(ភ្នំពេញ)៖ លោក អឿ សុធារ័ត្ន ប្រធាននាយកប្រតិបត្តិ CBC បានលើកឡើងថា ពេលអតិថិជនបង់ផ្ដាច់ឥណទាន នៅគ្រឹះស្ថានហិរញ្ញវត្ថុ ទាល់តែ១០ ទៅ១៥ថ្ងៃ ទើបអាចដកប្លង់មកវិញបាន បើសិនជាគ្រឹះស្ថានពន្យារពេល អតិថិជនអាចប្ដឹងបាន ក្រុមការងារសមាគមនឹងដោះស្រាយនូវពាក្យបណ្ដឹងរបស់អតិថិជន។

លោក អឿ សុធារ័ត្ន បានថ្លែងឲ្យដឹងថា ឥណទានដែលមានសុវត្ថិភាព ជាឥណទានដែលមានការទទួលខុសត្រូវទាំងអ្នកប្រើប្រាស់ និងអ្នកផ្ដល់ឥណទាន។ ក្នុងគ្រឹះស្ថានធនាគារមានក្រមប្រតិបត្តិ ដោយទទួលស្គាល់ដោយធនាគារជាតិនៃកម្ពុជា ដោយបានផ្ដោតសំខាន់លើការដកប្លង់របស់អតិថិជន ដោយអនុញ្ញាតឲ្យធនាគារ គ្រឹស្ថានមីក្រូហិរញ្ញវត្ថុទុកប្លង់អតិថិជនត្រឹមចន្លោះ១០-១៥ថ្ងៃប៉ុណ្ណោះបន្ទាប់ពីអតិថិជនបង់ប្រាក់ផ្ដាច់ជូនធនាគារ ដោយមិនអនុញ្ញាតឲ្យធនាគារ ឬគ្រឹះស្ថានមីក្រូហិរញ្ញវត្ថុទុកប្លង់របស់អតិថិជនឡើយ។

លោកបានបន្ដថា ក្នុងករណីមានការពន្យារពេល មិនចង់ឲ្យអតិថិជនដកប្លង់មកវិញនោះទេ អតិថិជនមានសិទ្ធិប្ដឹងតាមរយៈលេខទូរស័ព្ទ ដែលមានស្រាប់ក្នុងបញ្ជីអតិថិជនបង់ប្រាក់ (Hot Line) នោះក្រុមការងារសមាគមនឹងធ្វើការដោះស្រាយបញ្ហាទាំងនេះជូនភ្លាម៕