អ្នកជំនាញកំពុងស្រាវជ្រាវពូជកាហ្វេនៅខេត្តមណ្ឌលគិរី ដើម្បីអភិវឌ្ឍវិស័យកាហ្វេក្នុងស្រុក ស្របពេលកសិករក្នុងខេត្តងាកមកដាំកាហ្វេច្រើន
25-06-2026 11:41
(មណ្ឌលគិរី)៖ សមាគមកាហ្វេកម្ពុជា បានចាប់ដៃគូសហការជាមួយវិទ្យាស្ថានជាតិកសិកម្មព្រែកលៀប ចុះសិក្សាស្រាវជ្រាវលើប្រភេទពូជកាហ្វេ ដែលកសិករកំពុងដាំដុះបច្ចុប្បន្ន នៅក្នុងខេត្តមណ្ឌលគិរី ដើម្បីវាយតម្លៃ និងអភិវឌ្ឍពូជកាហ្វេក្នុងស្រុកឱ្យកាន់តែមានគុណភាព និងសក្តានុពលខ្ពស់។
គំនិតផ្តួចផ្តើមនៃការសិក្សាស្រាវជ្រាវនេះ ទទួលបានការចង្អុលបង្ហាញ និងជំរុញពីលោកបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា និងជាប្រធានកិត្តិយសនៃសមាគមកាហ្វេកម្ពុជា។
បណ្ឌិត ធន់ វឌ្ឍនា បានសង្កត់ធ្ងន់លើសារៈសំខាន់នៃការអភិវឌ្ឍពូជកាហ្វេក្នុងស្រុក ដែលមានសមត្ថភាពធន់ទៅនឹងការប្រែប្រួលអាកាសធាតុ ធន់នឹងជំងឺ ព្រមទាំងអាចផ្តល់ទិន្នផលខ្ពស់ជូនដល់កសិករ។
កិច្ចសហការរវាងស្ថាប័នទាំងពីរនេះ មិនត្រឹមតែជាជំហានដ៏សំខាន់ក្នុងការលើកកម្ពស់ជីវភាពកសិករអ្នកដាំដុះកាហ្វេនៅខេត្តមណ្ឌលគិរីប៉ុណ្ណោះទេ ប៉ុន្តែថែមទាំងជាគ្រឹះក្នុងការជំរុញខ្សែច្រវាក់ផលិតកម្មកាហ្វេខ្មែរ ឱ្យមានភាពចីរភាព និងសមត្ថភាពបំពេញតម្រូវការលើទីផ្សារផងដែរ។
កាហ្វេខេត្តមណ្ឌលគិរី ទទួលបានការគាំទ្រច្រើនពីប្រជាពលរដ្ឋខ្មែរដែលនិយមទទួលទានកាហ្វេ ប៉ុន្តែបច្ចុប្បន្ននេះ ការដាំដុះ និងការផ្គត់ផ្គង់នៅមានបរិមាណតិចតួច មិនទាន់អាចឆ្លើយតបតាមតម្រូវការទីផ្សារនៅឡើយ។
លោក សុខ ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានប្រាប់បណ្តាញព័ត៌មាន Fresh News កាលពីពេលថ្មីៗនេះថា ក្នុងរង្វង់៣ឆ្នាំចុងក្រោយនេះ ផ្ទៃដីដាំកាហ្វេនៅខេត្តមណ្ឌលគិរី បានកើនឡើងខ្ពស់គួរឱ្យកត់សម្គាល់ ដោយសារតែកសិករបានបង្វែរពីការដាំដំណាំផ្សេងមកដាំដំណាំកាហ្វេវិញ។ ការកើនឡើងនេះ ដោយសារ បច្ចុប្បន្ននេះកាហ្វេមានទីផ្សារល្អ និងតម្លៃខ្ពស់ បើធៀបនឹងការដាំដំណាំផ្សេងៗ ស្របពេលពលរដ្ឋកម្ពុជានិយមទទួលទានកាហ្វេទាំងក្មេង និងចាស់។
ទន្ទឹមគ្នានេះ ខេត្តមណ្ឌលគិរី គឺជាខេត្តមួយដែលមានសក្តានុពលខ្ពស់ក្នុងការដាំដំណាំហ្វេ ព្រោះខេត្តនេះមានរយៈកម្ពស់ ចន្លោះពី៥០០ទៅដល់ជិត១០០០ម៉ែត្របើធៀបនឹងនីវ៉ូទឹកសមុទ្រ ដែលអំណោយផលដល់ការដាំដំណាំកាហ្វេ។ ស្រុកដែលមានអំណោយផលសម្រាប់ដំណាំកាហ្វេច្រើនជាងគេ ស្រុកពេជ្រាដា ស្រុកអូរាំង និងក្រុងសែនមនោរម្យ។
