(មណ្ឌលគិរី)៖ គីរីកាហ្វេ (Kiri Coffee) ជាក្រុមហ៊ុនប្រេនកាហ្វេរបស់កូនខ្មែរ បានចាក់បញ្ចូលទុនជិត៧០ម៉ឺនដុល្លារ ប្រមូលទិញគ្រាប់កាហ្វេពីបងប្អូនកសិករជាជនជាតិដើមភាគតិច នៅក្នុងឃុំប៊ូស្រា ខេត្តមណ្ឌលគិរី បានជិត ៧០០តោន ដើម្បីបម្រើដល់ទីផ្សារកាហ្វេនៅកម្ពុជា។

នេះបើតាមការបញ្ជាក់ឱ្យដឹងពីលោក ជិន ជ័យាបុត្រ ប្រធានក្រុមហ៊ុន គីរីកាហ្វេ (Kiri Coffee) ក្នុងឱកាសជួបកិច្ចប្រជុំពិភាក្សាការងារ ជាមួយបងប្អូនតំណាងសហគមន៍ជនជាតិដើមភាគតិច មកពីឃុំប៊ូស្រា ស្រុកពេជ្រាដា ខេត្តមណ្ឌលគិរី ដើម្បីស្វែងរកដំណោះស្រាយ និងជំរុញខ្សែច្រវាក់ផលិតកម្មកាហ្វេឱ្យកាន់តែមាននិរន្តរភាព នាពេលថ្មីៗនេះ។

លោកបញ្ជាក់ថា នៅក្នុងរដូវប្រមូលផលកន្លងទៅថ្មីៗនេះ ក្រុមហ៊ុន គីរីកាហ្វេ បានចុះទទួលទិញគ្រាប់កាហ្វេពីបងប្អូនកសិករជាជនជាតិដើមភាគតិច នៅក្នុងឃុំប៊ូស្រា សរុបជិត ៧០០ តោន ដែលគិតជាទំហំទឹកប្រាក់នៃការជួយជ្រោមជ្រែងសេដ្ឋកិច្ចសហគមន៍មានចំនួនរហូតដល់ជិត ៧០ម៉ឺនដុល្លារអាមេរិក។

លោកបន្ថែមថា «ក្រោមការចង្អុលបង្ហាញ និងយកចិត្តទុកដាក់ពីឯកឧត្តមបណ្ឌិត កៅ ថាច ប្រធានសមាគមបណ្តាញកសិករតេជោ, ក្រុមហ៊ុន គីរីកាហ្វេ នឹងបន្តឈរជើងជាមួយបងប្អូន ដោយប្តេជ្ញាចិត្តបន្តទិញកាហ្វេពីបងប្អូនជនជាតិដើមភាគតិច ឱ្យអស់ពីលទ្ធភាព ក្នុងតម្លៃទីផ្សារ ដើម្បីឱ្យកាហ្វេមណ្ឌលគិរី អាចបន្តដំណើរទៅមុខប្រកបដោយមោទនភាព និងជួយលើកកម្ពស់ជីវភាពបងប្អូនកសិករយើង ឱ្យកាន់តែធូរធារ និងរឹងមាំ»។

ក្នុងជំនួបនោះ ភាគីទាំងពីរបានពិភាក្សាយ៉ាងស៊ីជម្រៅ លើការគាំទ្រផ្នែកឥណទានកសិកម្មសម្រាប់ពង្រីកការដាំដុះកាហ្វេ រួមមានការផ្គត់ផ្គង់ ជី, កូនពូជ, ថ្នាំកសិកម្ម និងសម្ភារៈបច្ចេកទេសផ្សេងៗ ដើម្បីជួយបងប្អូនមានលទ្ធភាពពង្រីកផ្ទៃដីដាំដុះ និងបង្កើនទិន្នផល។

ក្រុមហ៊ុនធានាបន្តចុះប្រមូលទិញគ្រាប់កាហ្វេពីបងប្អូនកសិករ ក្នុងរដូវប្រមូលផលខាងមុខ ទៅតាមតម្លៃទីផ្សារជាក់ស្តែង ដើម្បីធានាស្ថិរភាពប្រាក់ចំណូល និងផ្តល់ទំនុកចិត្តខ្ពស់ជូនសហគមន៍ផងដែរ។

កិច្ចប្រជុំនេះបានបញ្ចប់ទៅក្រោមបរិយាកាសរីករាយ យោគយល់ និងទទួលបានផ្លែផ្កាគួរជាទីមោទនៈ ដោយបងប្អូនតំណាងសហគមន៍ បានសម្តែងនូវក្តីត្រេកអរ និងអំណរគុណយ៉ាងជ្រាលជ្រៅ ចំពោះការយកចិត្តទុកដាក់ពីសំណាក់ថ្នាក់ដឹកនាំសមាគម ក៏ដូចជាក្រុមហ៊ុន គីរីកាហ្វេ៕