(ភ្នំពេញ)៖ នៅក្នុងត្រីមាសទី១ ឆ្នាំ២០២៦នេះ រាជរដ្ឋាភិបាលបានបោះផ្សាយលក់មូលបត្ររដ្ឋ ក្នុងទំហំទឹកប្រាក់សរុបប្រមាណ ១.៤៨ទ្រីលានរៀល ស្មើនឹងប្រមាណ ៣៦៩.១៧ លានដុល្លារក្នុងនោះ មូលបត្ររដ្ឋដែលបោះផ្សាយជាប្រាក់រៀលមានចំនួន ១៩៨ប៊ីលានរៀល ខណៈមូលបត្ររដ្ឋជាប្រាក់ដុល្លារមានចំនួន ៣១៩.៦៨ លានដុល្លារ។ នេះបើតាមព្រឹត្តិបត្រស្ថិតិបំណុលសាធារណៈកម្ពុជា ត្រឹម​ដំណាច់ត្រីមាសទី១ ឆ្នាំ២០២៦។

ការបោះផ្សាយមូលបត្ររដ្ឋនេះ មានទំហំស្មើនឹងប្រមាណ ៧០% នៃទំហំសរុបដែលច្បាប់អនុញ្ញាតប្រមាណ ២ ១១៤ ប៊ីលានរៀល (ជាង ៥០០លានដុល្លារ) ដើម្បីធ្វើហិរញ្ញប្បទានគាំទ្រគម្រោងវិនិយោគសាធារណៈ, ការអនុវត្តវិធានការគោលនយោបាយគន្លឹះរបស់រាជរដ្ឋាភិបាល និងរក្សាតុល្យភាពថវិកាជាតិ សំដៅលើកស្ទួយកំណើន និងផលិតភាពសេដ្ឋកិច្ចជាតិ។

លោក មាស សុខសេនសាន រដ្ឋលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានគត់សម្គាល់ឃើញថា ការបោះផ្សាយលក់មូលបត្ររដ្ឋនៅឆ្នាំ២០២៦ មានស្ទុះខ្លាំង ត្រឹមរយៈពេល៣ខែដំបូង អាចសម្រេចបានរហូតដល់ ៧០%នៃច្បាប់អនុញ្ញាត។

លោកថា «គោលបំណងរបស់យើង [រដ្ឋាភិបាល] ចង់បង្វែរមកប្រើប្រាស់ហិរញ្ញប្បទាននៅក្នុងស្រុកច្រើន ហើយការបោះផ្សាយលក់មូលបត្របំណុលនេះ បានជួយសម្រាលបន្ទុករបស់រាជរដ្ឋាភិបាល អនុញ្ញាតឱ្យរាជរដ្ឋាភិបាលបង្កើនការវិនិយោគទៅលើវិស័យសង្គមកិច្ច ក៏ដូចជាវិស័យការពារជាតិ ដែលជាវិស័យអាទិភាព»។

សូមជម្រាបថា ការបោះផ្សាយលក់មូលបត្ររដ្ឋ ធ្វើឡើងតាមរយៈការដេញថ្លៃ នៅលើថ្នាលរបស់ធនាគារជាតិនៃកម្ពុជា៕