(ភ្នំពេញ)៖ លោក ភោគ វណ្ណឌី អនុប្រធាននាយកប្រតិបត្តិទទួលបន្ទុកព័ត៌មានវិទ្យា នៃធនាគារ ខេប៊ី ប្រាសាក់ បានថ្លែងក្រើនរំលឹកជូនសាធារណជន និយមទិញទំនិញអនឡាញ សូមត្ដាកុំទាន់បង់ប្រាក់មុននឹងទទួលបានឥវ៉ាន់ ដើម្បីបញ្ជៀសហានិភ័យនៃការបោកប្រាស់នានា។

ការលើកឡើងរបស់លោក ភោគ វណ្ណឌី ធ្វើឡើងក្នុងកម្មវិធី CYBER SECURITY: «ជជែកអំពីសន្តិសុខសាយប័រ» លើប្រធានបទ៖ «ការលុបគណនីធនាគារ ដែលប្រើប្រាស់លេខទូរស័ព្ទ គ្មានអត្តសញ្ញាណច្បាស់លាស់»។

លោក ភោគ វណ្ណឌី បានថ្លែងឲ្យដឹងថា បច្ចុប្បននេះការទិញអនឡាញ គឺពេញនិយមមែនទែន ព្រោះការទិញអនឡាញ គឺចំណេញពេលវេលាច្រើន និងងាយស្រួលក្នុងការធ្វើការធ្វើប្រតិបត្តិការបង់ប្រាក់។ ប៉ុន្ដែដើម្បីបញ្ជៀសនូវរាល់បញ្ហានានា អ្នកទិញអនឡាញ ពុំគួរ ឬកុំទាន់បង់ប្រាក់មុនពេលទទួលបានឥវ៉ាន់។

លោកបានបន្ដថា សូមមេត្តារង់ចាំឥវ៉ាន់មកដល់ដៃ ចាប់បន្ដទូទាត់ប្រាក់ ព្រោះកន្លងមកមានករណីឆបោកជាច្រើន ដោយត្រូវឲ្យបង់ប្រាក់ជាមុន កក់ប្រាក់មានប្រមូលសិន បញ្ចុះតម្លៃជាដើម ជាធម្មតាទេអតិថិជនចង់បានតម្លៃល្អ តែងតែព្យាយាមកក់ប្រាក់ជាមុន ដើម្បីទទួលបានប្រមូលសិននានា ប៉ុន្ដែបន្ទាប់ពីបង់ប្រាក់រួចជនឆបោក អាចនឹងប្លុកផេកចោល ឬមិនឆ្លើយឆ្លង ឬមិនមានឥវ៉ាន់ផ្ដល់ជូនអតិថិជននោះឡើយ៕

សូមស្តាប់ការលើកឡើងរបស់លោក ភោគ វណ្ណឌី ៖