ប្រធានមន្ទីរកសិកម្មរូបនេះ បានឱ្យដឹងថា កន្លងមកមន្ទីរកសិកម្ម រុក្ខាប្រមាញ់ ខេត្តមណ្ឌលគិរី បានសហការជាមួយក្រុមហ៊ុនឯកជន និងអង្គការដៃគូអភិវឌ្ឍន៍ បានបណ្តុះបណ្តាលបច្ចេកទេសនៃការដាំកាហ្វេដល់កសិករ ចាប់តាំងពីររៀបចំដី ការថែទាំ រហូតដល់ការប្រមូលផល។ ដូច្នេះហើយ នៅពេលកសិករចេះពីបច្ចកទេសនៃការដាំដំណាំកាហ្វេ បានធ្វើឱ្យកសិករ បង្វែរពីការដាំណាំផ្សេង មកដាំដំណាំកាហ្វេវិញ ខណៈកាហ្វេពូជថ្មីងាយស្រួលដាំ និងឆាប់បានប្រមូលដោយប្រើរយៈពេលតែ២ឆ្នាំប៉ុណ្ណោះ។
កាលពីពេលថ្មីៗសមាគមកាហ្វេកម្ពុជា បានរៀបចំវគ្គបណ្តុះបណ្តាលចែករំលែកបច្ចេកទេស «តាក់តែងមែក និងកាត់តដើមកាហ្វេ»ដល់កសិករ នៅខេត្តមណ្ឌលគិរីផងដែរ ដើម្បីបង្កើនសមត្ថភាពកសិករ ដែលនឹងក្លាយជាទុនដ៏សំខាន់ក្នុងការលើកកម្ពស់ជីវភាព និងគុណភាពកាហ្វេកម្ពុជា។
កម្មវិធីបណ្តុះបណ្តាល និងអនុវត្តជាក់ស្តែងស្តីពី «បច្ចេកទេសតាក់តែងមែក និងកាត់តដើមកាហ្វេ» បានរៀបចំឡើងថ្ងៃទី២១ ខែមិថុនា ឆ្នាំ២០២៦ នៅចម្ការពូឌី ស្ថិតក្នុងភូមិពូត្រែង ឃុំដាក់ដាំ ស្រុកអូរាំង ខេត្តមណ្ឌលគិរី ដោយមានការចូលរួមពីសំណាក់អ្នកបច្ចេកទេស ម្ចាស់ចម្ការ និងប្រជាកសិករ។
កម្មវិធីបណ្តុះបណ្តាលនេះ ធ្វើឡើងក្នុងគោលបំណងផ្លាស់ប្តូរបទពិសោធន៍ និងជំរុញការកែប្រែទម្លាប់ដាំដុះបែបប្រពៃណី ទៅជាការគ្រប់គ្រងចម្ការបែបអាជីវកម្មវិញ។ តាមរយៈការសិក្សានេះ កសិករបានសិក្សាបន្ថែមលើគន្លឹះសំខាន់ៗរួមមាន៖ បច្ចេកទេសតាក់តែងមែក និងកាត់តដើម, បច្ចេកទេសបំបៅកូនកាហ្វេសម្រាប់យកទៅដាំ និងវិធីសាស្ត្របំបៅដើមចាស់យកដើមថ្មី និងការបំបៅយកមែក
សមាគមកាហ្វេកម្ពុជា លើកឡើងថា «ចំណេះដឹង និងបច្ចេកទេសពិតប្រាកដទាំងនេះ ពិតជាមានតម្លៃណាស់ក្នុងការជួយឱ្យកសិករអភិវឌ្ឍចម្ការឱ្យទទួលបានទិន្នផលខ្ពស់ ធានាបាននូវនិរន្តរភាពសេដ្ឋកិច្ចគ្រួសារ និងវិស័យកាហ្វេទាំងមូល»។ សមាគមកាហ្វេកម្ពុជា ជឿជាក់ថាចំណេះដឹងទាំងនេះនឹងក្លាយជាទុនដ៏សំខាន់ក្នុងការលើកកម្ពស់ជីវភាព និងគុណភាពកាហ្វេកម្ពុជា ហើយសមាគមនឹងបន្តរៀបចំកម្មវិធីចែករំលែកបច្ចេកទេសបែបនេះនៅតាមបណ្តាខេត្តផ្សេងៗទៀតជាបន្តបន្ទាប់។
បើតាមប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បច្ចុប្បន្ននេះ ផ្ទៃដីដាំកាហ្វេនៅខេត្តមណ្ឌលគិរីមានប្រមាណជាង៦០០ហិកតា ដោយផ្ដល់ទិន្នផលប្រហែល១,៦០០តោន ក្នុងមួយឆ្នាំ៕
