(ភ្នំពេញ)៖ លោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានលើកឡើងថា ចំណូលថវិកាជាតិ ដែលប្រមូលដោយអគ្គនាយកដ្ឋានគយ និងរដ្ឋាករកម្ពុជា ក្នុងឆ្នាំ២០២៥ មានកំណើនប្រមាណជិត១៦ដង ធៀបនឹងចំណូលដែលប្រមូលបាន ក្នុងឆ្នាំ២០០០។

ការលើកឡើងបែបនេះ របស់លោកបណ្ឌិត គុណ ញឹម ធ្វើឡើងក្នុងឱកាស ដែលអគ្គនាយកដ្ឋានគយ និងរដ្ឋាករកម្ពុជា ប្រារព្ធពិធីអបអរសាទរខួបអនុស្សាវរីយ៍លើកទី៧៥ ថ្ងៃបង្កើតរដ្ឋបាលគយកម្ពុជា (២៩ មិថុនា ១៩៥១ - ២៩ មិថុនា ២០២៦) ដោយមានការចូលរួមពីថ្នាក់ដឹកនាំ និងមន្ត្រីគយ និងរដ្ឋាករសរុបប្រមាណ២០០រូប។

ពិធីនេះ ធ្វើឡើងដើម្បីរំឭកនូវគុណូបការៈដ៏ឧត្តុង្គឧត្តមរបស់ ព្រះករុណា ព្រះមហាវីរក្សត្រ ព្រះបាទសម្តេច ព្រះនរោត្តមសីហនុ «ព្រះបរមរតនកោដ្ឋ» ដែលព្រះអង្គ បានបង្កើតរដ្ឋបាលគយ កម្ពុជា តាមព្រះរាជក្រមលេខ ៦៦១ នស ចុះថ្ងៃទី២៩ ខែមិថុនា ឆ្នាំ១៩៥១ កាលពី៧៥ឆ្នាំមុន ដោយបំបែកចេញពីសហភាពគយឥណ្ឌូចិន ក្នុងសម័យអាណានិគមបារាំង។

លោកបណ្ឌិត គុណ ញឹម បានលើកឡើងអំពីប្រវតិ្តលម្អិត នៃការវិវត្តរបស់រដ្ឋបាលគយកម្ពុជា គិតចាប់តាំងពីការចាប់បដិសន្ធិកាលពីឆ្នាំ១៩៥១ រហូតដល់ពេលបច្ចុប្បន្ននេះ និងបានគូសរំលេចពីសមិទ្ធផលសំខាន់ៗ លើគ្រប់ការដ្ឋានការងារដែលអគ្គនាយកដ្ឋានគយ និងរដ្ឋាករកម្ពុជាសម្រេចបាននៅលើគន្លងនៃការអភិវឌ្ឍ និងកែទម្រង់ដ៏វែងឆ្ងាយ។

ការសម្រេចនេះ ដោយមានការចង្អុលបង្ហាញ និងការយកចិត្តទុកដាក់ពីអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅក្នុងរដ្ឋាភិបាល នៃនីតិកាលមុនៗនៃរដ្ឋសភា ក្រោមការគាំទ្រ និងមគ្គុទេសក៍ដ៏ខ្ពង់ខ្ពស់សម្ដេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា។

បន្ថែមពីនោះទៀត ក៏ដូចជាក្នុងនីតិកាលទី៧ នៃរដ្ឋសភាបច្ចុប្បន្ន ក្រោមការដឹកនាំបន្តវេនដ៏ត្រឹមត្រូវ និងប៉ិនប្រសប់ ប្រកបដោយថាមពលរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

លោករដ្ឋមន្ត្រីប្រតិភូ ក៏បានរំឭកនូវគុណបំណាច់របស់មន្ត្រីគយជំនាន់មុនៗ ដែលបានពុះពារ លះបង់ ជម្នះរាល់ឧបសគ្គ និងបញ្ហាប្រឈមនានាៗ ក្នុងការបំពេញតួនាទី និងភារកិច្ចជូនជាតិ និងអង្គភាពរហូតសម្រេចបានសមិទ្ធផល ក៏ដូចជាកេរិ៍ដំណែលរដ្ឋបាលគយកម្ពុជាដ៏ថ្លៃថ្លា ក្នុងពេលបច្ចុប្បន្ននេះ៕