(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា និងជាអ្នកជំនួញជើងចាស់មួយរូប ចង់ឱ្យមានការបង្កើត និងចងក្រងតំបន់ឧស្សាហកម្ម សហគ្រាសធុនតូច និងមធ្យមពិសេស​ ដើម្បីជំរុញការកែច្នៃផលិត​ផលក្នុងស្រុក ដោយទទួលបានការ​គាំទ្រពីរដ្ឋាភិបាលទៅលើ ទឹក ភ្លើង និងការទទួលបានហិរញ្ញប្បទាន ដើម្បីគាំទ្រដល់សហគ្រាសធុនតូច និងមធ្យមនៅកម្ពុជា អាចពង្រីកខ្លួនកាន់តែធំ និងឈានដល់ការផលិតដែលមាននិរន្តភាព នាំចេញទៅក្រៅប្រទេស។​

លោកបានពន្យល់ថា តាមរយៈកិច្ចព្រមព្រៀងពាណិជ្ជកម្មសេរី នានាដូចជា ជាមួយចិន កូរ៉េ អេមីរ៉ាតអារ៉ាប់រួម អាសិប រួមនិងការទទួលបានភាពអនុគ្រោះពន្ធ EBA ធ្វើឱ្យកម្ពុជាមានទីផ្សារទូលំទូលាយ ដូច្នេះហើយទាមទារឱ្យខ្សែច្រវ៉ាក់ផលិតកម្មមួយ ដែលមានលទ្ធភាពផលិត និងផ្គត់ផ្គង់ប្រកបដោយនិរន្តភាព ហើយសហគ្រាសតូចៗ ផលិតលក្ខណៈគ្រួសារមិនអាចផ្គត់បាននោះទេ។ លោកបញ្ជាក់ដើម្បីផលិតកម្មរបស់កម្ពុជាមាននិរន្តភាព យើងត្រូវបង្កើត និងចងក្រងតំបន់ឧស្សាហកម្ម សហគ្រាសធុនតូច និងមធ្យមពិសេស​ ជំរុញការកែច្នៃផលិត​ផលក្នុងស្រុក ដោយ​គាំទ្រទៅលើ ទឹក ភ្លើង និងហិរញ្ញប្បទាន។

​អ្នកឧកញ៉ា លឹម ហេង លើកឡើងបែបនេះ ធ្វើឡើង ក្នុងកម្មវិធី FRESH BUSINESS​ ​ពិភាក្សាលើប្រធានបទ​ «ការពង្រីកមូលដ្ឋានផលិតកម្មនៅកម្ពុជា ក្រោយ១ឆ្នាំនៃការបិទច្រកព្រំដែនគោកពីភាគីថៃ»។

សូមស្តាប់ការពន្យល់បន្ថែមរបស់ ​អ្នកឧកញ៉ា លឹម ហេង៖