(ភ្នំពេញ)៖ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានថ្លែងសារផ្ដាំផ្ញើជូនដល់ប្អូនៗ ជំនាន់ក្រោយ ចំពោះការផ្លាស់ប្ដូរការងារដោយផ្អែកលើកត្តាផ្សេងៗ ក្នុងនោះប្រសិនជាការផ្លាស់ប្ដូរក្រុមហ៊ុនរហ័សពេក ដោយសារមិនទទួលយកបរិយាកាសការងារ នោះអាចនឹងនាំឲ្យប្អូនៗមិនមានអនាគតល្អប្រសើរឡើយ។

ការលើកឡើងរបស់លោក ជា ចាន់ដារ៉ា ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «បទពិសោធន៍នៃការអភិវឌ្ឍខ្លួនរបស់លោក ជា ចាន់ដារ៉ា ផ្តើមពីសន្តិសុខ ឈានជាអ្នកដឹកនាំ រហូតក្លាយជាប្រធានសមាគមពាណិជ្ជករដឹកជញ្ជូន»។

លោក ជា ចាន់ដារ៉ា បានថ្លែងឲ្យដឹងថា ចំពោះការផ្លាស់ក្រុមហ៊ុនរហ័សពេក គឺមិនល្អប្រសើរសម្រាប់បទពិសោធន៍នៃការងារឡើយ ជាក់ស្ដែងដូចយើងដាក់ CV ពីកន្លែងមួយទៅកន្លែងមួយ គ្រាន់តែឃើញបទពិសោធន៍ការងារ គឺផ្នែកធនធានមនុស្សនឹងមិនទទួលយកតែម្ដង ដោយសារតែរយៈពេលនៃការបំពេញការងារខ្លីពេក ដូច្នេះមិនមានអ្វីដែលត្រូវរៀបរាប់ឲ្យក្បោះក្បាយ ឬគួរឲ្យចាប់អារម្មណ៍ក្នុង CV ឡើយ។

លោកបានបន្ថែមថា ជាធម្មតានៅពេលបំពេញការងារនៅកន្លែងណាមួយ គឺតម្រូវឲ្យមានរយៈពេលតិចបំផុតមួយឆ្នាំ ចំពោះការផ្លាស់ប្ដូរការងារលឿន ដោយបរិយាកាសការងារ នោះយើងអាចនឹងមិនមានអនាគតល្អនោះទេ៕