(ភ្នំពេញ)៖ លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា (អគរ) បានលើកឡើងថា ការធ្វើជាម្ចាស់ផ្ទះ នៃកិច្ចប្រជុំអគ្គនាយកគយអាស៊ាន លើកទី៣៥ ដែលកម្ពុជាធ្វើជាម្ចាស់ផ្ទះ គឺជាការលើកស្ទួយមុខមាត់កម្ពុជា នៅក្នុងតំបន់អាស៊ាន និងឆាកអន្ដរជាតិ។

ការលើកឡើងបែបនេះ ធ្វើឡើងក្នុងឱកាសដែលបណ្ឌិត គុណ ញឹម ធ្វើសន្និសីទសារព័ត៌មាន បន្ទាប់បញ្ចប់កិច្ចប្រជុំអគ្គនាយកគយអាស៊ាន លើកទី៣៥ ដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី២ ដល់ថ្ងៃទី៤ ខែមិថុនា ឆ្នាំ២០២៦ នៅសណ្ឋាគារ Raffles Le Royal រាជធានីភ្នំពេញ។

បណ្ឌិត គុណ ញឹម បានបញ្ជាក់យ៉ាងដូច្នេះថា «ការធ្វើជាម្ចាស់ផ្ទះ ក្នុងនាមជាសមាជិកអាស៊ាន កិច្ចប្រជុំអគ្គនាយកគយអាស៊ាន គឺបានផ្ដល់អត្ថប្រយោជន៍ច្រើនដល់កម្ពុជា ដែលជាការលើកស្ទួយមុខមាត់កម្ពុជា នៅក្នុងអាស៊ាន ក៏ដូចនៅក្នុងឆាកអន្ដរជាតិ»។

បន្ថែមពីនោះទៀត បណ្ឌិត គុណ ញឹម បានលើកឡើងថា ការរៀបចំកិច្ចប្រជុំអគ្គនាយកគយអាស៊ាននេះ ដោយមានកិច្ចប្រជុំពិគ្រោះយោបល់ ជាមួយនឹងសមាគមធុរកិច្ចអ៊ឺរ៉ុប, សហរដ្ឋអាមេរិក ហើយនឹងសមាគមធុរកិច្ចអាមេរិក ព្រមទាំងក្រុមហ៊ុនធំៗសំខាន់ៗ ដែលមកធ្វើការវិនិយោគ។

បើតាមលោកបណ្ឌិត គុណ ញឹម, នេះជាលើកទី៣ ដែលអគ្គនាយកដ្ឋានគយ និងរដ្ឋាករកម្ពុជា បានទទួលធ្វើជាម្ចាស់ផ្ទះ កិច្ចប្រជុំអគ្គនាយកគយអាស៊ាន ចាប់តាំងពីកម្ពុជា បានចូលជាសមាជិកអាស៊ាន ក្នុងឆ្នាំ១៩៩៩ ដោយការទទួលធ្វើជាម្ចាស់ផ្ទះលើកទី១ នៅឆ្នាំ២០០៦ និងលើកទី២ នៅឆ្នាំ២០១៦។

សូមជម្រាបថា​ កិច្ចប្រជុំអគ្គនាយកគយអាស៊ាន លើកទី៣៥ ដែលកម្ពុជាធ្វើជាម្ចាស់ផ្ទះនេះ មានការចូលរួមគណៈប្រតិភូរដ្ឋបាលគយ នៃប្រទេសសមាជិកអាស៊ានទាំងអស់ រួមទាំងគណៈប្រតិភូរដ្ឋបាលគយ នៃប្រទេសទីម័រឡេស្តេ ដែលជាសមាជិកអាស៊ានថ្មីទី១១ របស់អាស៊ាន និងតំណាងលេខាធិការដ្ឋានអាស៊ាន៕