សេដ្ឋកិច្ច និងសង្គមកាន់តែទូលំទូលាយរបស់ព្រះរាជាណាចក្រកម្ពុជា»៕
