(ភ្នំពេញ)៖ លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា (អគរ) បានបញ្ជាក់ឲ្យដឹងថា ការមិនមកចូលរួមដោយផ្ទាល់ ពីរដ្ឋបាលគយថៃ ដោយចូលរួមតាមរយៈអនឡាញ ក្នុងកិច្ចប្រជុំអគ្គនាយកគយអាស៊ាន ដែលកម្ពុជាធ្វើជាម្ចាស់ផ្ទះ គឺមិនមានបញ្ហាអ្វី សម្រាប់កិច្ចប្រជុំនោះឡើយ។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែលបណ្ឌិត គុណ ញឹម ធ្វើសន្និសីទសារព័ត៌មាន បន្ទាប់បញ្ចប់កិច្ចប្រជុំអគ្គនាយកគយអាស៊ាន លើកទី៣៥ ដែលកម្ពុជាធ្វើជាម្ចាស់ផ្ទះ ចាប់ពីថ្ងៃទី២ ដល់ថ្ងៃទី៤ ខែមិថុនា ឆ្នាំ២០២៦ នៅសណ្ឋាគារ Raffles Le Royal រាជធានីភ្នំពេញ។

បណ្ឌិត គុណ ញឹម បានបញ្ជាក់យ៉ាងដូច្នេះថា «ចំពោះអវត្ដមានរបស់តំណាងរដ្ឋបាលគយថៃ ដែលមិនមកចូលប្រជុំផ្ទាល់នៅទីនេះ (កម្ពុជា) គឺមិនមានអ្វីជាឧបសគ្គដល់កិច្ចដំណើរការ របស់កិច្ចប្រជុំរបស់យើងនោះទេ គឺកិច្ចប្រជុំបានដំណើរការទៅដោយរលួន ដោយគយថៃ​ ចូលរួមប្រជុំតាមរយៈអនឡាញ Zoom»។

បន្ថែមពីនោះទៀត បណ្ឌិត គុណ ញឹម បានលើកឡើងថា មិនមានបញ្ហាអ្វីនោះទេ ចំពោះការអវត្ដមាន នៃរដ្ឋបាលប្រទេសមួយ ដែលធ្វើឲ្យមានការរាំងស្ទះដល់ដំណើរការ នៃកិច្ចប្រជុំនោះទេ។

សូមជម្រាបថា​ កិច្ចប្រជុំអគ្គនាយកគយអាស៊ាន លើកទី៣៥ ដែលកម្ពុជាធ្វើជាម្ចាស់ផ្ទះនេះ មានការចូលរួមគណៈប្រតិភូរដ្ឋបាលគយ នៃប្រទេសសមាជិកអាស៊ានទាំងអស់ រួមទាំងគណៈប្រតិភូរដ្ឋបាលគយ នៃប្រទេសទីម័រឡេស្តេ ដែលជាសមាជិកអាស៊ានថ្មីទី១១ របស់អាស៊ាន និងតំណាងលេខាធិការដ្ឋានអាស៊ាន។

កិច្ចប្រជុំអគ្គនាយកគយអាស៊ាន លើកទី៣៥ បានបញ្ចប់ដោយជោគជ័យលើសពីការរំពឹងទុក និងបានទទួលការកោតសរសើរ ពីរដ្ឋបាលគយអាស៊ាន រដ្ឋបាលគយដៃគូអាស៊ាន និងផ្នែកឯកជនប្រចាំតំបន់អាស៊ាន។

នេះជាលើកទី៣ ដែលអគ្គនាយកដ្ឋានគយ និងរដ្ឋាករកម្ពុជា បានទទួលធ្វើជាម្ចាស់ផ្ទះកិច្ចប្រជុំអគ្គនាយកគយអាស៊ាន ចាប់តាំងពីកម្ពុជាបានចូលជាសមាជិកអាស៊ាន ក្នុងឆ្នាំ១៩៩៩ ដោយការទទួលធ្វើជាម្ចាស់ផ្ទះលើកទី១ នៅឆ្នាំ២០០៦ និងលើកទី២ នៅឆ្នាំ២០១៦៕