(ភ្នំពេញ)៖ អ្នកជំនាញក្នុងវិស័យទេសចរណ៍បានឱ្យដឹងថា ភ្ញៀវទេសចរចិន ដែលមកលេងកម្សាន្តនៅកម្ពុជា បានបង្ហាញសញ្ញាណវិជ្ជមាន បន្ទាប់ពីរាជរដ្ឋាភិបាលកម្ពុជា ចាប់ផ្តើមអនុវត្តយុទ្ធនាការលើកលែងទិដ្ឋាការ ដល់ប្រជាជនចិនសាកល្បង ដែលបានចាប់ផ្តើមពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦។

លោក ហូ វណ្ឌី​ ប្រធានក្រុមប្រឹក្សាភិបាលនៃសមាគមទេសចរណ៍កម្ពុជា បានប្រាប់បណ្តាញព័ត៌មាន Fresh News ថា ​ការចាប់ផ្តើម​លើកលែងទិដ្ឋាការ ដល់ប្រជាជនចិនសាកល្បង ធ្វើឱ្យចំនួនភ្ញៀវទេសចរចិន ដែលមកទស្សនាកម្ពុជា កាលពីថ្ងៃទី១៥ មិថុនា ឆ្នាំ២០២៦ ហាក់មានការកំរើកជាងមុន។

លោកបន្ថែមថា កន្លងមកក្រោយរាជរដ្ឋាភិបាល បានប្រកាសលើកលែងទិដ្ឋាការដល់ភ្ញៀវទេសចរចិន ដៃគូរកស៊ីក្នុងវិស័យទេសចរណ៍នៅចិន បានផ្សព្វផ្សាយជាបន្តបន្ទាប់ដល់ភ្ញៀវចិន។

គួរបញ្ជាក់ថា​ ប្រជាពលរដ្ឋចិនដែលកាន់លិខិតឆ្លងដែន PRC អាចចូលមកកម្ពុជាដោយមិនចាំបាច់ស្នើសុំទិដ្ឋាការ ក្នុងអំឡុងពេលសាកល្បងចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ និងអាចស្នាក់នៅរយៈពេល ១៤ថ្ងៃ ព្រមទាំងអាចចូលចេញបានច្រើនដង។

​លោក ហូ វណ្ឌី មានប្រសាសន៍ថា កន្លងមក​ទេសចរហាក់មានការព្រួយទាក់ទងនឹងបញ្ហា​ Online Scams​ ប៉ុន្តែក្រោយពេលរដ្ឋាភិបាលដាក់ចេញយុទ្ធនាបោសសម្អាត និងបង្រ្កាបករណីបទល្មើសឆបោកតាមប្រព័ន្ធបច្ចេកវិទ្យា (Online Scams) ជាបន្តបន្ទាប់មក ទទួលបានការសាទរពីអ្នកប្រកបរកស៊ី ក្នុងវិស័យទេសចរក៏ដូចជាប្រជាពលរដ្ឋខ្មែរ។ លោកសង្ឃឹមថា ការលើកលែងទិដ្ឋាការដល់ភ្ញៀវទេសចរចិន នឹងទទួលបានភ្ញៀវទេសចិនបន្ថែមទៀត។

លោកបន្តថា «នេះគឺជាការមួយបន្តទៅទៀត រវាងស្ថាប័នរដ្ឋជាពិសេសក្រសួងទេសចរណ៍ និងវិស័យឯកជនក្នុងការផ្សព្វផ្សាយ ពង្រឹងការផ្តល់សេវាកម្មជូនទៅដល់ភ្ញៀវទាំងអស់​ ហើយកិច្ចការងារនេះ គឺជាការផ្តល់នូវទំនុកចិត្តទៅដល់ភ្ញៀវទូទាំងពិភពលោក»។

​សូមជម្រាប​ថា យោងតាមស្ថិតិទេសចរណ៍ ឆ្នាំ២០២៥ កម្ពុជាបានទទួលភ្ញៀវទេសចរអន្តរជាតិប្រមាណ ៥.៦លាននាក់ ដែលក្នុងនោះមានភ្ញៀវទេសចរចិនជាង ១.២លាននាក់ កើនឡើងប្រមាណ ៤២ភាគរយ។ ដោយឡែក ក្នុងរយៈពេលប្រាំខែដំបូងនៃឆ្នាំ២០២៦ ភ្ញៀវទេសចរចិនបានឈរនៅលំដាប់ទី១ ក្នុងចំណោមភ្ញៀវទេសចរអន្តរជាតិ ដែលធ្វើដំណើរមកកម្ពុជា ដែលឆ្លុះបញ្ចាំងពីសក្តានុពលខ្ពស់នៃទីផ្សារទេសចរចិន សម្រាប់វិស័យទេសចរណ៍កម្ពុជា៕