(ភ្នំពេញ)៖ លោក ស៉ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល បានបញ្ជាក់ឲ្យដឹងថា ការអនុម័តផ្តល់ហិរញ្ញប្បទានចំនួន ១០០លានដុល្លារ ពីសាជីវកម្មហិរញ្ញវត្ថុ អភិវឌ្ឍន៍អន្តរជាតិ (DFC) របស់អាមេរិក គាំទ្រការពង្រីក «អាកាសយានដ្ឋានអន្តរជាតិតេជោ» ឆ្លុះបញ្ចាំងពីទំនុកចិត្ត មកលើសក្តានុពលរយៈពេលវែងរបស់គម្រោងកម្ពុជា។

ថ្លែងប្រាប់បណ្ដាញព័ត៌មាន Fresh News លោក ស៉ីន ចាន់សិរីវុត្ថា បានឲ្យដឹងថា ព័ត៌មានស្តីពីការអនុម័តកញ្ចប់វិនិយោគសកលប្រមាណ ២.៥ ពាន់លានដុល្លារអាមេរិក របស់ U.S. International Development Finance Corporation (DFC) គឺជាព័ត៌មានវិជ្ជមាន និងបង្ហាញពីការបន្តគាំទ្រគម្រោងហេដ្ឋារចនាសម្ព័ន្ធយុទ្ធសាស្ត្រនៅក្នុងតំបន់ និងសកលលោក។

លោកបន្ដថា គិតមកដល់ពេលនេះ មានការបញ្ជាក់ជាផ្លូវការពី U.S. International Development Finance Corporation (DFC) ថា ក្រុមប្រឹក្សាភិបាល DFC បានអនុម័តការវិនិយោគ ជាយុទ្ធសាស្ត្រដែលរួមបញ្ចូលការគាំទ្រ refinancing សម្រាប់អាកាសយានដ្ឋានអន្តរជាតិតេជោ នៅភ្នំពេញ។

ឯកសារ Public Information Summary របស់ DFC ក៏បានបញ្ជាក់ពីគម្រោងជាមួយ Overseas Cambodian Investment Corporation, Ltd. ក្នុងទម្រង់ Debt Financing ចំនួន ១០០ លានដុល្លារអាមេរិក សម្រាប់ការបង្វិលហិរញ្ញប្បទានដែលមានរយៈពេលខ្លី ដែលបានប្រើប្រាស់ក្នុងការសាងសង់ និងអភិវឌ្ឍន៍អាកាសយានដ្ឋាននេះ។

ទោះជាយ៉ាងណា តាមសេចក្តីប្រកាសរបស់ DFC ការអនុវត្តហិរញ្ញប្បទានជាក់ស្តែង គឺអាស្រ័យលើការបំពេញលក្ខខណ្ឌមុនការសម្រេច (Conditions Precedent) និងនីតិវិធីផ្ទៃក្នុងពាក់ព័ន្ធរបស់ DFC ស្របតាមច្បាប់ និងបទប្បញ្ញត្តិជាធរមាន។

បើតាមលោក ស៉ីន ចាន់សិរីវុត្ថា, អាកាសយានដ្ឋានអន្តរជាតិតេជោ (KTI) គឺជាគម្រោងហេដ្ឋារចនាសម្ព័ន្ធយុទ្ធសាស្ត្រដ៏សំខាន់របស់កម្ពុជា ដែលទទួលបានការគាំទ្រពី U.S. International Development Finance Corporation (DFC) សម្រាប់ការរៀបចំហិរញ្ញប្បទានឡើងវិញ (Refinancing)។ ការគាំទ្រនេះ ឆ្លុះបញ្ចាំងពីទំនុកចិត្ត លើសក្តានុពលរយៈពេលវែងរបស់គម្រោង និងការរួមចំណែកក្នុងការពង្រឹងការតភ្ជាប់ជាសកល ការទាក់ទាញវិនិយោគ និងកំណើនសេដ្ឋកិច្ចប្រកបដោយចីរភាពរបស់កម្ពុជា៕