(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានថ្លែងឲ្យដឹងថា ចំពោះការ​បណ្តោយឱ្យមានការនាំចូលលើសចំនួន នឹងនាំឱ្យអ្នកផលិតក្នុងស្រុក​មិនអាចរស់បាន។

ការលើកឡើងរបស់អ្នកឧកញ៉ា លឹម ហេង ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ការពង្រីកមូលដ្ឋានផលិតកម្មនៅកម្ពុជា ក្រោយ១ឆ្នាំនៃការបិទច្រកព្រំដែនគោកពីភាគីថៃ»។

អ្នកឧកញ៉ា លឹម ហេង បានថ្លែងថា សហគ្រាសធុនតូច និងមធ្យមដាច់ខាតត្រូវតែរក្សាឲ្យពួកគាត់មានផលចំណេញ ទើបពួកគាត់បន្ដទៅមុខបាន ប្រសិនបើមិនមានផលចំណេញនោះទេ នោះអ្នកផលិតក្នុងស្រុកមិនអាចរស់បានឡើយ ប្រសិនបើបណ្ដោយឲ្យការនាំចូលលើសចំនួន ទីផ្សារធ្លាក់ចុះធ្វើឲ្យអ្នកផលិតក្នុងស្រុក មិនអាចទ្រាំទ្របាន ទីបំផុត និងមិនអាចរស់ដោយយូរអង្វែងបានឡើយ។

អ្នកឧកញ៉ា លឹម ហេង បានបន្ថែមថា ជាការពិតផលិតផលកសិកម្មខ្លះ ប្រទេសកម្ពុជាយើង មិនអាចផលិតគ្រប់នោះទេ ទាមទារឲ្យមានការនាំចូលបន្ថែមដូចជា សាច់គោជប៉ុន ត្រីជប៉ុនជាដើម ជាតម្រូវការចាំបាច់ក្នុងការនាំចូល ប៉ុន្ដែតាមរយៈការឆែកមើលកន្លងមកឃើញថា មានការនាំចូលជ្រូកទាំងមូលចូលមក នេះជាបញ្ហាដល់អ្នកផលិត អ្នកចិញ្ចឹមក្នុងស្រុកព្រោះថា ការចិញ្ចឹមជ្រូកក្នុងស្រុករបស់យើងមានការផ្គត់ផ្គង់គ្រប់គ្រាន់ហើយ ហេតុដូចម្ដេចត្រូវនាំចូលបន្ថែម ចំពោះការនាំចូលបែបនេះ ច្បាស់ណាស់ថា នឹងប៉ះពាល់ដល់អ្នកចិញ្ចឹមក្នុងស្រុក ដែលជាបញ្ហាក្នុងការធ្វើឲ្យនាំឱ្យអ្នកផលិតក្នុងស្រុក​មិនអាចរស់បាន៕