អ្នកដំណើរចេញចូលកម្ពុជាតាមផ្លូវអាកាសធ្លាក់ចុះតិចតួច តែមានកំណើនល្អ សម្រាប់ការដឹកជញ្ជូនទំនិញ
22-06-2026 17:39
(ភ្នំពេញ)៖ រយៈពេល៥ខែដំបូង ឆ្នាំ២០២៦ កម្ពុជាទទួលបានអ្នកដំណើរតាមផ្លូវអាកាសចំនួន ២ ៨៧៤ ០៨៤នាក់ ធ្លាក់ចុះ ៦% ធៀបនឹងរយៈពេលដូចគ្នា ឆ្នាំ២០២៥។ នេះបើតាមរបាយការណ៍ ដែលកត់ត្រាដោយរដ្ឋលេខាធិការដ្ឋានអាកាសចរស៉ីវិលកម្ពុជា។
ចំនួនអ្នកដំណើរធ្លាក់ចុះតិចតួច តែបែរជាចំនួនទំនិញកើនឡើងគួរឱ្យគត់សម្គាល់វិញ។ នៅ៥ខែឆ្នាំនេះ បរិមាណទំនិញចេញចូលតាមផ្លូវអាកាសមានចំនួន ៣៨ ៩៥១ តោន កើនឡើង៣៤% ធៀបនឹងរយៈពេលដូចគ្នាឆ្នាំ២០២៥។
លោក ស៉ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល បានបញ្ជាក់ថា គម្លាតរវាងកំណើនយ៉ាងគំហុកនៃបរិមាណទំនិញ និងការថយចុះនៃចំនួនអ្នកដំណើរ គឺជាលក្ខណៈសម្គាល់ដ៏សំខាន់នៃវិស័យអាកាសចរណ៍កម្ពុជា នៅក្នុងឆ្នាំ២០២៦ ព្រោះថាកន្លងទៅនៅពេលអ្នកដំណើរថយចុះ ទំនិញក៏ថយចុះដូចគ្នា តែសម្រាប់កំណើននៃការដឹកជញ្ជូនទំនិញនេះ បង្ហាញពីសកម្មភាពសេដ្ឋកិច្ចរបស់កម្ពុជា ដែលទំនិញទាំងនោះ សម្រាប់បម្រើដល់ខ្សែច្រវាក់ផលិតកម្ម។
បើតាមអ្នកនាំពាក្យរូបនេះ អាកាសយានដ្ឋានអន្តរជាតិតេជោ (KTI) គ្រប់គ្រងលើការដឹកជញ្ជូនទំនិញអន្តរជាតិតាមផ្លូវអាកាសរហូតដល់ ៩៧.៩% នៃទំហំទំនិញសរុបទូទាំងប្រទេស។
គិតត្រឹមខែមិថុនា ឆ្នាំ២០២៦ បណ្ដាញអាកាសចរណ៍អន្តរជាតិរបស់កម្ពុជាគ្របដណ្ដប់លើ ១៨ប្រទេស និង ៤៦ទីក្រុង ដោយមានក្រុមហ៊ុនអាកាសចរណ៍ចំនួន ៣៦ ដំណើរការជើងហោះហើរសរុប ១,០២៤ ជើង/សប្ដាហ៍ តាមរយៈអាកាសយានដ្ឋានអន្តរជាតិទាំង៣។
សូមជម្រាបថា ឆ្នាំ២០២៥ កម្ពុជាទទួលបានអ្នកដំណើរផ្លូវអាកាសចេញ-ចូលចំនួន ៦ ៩៨៨ ២៥៩នាក់ មានការកើនឡើង១២% បើធៀបទៅនឹងឆ្នាំ២០២៤៕
