(ភ្នំពេញ)៖ លោក ម៉េង សុងឃាង អគ្គនាយករងអគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង (ក.ប.ប) បានថ្លែងឲ្យដឹងថា ក.ប.ប នឹងបន្តពង្រឹងការអនុវត្តច្បាប់ និងចុះត្រួតពិនិត្យជាប្រចាំ ដើម្បីលើកកម្ពស់ការធ្វើអាជីវកម្មប្រកបដោយសុចរិត និងទប់ស្កាត់ទំនិញនាំចូលគ្មានគុណភាព ដើម្បីបង្កើនសុវត្ថិភាពដល់អ្នកប្រើប្រាស់។

ការលើកឡើងរបស់លោក​ ម៉េង សុងឃាង ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «យន្តការ​ការពារ​អ្នកប្រើប្រាស់ និងការកសាងទំនុក​ចិត្តលើទំនិញកម្ពុជា»។

លោក ម៉េង សុងឃាង បានថ្លែងឲ្យដឹងថា ទំនិញដែលគ្មានគុណភាពដែលបាននាំចូលពីប្រទេសក្រៅកន្លងមក ក.ប.ប បានធ្វើកិច្ចការងារនេះជាច្រើនមកហើយ ដោយចុះពិនិត្រជាមួយមន្រ្ដីជំនាញទៅលើទំនិញនីមួយៗ និងបានទប់ស្កាត់ផលិតផលមួយចំនួន ដែលគ្មានគុណភាព និងនាំចូលមកប្រទេសកម្ពុជាផងដែរ។

លោកបានបន្ដថា ក.ប.ប បន្តពង្រឹងការអនុវត្តច្បាប់ និងចុះត្រួតពិនិត្យជាប្រចាំ ជាពិសេសលើទីផ្សារដោយមានយន្ដការចុះជាប្រចាំ យកសំណាក់គំរូផ្សេងៗ ដើម្បីយកមកពិសោធន៍នៅមន្ទីរពិសោធន៍របស់យើង ក្នុងនោះយើងក៏មានអេបដែលអាចធ្វើតេសភ្លាមៗ នៅលើទីផ្សារផងដែរ។ លើសពីនេះយើងនឹងធ្វើការចុះសើបអង្កេត ដើម្បីដឹងថា តើមានទំនិញណាមួយបន្លំគុណភាព ឬមានបណ្ដឹងពីអ្នកប្រើប្រាស់មកក៏យើងអាចធ្វើបានដែរ៕

សូមស្តាប់ការលើកឡើងរបស់លោក ម៉េង សុងឃាង៖