(ភ្នំពេញ)៖ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានលើកឡើងថា យុវជនសម័យថ្មី ហាក់មិនសូវចាប់អារម្មណ៍នឹងការសិក្សាជំនាញ តែភាគច្រើនចាប់អារម្មណ៍រៀនទ្រឹស្តីជោគជ័យច្រើនជាង។

ការលើកឡើងរបស់លោក ជា ចាន់ដារ៉ា ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «បទពិសោធន៍នៃការអភិវឌ្ឍខ្លួនរបស់លោក ជា ចាន់ដារ៉ា ផ្តើមពីសន្តិសុខ ឈានជាអ្នកដឹកនាំ រហូតក្លាយជាប្រធានសមាគមពាណិជ្ជករដឹកជញ្ជូន»។

លោកបានថ្លែងថា «ខ្ញុំពិតជាមានក្ដីបារម្ភ ចំពោះយុវជនសម័យថ្មី គឺត្រង់ចំណុចមួយថា យុវជនហាក់មិនសូវចាប់អារម្មណ៍ នឹងការសិក្សាជំនាញនោះឡើយ តែភាគច្រើនចាប់អារម្មណ៍រៀនទ្រឹស្តីជោគជ័យច្រើនជាង ជាក់ស្ដែងដូចសមាគមខ្ញុំផ្ទាល់ ពេលដែលយើងបើបង្រៀនទាក់ទិន នឹងការបំប៉នចំណេះដឹងណាមួយ គឺមិនសូវមានអ្នកមកទេ ប៉ុន្ដែប្រសិនបើមានការបង្រៀនទ្រឹស្ដីជោគជ័យឃើញថា មានអ្នកចូលរួម និងចាប់អារម្មច្រើន»។

លោកបានបន្ដថា ជាក់ស្ដែងដូចឃើញក្នុងបណ្ដាញសង្គមស្រាប់ ប្រសិនបើមាតិការនិយាយពាក់ព័ន្ធនឹងការអប់រំ គឺមិនសូវជាមានមនុស្សចាប់អារម្មណ៍នោះទេ ប៉ុន្ដែប្រសិនបើមានការឈ្លោះទាស់ទាញគ្នាវិញ គឺមានការចាប់អារម្មណ៍ច្រើន ដូច្នេះនេះជាក្ដីបារម្ភ និងជារឿងមួយដែលពិបាកដោះស្រាយ។

លោកបានបន្ថែមថា ក្នុងនាមអាណាព្យាបាលត្រូវរិះរក និងជំរុញ កូនរបស់ខ្លួនឲ្យរិះរកចំណេះជំនាញសម្រាប់ខ្លួនឯង នេះជាការងារមួយត្រូវធ្វើជាចាំបាច់ ប្រសិនបើឪពុកម្ដាយឃើញថា កូនខ្លួនមិនពូកែតែមិនជំរុញកូនឲ្យរកជំនាញសម្រាប់គាត់នោះទេ ឪពុកម្ដាយក៏ពិបាក សង្គមជាតិក៏ពិបាក ហើយកូនខ្លួនឯងនេះ ក៏ពិបាកដូចគ្នានាពេលអនាគត៕