(ភ្នំពេញ)៖ នៅក្នុងត្រីមាសទី១ ឆ្នាំ២០២៦នេះ រាជរដ្ឋាភិបាលបានចុះកិច្ចព្រមព្រៀងឥណទានសម្បទានថ្មី ជាមួយដៃគូអភិវឌ្ឍនានាសរុប ៩១.៩២លានដុល្លារអាម៉េរិក។ នេះបើតាមព្រឹត្ដិបត្រ ស្ថិតិបំណុលសាធារណៈកម្ពុជា ដែលចេញដោយក្រសួងសេដ្ឋកិច្ច និងហិរញ្ញវត្ថ។

បើតាមព្រឹត្ដិបត្រស្ថិតិបំណុលសាធារណៈកម្ពុជា, ចំនួនជាង ៩១លានដុល្លារនេះ សមមូលនឹង៦៧.៣២លានអេសដេអ៊ែ ស្មើនឹងប្រមាណ៣% នៃពិតានដែលច្បាប់អនុញ្ញាត (២ ២៥០លានអេសដេអ៊ែ) ក្នុងនោះក្របខ័ណ្ឌទ្វេភាគី៧៥% និងក្របខ័ណ្ឌពហុភាគី២៥%។

ដោយឡែក, បើធៀបនឹងត្រីមាសទី១ ឆ្នាំ២០២៥ ការចុះកិច្ចព្រមព្រៀងឥណទានសម្បទានថ្មី ក្នុងត្រីមាសទី១ ឆ្នាំ២០២៦នេះ មានកំណើនប្រមាណ១៧%។ ឥណទានទាំងនេះ សុទ្ធសឹងជាឥណទាន ដែលមានកម្រិតសម្បទានខ្ពស់ ដោយមានធាតុអំណោយជាមធ្យមប្រមាណ៣២.៨០%។

គោលដៅនៃការចុះកិច្ចព្រមព្រៀងឥណទានថ្មីទាំងនេះ គឺសម្រាប់បំពេញតម្រូវការហិរញ្ញប្បទាន ក្នុងវិស័យអាទិភាពរបស់រាជរដ្ឋាភិបាល សំដៅរួមចំណែកទ្រទ្រង់ចីរភាពនៃកំណើន រយៈពេលវែង និងបង្កើនផលិតភាពសេដ្ឋកិច្ច ឬផលិតភាព ផលិតកម្ម។

បើគិតត្រឹមដំណាច់ត្រីមាសទី១ ឆ្នាំ២០២៦ កម្ពុជាមានសន្និធិបំណុលសាធារណៈសរុបចំនួន១៣.៣០ប៊ីលានដុល្លារអាម៉េរិក ក្នុងនោះ៖ ៩៦% ត្រូវនឹងប្រមាណ១២.៧០ប៊ីលាន ដុល្លារអាម៉េរិក ជាបំណុលសាធារណៈក្រៅប្រទេស (ក្របខ័ណ្ឌទ្វេភាគីប្រមាណ ៥៩% និងក្របខ័ណ្ឌ ពហុភាគីប្រមាណ ៤១%) និង៤% ត្រូវនឹងប្រមាណ ៥៩៦.០៣ លានដុល្លារអាម៉េរិក ជាបំណុលសាធារណៈក្នុងប្រទេស។

ជាមួយមួយគ្នានេះ នៅត្រីមាសទី១នេះ រាជរដ្ឋាភិបាល បានទូទាត់សេវាបំណុលសរុបចំនួន ២៨០.៦២លានដុល្លារអាម៉េរិក រួមមាន៖
១៖ ក្របខ័ណ្ឌបំណុលសាធារណៈក្រៅប្រទេស មានចំនួនប្រមាណ ២៥៧.៥៣លានដុល្លារអាម៉េរិក ក្នុងនោះ៖ ប្រាក់ដើម ២១៣.៧៧លានដុល្លារអាម៉េរិក និងការប្រាក់ និងកម្រៃផ្សេងៗ ៤៣.៧៦ លានដុល្លារអាម៉េរិក,

និង២៖ ក្របខ័ណ្ឌបំណុលសាធារណៈក្នុងប្រទេស មានចំនួនប្រមាណ២៣.០៩លានដុល្លារអាម៉េរិក ក្នុងនោះ៖ ប្រាក់ដើម ២០,៤១ លានដុល្លារអាម៉េរិក និងការប្រាក់ ២.៦៨ លានដុល្លារអាម៉េរិក។

បើធៀបនឹងត្រីមាសទី១ ឆ្នាំ២០២៥ ការទូទាត់សេវាបំណុលសរុបក្នុងត្រីមាសទី១ ឆ្នាំ២០២៦នេះ មានកំណើនប្រមាណ ១៨%៕