(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងឲ្យដឹងថា មន្រ្តី និងឈ្មួញដែលគប់គិតគ្នានាំចូលទំនិញពីថៃ តាមផ្លូវគោក ​​គួរតែផ្តន្ទាទោសតាមច្បាប់ ព្រោះទង្វើលបែបនេះ ជាទង្វើដែលមិនមានមនសិកាជាតិ មិនខ្វល់ពីការឈឺចាប់របស់ប្រជាជន ដែលត្រូវបានថៃឈ្លានពាននោះទេ។

ការលើកឡើងរបស់អ្នកឧកញ៉ា លឹម ហេង ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ការពង្រីកមូលដ្ឋានផលិតកម្មនៅកម្ពុជា ក្រោយ១ឆ្នាំនៃការបិទច្រកព្រំដែនគោកពីភាគីថៃ»។

អ្នកឧកញ៉ា លឹម ហេង បានថ្លែងឲ្យដឹងថា សម្រាប់ឈ្មួញដែលចង់បានផលប្រយោជន៍ និងតែងតែនាំចូលទំនិញថៃមកកម្ពុជា អ្នកដែលមិននាំចូលទំនិញថៃ គឺមានស្មារតីជាតិនិយម ដើម្បីគាំទ្រផលិតផលខ្មែរ និងពហិកាទំនិញដែលជាសត្រូវរបស់យើង។ ចំពោះឈ្មួញដែលនាំចូលកន្លងមក ពួកគាត់ធ្វើការនាំចូលពីប្រទេសថៃ នៅតែឆ្លៀតឱកាសនាំចូលផលិតផលចូលមកកម្ពុជា ដោយមិនគិតអំពីកំហឹងឈឺចាប់ នៅពេលដែលថៃឈ្លានពានខ្មែរនោះទេ។

អ្នកឧកញ៉ា លឹម ហេង បានបន្ថែមថា ចំពោះច្បាប់ពាណិជ្ជកម្ម របស់អង្គការពាណិជ្ជគម្មពិភពលោក ក៏ដូចជាថ្នាក់ដឹកនាំរាជរដ្ឋាភិបាល មិនបានហាមមិនឲ្យនាំចូលតាមច្រកអន្ដរជាតិត្រឹមត្រូv តាមផ្លូវទឹក ឬផ្លូវអាកាសនោះទេ ប៉ុន្ដែចំពោះផ្លូវគោកដាច់ខាត ព្រោះកម្ពុជាយើងបានបិទព្រំដែនរួចទៅហើយ​ ដូច្នេះអ្នកណាដែលនាំចូលតាមផ្លូវគោក គឺខុសច្បាប់។

អ្នកឧកញ៉ា លឹម ហេង បានបញ្ជាក់ថា ដូច្នេះយើងត្រូវថ្កោទោស និងដាក់ទោសចំពោះជនទាំងឡាយណា ដែលនាំចូលទំនិញថៃតាមផ្លូវគោក ដោយខុសច្បាប់ ដូចដែលសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ធ្លាប់បានលើកឡើងថា ចំពោះការនាំចូលតាមផ្លូវគោក ដោយខុសច្បាប់ គឺត្រូវរឹបអូសយកទ្រព្យសម្បត្តិ និងបញ្ជូលទៅធ្វើការនៅសមរភូមិក្រោយ ជួយដល់ជួរមុខទាំងមន្រ្ដី ទាំងឈ្មួញដែលនាំចូលខុសច្បាប់៕