អ៊ែបបញ្ជាទិញទំនិញតាមអនឡាញ(Tiptop App) ដែលបង្កើតឡើងដោយកូនខ្មែរ បាននឹងកំពុងរួមចំណែក ជំរុញការលក់ផលិតផលខ្មែរ និងជួយរកទីផ្សារឱ្យម្ចាស់សិប្បកម្ម និងអាជីវកម្មក្នុងស្រុក (Video inside)
13-06-2026 09:14
(ភ្នំពេញ)៖ ដើម្បីជំរុញការលក់ផលិតផលខ្មែរ និងជួយរកទីផ្សារឱ្យម្ចាស់សិប្បកម្ម និងម្ចាស់អាជីវកម្មក្នុងស្រុក ស្រ្តីខ្មែរមួយរូបបាន ផ្តួចផ្តើមគំនិត បង្កើតកម្មវិធីទិញទំនិញតាមទូរសព្ទមួយ ដែលមានឈ្មោះថា Tiptop App ដោយបច្ចុប្បន្ននេះ អតិថិជន ប្រមាណជិត២០០ប្រទេស អាចបញ្ជាទិញទំនិញខ្មែរគ្រប់ប្រភេទនៅលើអ៊ែបនេះ។
Tiptop ជាកម្មវិធីទិញទំនិញតាមអនឡាញ បង្កើតឡើងដោយកូនខ្មែរ មានលក់ផលិផលខ្មែរជាង ១០០០មុខ ដែលជាប្រភេទទំនិញដែលមានគុណភាព ពីម្ចាស់សិប្បកម្ម និង ហាង។ ធីបថបអាចឱ្យបងប្អូនខ្មែរទាំងក្នុងស្រុក និង ក្រៅស្រុក គ្រប់រូប រកផលិផលខ្មែរបានដោយងាយស្រួល។ ក្រៅពីផលិតផលខ្មែរ អតិថិជន ក៏អាចបញ្ជាទិញផលិតផលពីប្រទេសចិនជាច្រើនមុខបានផងដែរ។
លោកស្រី ណាំង គង្គា ដែលជាស្ថាបនិក Tiptop App បានឱ្យដឹងថា ការបង្កើត អ៊ែបនេះឡើង ដើម្បីរួមចំណែកជំរុញផលិតក្នុងស្រុក ឱ្យកាន់តែខិតជិតជាមួយអ្នកប្រើប្រាស់។ អតិថិជននៅទូទាំង២៥ខេត្តក្រុង និង បណ្តាប្រទេសនានាជុំវិញពិភពលោក អាចធ្វើការបញ្ជាទិញ ទំនិញពីកម្មវិធី TipTopបាន។
Tiptop Appបានបំពាក់់បច្ចេកវិទ្យាទំនើបផ្តល់ទំនុកចិត្តខ្ពស់ និង ផ្តល់សុវត្ថិភាពជូនអ្នកទិញ និង អ្នកលក់ ដោយលំហូរនៃដំណើរការទិញ និងលក់មានភ្ជាប់ប្រព័ន្ធជាមួយធនាគារ ABA និង ភ្នាក់ងារដឹកជញ្ជូនរហ័ស Pendasend ដោយស្វួយប្រវត្តិ។
លោកស្រីបន្តថា កម្មវិធីធីបថប អនុញ្ញាតឱ្យម្ចាស់ រោងចក្រ សិប្បកម្ម និងម្ចាស់អាជីវកម្មក្នុងស្រុកទាំងអស់ អាចបង្ហោះឬដាក់លក់ផលិតផលដោយខ្លួនឯង ដោយម្ចាស់អាជីវកម្មអាចគ្រប់គ្រងព័ត៌មានផលិតផល តម្លៃ ស្តុក និងការបញ្ជាទិញបានដោយឯករាជ្យ។ មុខងារនេះបានដើរតួនាទីយ៉ាងសំខាន់ក្នុងការជំរុញការរីកចម្រើនរបស់អាជីវកម្មក្នុងស្រុក ដោយផ្តល់ឱកាសឱ្យពួកគេចូលទៅកាន់ទីផ្សារឌីជីថលកាន់តែងាយស្រួល និងមានប្រសិទ្ធភាព។
TipTop មានចក្ខុវិស័យច្បាស់លាស់ក្នុងការភ្ជាប់អាជីវកម្មកម្ពុជាទៅកាន់ទីផ្សារពិភពលោក តាមរយៈបច្ចេកវិទ្យាឌីជីថល និងប្រព័ន្ធពាណិជ្ជកម្មអេឡិចត្រូនិក។
គោលបំណងសំខាន់របស់ TipTop គឺជួយឱ្យសហគ្រាសធុនតូច និងមធ្យម (SMEs) ព្រមទាំងសិប្បករ និងអ្នកផលិតក្នុងស្រុក អាចចូលទៅកាន់អតិថិជនអន្តរជាតិបានយ៉ាងងាយស្រួល និងមានប្រសិទ្ធតាមរយៈការប្រើប្រាស់បច្ចេកវិទ្យាទំនើប ការទូទាត់អន្តរជាតិ ប្រព័ន្ធដឹកជញ្ជូនអន្តរជាតិ និងការផ្សព្វផ្សាយឌីជីថល TipTop អាចជួយបង្កើនការលក់ផលិតផលខ្មែរ ចូលរួមមួយផ្នែកតូចក្នុងការបង្កើនកំណើនសេដ្ឋកិច្ចកម្ពុជា។
លើសពីនេះ TipTop ក្លាយជាម៉ាកយីហោរបស់កម្ពុជា (Cambodian Brand) ដែលមានកេរ្តិ៍ឈ្មោះនៅ អាស៊ាន និងលើឆាកអន្តរជាតិ ដោយជួយបង្ហាញពីគុណភាពផលិតផលខ្មែរ វប្បធម៌ខ្មែរ និងសក្តានុពលអាជីវកម្មរបស់កម្ពុជា ទៅកាន់ពិភពលោក។
ការរីកចម្រើនរបស់ TipTop នឹងមិនត្រឹមតែបង្កើតអត្ថប្រយោជន៍ដល់អាជីវកម្មប៉ុណ្ណោះទេ ប៉ុន្តែថែមទាំងជួយលើកកម្ពស់មុខមាត់ និងកិត្យានុភាពរបស់ប្រទេសកម្ពុជាឱ្យកាន់តែលេចធ្លោនៅលើឆាកអន្តរជាតិផងដែរ៕
