(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា និងជាអ្នកជំនួញជើងចាស់មួយរូប មានប្រសាសន៍ថា ដើម្បីឱ្យការផលិត និងការផ្គត់ផ្គង់ទំនិញក្នុងស្រុកមាននិរន្តភាព និងធានាបាននូវតម្លៃផលិតផលសមរម្យសម្រាប់ប្រជាពលរដ្ឋ ហើយអាចប្រកួតប្រជែងជាមួយផលិតផលនាំចូល លុះត្រាតែផលិតផលនោះ ឈានទៅដល់ផលិតនាំចេញឱ្យបានច្រើន ពោល គឺផលិតសម្រាប់ផ្គត់ផ្គង់ទាំងស្រុកផង និងនាំចេញផង នោះទើបអាចរក្សានិរន្តភាពផ្គត់ផ្គង់ក្នុងស្រុកបាន។

ជាក់ស្តែង លោកបានលើកឡើងថា ចេកអំបូងលឿងដែលកន្លងមក កម្ពុជាធ្លាប់បាននាំចូលទាំងស្រុង ប៉ុន្តែនៅពេលដែលចាប់ផ្តើមមានរោងចក្រ សហគ្រាស វិនិយោគដាំដំណាំចេកនេះ សម្រាប់នាំចេញទៅទីផ្សារអន្តរជាតិបានច្រើន និងផ្គត់ផ្គង់ក្នុងស្រុក ចេកអំបូងលឿនមិនត្រូវបាននាំចូលមកទៀតឡើយ ដោយតម្លៃមិនអាចប្រកួតប្រជែងជាមួយចេកក្នុងស្រុកបាន។

លោកបានពន្យល់ថា «ចំណុចនេះហើយ ទាំងស្វាយចន្ទីក៏ដោយ ស្រូវអង្ករ ដំឡូងមី ជាដើម វាបានឈានដល់ការនាំចេញច្រើនហើយ ដូច្នេះហើយមិនអាចប្រទេសណានាំចូលបានទេ ដូច្នេះហើយយើងមាននិរន្តភាពក្នុងការផ្គត់ផ្គង់ក្នុងស្រុក ហើយក្នុងតម្លៃទាបបាន។ ប៉ុន្តែបើយើងផលិតដើម្បីតម្រូវតែទីផ្សារយើងទេ គឺពិបាកប្រកួតប្រជែងណាស់ ដោយសារថ្លៃដើមខ្ពស់ ដូច្នេះហើយទើបកន្លងមក នាំឱ្យទីផ្សារក្រៅស្រុកមកវាយលុកទីផ្សារយើងបានទាំងបន្លែ ផ្លែឈើ ត្រីសាច់ ដែលយើងបាននាំចេញពីវៀតណាម ហើយពីមុនមកនាំពីថៃ គឺសុទ្ធតែទំនិញលេខ៣ លេខ៤ ដែលគេទាត់ចេញ បន្ទាប់ពីនាំចេញទៅប្រទេសផ្សេងរួច ហើយយកមកលក់ថោកៗនៅយើង ដែលធ្វើឱ្យសម្លាប់ទីផ្សារអ្នកផលិតនៅក្នុងស្រុក»។

ឆ្លៀតក្នុងឱកាសនេះ លោកលើកទឹកចិត្តឱ្យមានការផលិតសម្រាប់ការនាំចេញឱ្យបានច្រើន នោះទើបការផលិតនៅកម្ពុជា អាចរក្សាការផ្គត់ផ្គង់ក្នុងស្រុកបាន៕

សូមស្តាប់ការពន្យល់បន្ថែមរបស់ អ្នកឧកញ៉ា លឹម ហេង៖