(ភ្នំពេញ)៖ គិតត្រឹម៥ខែដើម ឆ្នាំ២០២៦នេះ សហគ្រាសធុនតូច និងមធ្យមនៅកម្ពុជា (SMEs) កើតថ្មី ដែលបានចុះបញ្ជីនៅក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានចំនួន ៧៣៨មូលដ្ឋាន ដោយបានកើនឡើងប្រមាណ ៤០% បើធៀបនឹងរយៈពេលដូចគ្នា កាលពីឆ្នាំ២០២៥។

កំណើននេះ ស្របពេលទំនិញថៃសំខាន់ៗ ជាពិសេសប្រភេទចំណីអាហារ និងភេសជ្ជៈ ដែលធ្លាប់នាំចូលមកកម្ពុជាមានការធ្លាក់ចុះយ៉ាងខ្លាំង បន្ទាប់ពីពលរដ្ឋកម្ពុជា ធ្វើពហិការឈប់ប្រើទំនិញថៃ និងងាកមកប្រើប្រាស់ផលិតផលក្នុងស្រុក។

លោក ហេង សុគង់ រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានប្រាប់បណ្តាញព័ត៌មាន Fresh News នៅថ្ងៃទី២៣ ខែមិថុនា ឆ្នាំ២០២៦នេះថា សហគ្រាសធុនតូច និងមធ្យមដែលបានមកចុះបញ្ជី កើនឡើងច្រើនជាងគេ គឺប្រភេទសហគ្រាសផលិតចំណីអាហារ និងភេសជ្ជៈ ដែលមានរហូតដល់៣៩៩មូលដ្ឋាន, ប្រភទទី២ គឺឧស្សាហកម្មគីមី កៅស៊ូ និងប្លាស្ទិក មានចំនួន១៦០មូលដ្ឋាន,ទី៣ ប្រភេទឧស្សាហកម្មតម្បាញ់ កាត់ដេរ កាបូប និងស្បែកជើង មានចំនួន៦៥មូលដ្ឋាន ,ទី៤ ផ្នែកឧស្សាហកម្មកែច្នៃលោកហៈដែលមានចំនួន៣៣មូលដ្ឋាន និងទី៥ ប្រភេទឧស្សាហកម្មផលិតពីរ៉ែមិនមែនលោហៈដែលមានចំនួន ២០មូលដ្ឋាន។

លោកបានគូសបញ្ជាក់បន្ថែម «សម្រាប់ផលិតផលជាពិសេសម្ហូបអាហារ និងភេសជ្ជៈ គឺយើងឃើញថាកម្ពុជារបស់យើង ផលិតបានច្រើន ហើយបណ្តារោងចក្រសហគ្រាសបានកើតឡើងជាបន្តបន្ទាប់ច្រើន បើប្រៀបធៀបនឹងបណ្តារោងចក្រសហគ្រាសដទៃទៀត ដែលផលិតផលិតផលផ្សេង។ ឃើញថានៅក្នុងនោះផលិតផលមួយចំនួន ផ្នែកម្ហូបអាហារ និងភេសជ្ជៈ បានបង្កើនការផលិត ដែលអាចជំនួសការនាំចូលបាន រហូតដល់១០០% ហើយមួយចំនួនទៀត ចន្លោះពី៤០%ទៅ៦០%»។

លោកបានបន្ថែមថា ស្របពេលដែលពលរដ្ឋកម្ពុជាពហិការឈប់ប្រើទំនិញថៃ និងងាកមកប្រើប្រាស់ផលិតផលខ្មែរ បានធ្វើឱ្យអ្នកផលិតក្នុងស្រុក ចាប់ផ្តើមពង្រីក និងពង្រឹងនូវសង្វាក់ផលិតកម្មរបស់ខ្លួនស្របតាមស្តង់ដារគុណភាព និងការបង្កើតរោងចក្រ សហគ្រាសថ្មីៗ ដើម្បីផលិតផលិតផល ជំនួសទំនិញនាំចូល។

ដោយឡែកការលក់វិញ ចាប់តាំងពីកើតមានសង្រ្គាមព្រំដែន រហូតមកដល់បច្ចុប្បន្ននេះ ការលក់របស់សហគ្រាសធុនតូច និងមធ្យម មានកំណើនខ្ពស់ រហូតដល់៤០%ទៅ៤៥% បើធៀបនឹងមុនពេលកើតមានសង្រ្គាមព្រំដែនកម្ពុជា-ថៃ។ ជាមួយគ្នានេះ លោក ហេង សុគង់ បន្តអំពាវនាវដល់ប្រជាពលរដ្ឋខ្មែរ សូមបន្តគាំទ្រផលិតផលខ្មែរឱ្យកាន់តែច្រើនថែមទៀត ក្រោមពាក្យស្លោក«ប្រើប្រាស់ផលិតផលខ្មែរ គឺស្នេហាជាតិ»។

ថ្លែងក្នុងវេទិកាគយ និងសម្ព័ន្ធសមាគមសហគ្រាសធុនតូចនិងមធ្យម (FASMEC) ដែលរៀបចំឡើងកាលពីពេលថ្មីៗនេះ លោក គុណ ញឹម រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គនាយកគយនិងរដ្ឋាករកម្ពុជា មានប្រសាសន៍ថា ការពហិការរបស់ប្រជាពលរដ្ឋខ្មែរ បានធ្វើឱ្យទំហំពាណិជ្ជកម្ម និងការនាំចូលទំនិញថៃធ្លាក់ចុះយ៉ាងខ្លាំង រយៈពេល ៥ ខែ ក្នុងឆ្នាំ២០២៦នេះ។

លោកបានលើកឡើងថា ទំនិញថៃដែលជាប់បម្រាមហាមឃាត់រួមមាន ប្រេងឥន្ធនៈ, បន្លែ និងផ្លែឈើស្រស់ធ្លាក់ចុះ ១០០% (ស្មើនឹងសូន្យ)។ ចំណែកភេសជ្ជៈគ្រប់ប្រភេទ ដោយក្នុងនោះភេសជ្ជៈល្បីៗដូចជាគោជល់ និងអូអ៊ីឈិ ជាដើម ធ្លាក់ចុះ ៩៨% ខណៈផលិតផលកាហ្វេ, តែ, ធញ្ញជាតិ, និងអាហារកែច្នៃពីទឹកដោះគោ ធ្លាក់ចុះ ៨៦%។ ទន្ទឹមគ្នានេះ ផលិតផលសម្រេច និងវត្ថុធាតុដើមធ្វើពីប្លាស្ទិក និងកៅស៊ូ ធ្លាក់ចុះពី ៦៨% ទៅ ៦៩% និងគ្រឿងចក្រកសិកម្ម ធ្លាក់ចុះ ៥៧%៕