(ភ្នំពេញ)៖ ធនាគារជាតិនៃកម្ពុជា និងធនាគារកណ្តាលរវ៉ាន់ដា បានប្រកាសពីកិច្ចសហប្រតិបត្តិការ លើប្រព័ន្ធទូទាត់ឆ្លងដែន រវាងប្រទេសកម្ពុជា និងប្រទេសរវ៉ាន់ដា ដើម្បីពង្រឹងទំនាក់ទំនងសេដ្ឋកិច្ច ពាណិជ្ជកម្ម និងទេសចរណ៍រវាងប្រទេសទាំង២។

លើប្រព័ន្ធទូទាត់ឆ្លងដែន រវាងប្រទេសកម្ពុជា និងប្រទេសរវ៉ាន់ដា រៀបចំឡើងក្នុងព្រឹត្តិការណ៍សន្និសីទ ថ្នាក់ទេសាភិបាលធនាគារកណ្តាលនៃ ប្រទេសនិយាយភាសាបារាំងលើកទី២៨ ក្រោមមូលបទ «ស្វយ័តភាពធនាគារកណ្តាលចំពោះមុខការរំពឹងទុករបស់រដ្ឋ និងសាធារណជន» ចាប់ពីថ្ងៃទី២៨-៣១ ខែឧសភា ឆ្នាំ២០២៦ នៅរាជធានីភ្នំពេញ ប្រទេសកម្ពុជា។

កិច្ចសហការនេះបង្ហាញពី ការប្តេជ្ញាចិត្តរួមគ្នារវាងធនាគារកណ្តាលទាំងពីរ ក្នុងការធ្វើទំនើបកម្ម ប្រព័ន្ធទូទាត់សងប្រាក់ និងការលើកកម្ពស់ការតភ្ជាប់ផ្នែកហិរញ្ញវត្ថុ ឱ្យកាន់តែទូលំទូលាយ ដើម្បីជួយ ពង្រឹងទំនាក់ទំនងសេដ្ឋកិច្ច ពាណិជ្ជកម្ម និងទេសចរណ៍ រវាងប្រទេសកម្ពុជា និងប្រទេសរវ៉ាន់ដា។

គំនិតផ្តួចផ្តើមនេះក៏គាំទ្រដំណើរការ សមាហរណកម្មហិរញ្ញវត្ថុក្នុងតំបន់ និងអន្តរជាតិផងដែរ តាមរយៈការរួមចំណែកលើកកម្ពស់លទ្ធភាព និងប្រសិទ្ធភាពនៃការប្រើប្រាស់សេវាទូទាត់អេឡិចត្រូនិក សម្រាប់ប្រជាពលរដ្ឋនៃប្រទេសទាំងពីរ ដែលជាការទាញយកផលប្រយោជន៍ពី ការរីកចម្រើនផ្នែកបច្ចេកវិទ្យា និងនវានុវត្តន៍ឌីជីថល ក្នុងក្របខ័ណ្ឌភាពជាដៃគូនេះ។

កិច្ចសហប្រតិបត្តិការនេះ នឹងត្រូវបានអនុវត្តក្នុងក្របខ័ណ្ឌនៃអនុស្សរណៈយោគយល់ស្តីពី កិច្ចសហប្រតិបត្តិការ ក្នុងផ្នែកផ្សេងៗនៃការអភិវឌ្ឍវិស័យហិរញ្ញវត្ថុ រវាងធនាគារជាតិនៃកម្ពុជា និងធនាគារកណ្តាលរវ៉ាន់ដា ដែលត្រូវបានចុះហត្ថលេខាកាលពីថ្ងៃទី១៤ ខែមេសា ឆ្នាំ២០២៣ នៅរដ្ឋធានីវ៉ាស៊ីនតោនឌីស៊ី សហរដ្ឋអាមេរិក។

អនុស្សរណៈយោគយល់គ្នានេះ គឺជាមូលដ្ឋានក្របខ័ណ្ឌសម្រាប់ពង្រឹងកិច្ចសហប្រតិបត្តិការ តាមរយៈការផ្លាស់ប្តូរចំណេះដឹង និងបទ ពិសោធន៍ គោលដៅជំរុញការអភិវឌ្ឍវិស័យហិរញ្ញវត្ថុនៃប្រទេសទាំងពីរ៕