(ភ្នំពេញ)៖ ថ្មីៗនេះ មានក្រុមអ្នកដឹកជញ្ជូន និងអ្នកនាំចេញនាំចូលទំនិញពីចិន និងវៀតណាមមកកម្ពុជា បានបង្ហោះនៅលើបណ្តាញសង្គមហ្វេសប៊ុកថា វៀតណាមបានហាមឃាត់ការនាំ​​ចេញនាំចូលទំនិញ​មិនឱ្យឆ្លងកាត់ប្រទេសវៀតណាមចូលមកកាន់ប្រទេសកម្ពុជា​ ដែលធ្វើឱ្យរាំងស្ទះទំនិញរបស់អាជីវករមកដល់កម្ពុជា តាមពេលកំណត់។

ចំពោះករណីនេះ អ្នកជំនាញក្នុងវិស័យដឹកជញ្ជូន និងភស្តុភារកម្ម បានឱ្យដឹងថា មិនមែនបណ្តាលមកពីភាគីវៀតណាមបិទច្រក ឬ​ហាមឃាត់មិនឱ្យមានការនាំចេញនាំចូលទំនិញ​ឆ្លងកាត់តាមប្រទេសវៀតណាមនោះទែ តែជាវិធានការបង្កើនការត្រួតពិនិត្យទំនិញឱ្យបានត្រឹមត្រូវ ដែលធ្វើឡើង​ទាំងភាគីវៀតណាម។

ឧកញ៉ា ស៊ិន ចន្ធី អគ្គនាយកក្រុមហ៊ុន Linehaul Express បានឱ្យដឹងថា បច្ចុប្បន្ននេះ ភាគីវៀតណាមបានបង្កើនការត្រួតពិនិត្យទំនិញរឹងតឹងជាងមុន និងបង្កើនតម្លៃសេវាបន្ថែមប្រមាណ​ពី៣០ដុល្លារ ទៅ៥០ដុល្លារ។ ដូច្នេះហើយទើបធ្វើឱ្យមានការកក់ស្ទះទំនិញនៅច្រកព្រំដែនវៀតណាម។

លោកបានបញ្ជាក់ថា «តាមការទទួលបានព័ត៌មាននោះ មកដល់ម៉ោងនេះ វៀតណាម ដំឡើងការគិតថ្លៃបន្ថែម ទៅលើការនាំចេញនាំចូល សម្រាប់ការឆ្លងកាត់ប្រទេសវៀតណាម ទៅលើកុងតឺន័រ ដែលមានតម្លៃចន្លោះពី៣០ដុល្លារ ទៅ៥០ដុល្លារបន្ថែមទៀតក្នុងមួយកុងតឺន័រ ហើយការត្រួតពិនិត្យក៏ហាក់តឹងរឹងជាងមុនបន្តិច ប៉ុន្តែមិនមែនការបិទនោះទេ។ នេះបើតាមការទទួលបានព័ត៌មានពីខាងភាគីវៀតណាម ដែលជាអ្នកដឹកជញ្ជូន និងឡូជីកស្ទីកដែលជាដៃគូ»។

លោកបានប្រាប់បន្តថា ដោយឡែកសម្រាប់ខាងកម្ពុជាវិញ រាជរដ្ឋាភិបាលបានដាក់ចេញវិធានការមុតស្រួចលើការបង្ការ បង្ក្រាបការរត់ពន្ធ ដោយពង្រឹងការត្រួតពិនិត្យរបស់អគ្គនាយកដ្ឋានគយ ដោយបានធ្វើការត្រួតពិនិត្យយ៉ាងម៉ត់ចត់ នូវការដឹកជញ្ជូនទំនិញ ទាំងនៅដើមទី នៅកណ្តាលទី និងនៅចុងទី ដើម្បីទប់ស្កាត់នូវទំនិញមួយចំនួន ដែលបាននាំចូលដោយមិនស្របច្បាប់ និងគេចវេសបង់ពន្ធ។

លោកថា ដូច្នេះហើយ ទំនិញមួយចំនួនដែលធ្លាប់គេចវេសបង់ពន្ធ មិនអាចនាំចូលមកបាន ដោយសារទំនិញទាំងអស់ តម្រូវឱ្យមានការបង់ពន្ធ ហើយការតម្រូវឱ្យបង់ពន្ធនេះ ក៏នឹងធ្វើឱ្យទំនិញទាំងនោះកើនឡើងថ្លៃជាងមុន ខណៈទំនិញដែលបានបង់ពន្ធ និងបំពេញបែបបទត្រឹមត្រូវ នៅតែអាចនាំចូលបានធម្មតា៕