(ភ្នំពេញ)៖ អគ្គនាយកនិយ័តករមូលបត្រកម្ពុជា និងអគ្គនាយកផ្សារមូលបត្រកម្ពុជា បានបង្ហាញសុទិដ្ឋនិយមដូចគ្នាថា នៅបំណាច់ឆ្នាំ២០២៦នេះ ការប្រមូលសាច់ប្រាក់នៅក្នុងទីផ្សារមូលបត្រនឹងអាចកើនឡើង ១ប៊ីលានដុល្លារ ក្រោយមានក្រុមហ៊ុនធំៗ បានចុះបញ្ជី និងត្រៀមឡើងផ្សារហ៊ុនជាបន្ដបន្ទាប់។

នេះបើតាមការលើកឡើងរបស់លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃនិយ័តករមូលបត្រកម្ពុជា និងលោក ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយកផ្សារមូលបត្រកម្ពុជា ក្នុងពិធី Roadshow សម្រាប់ការបោះផ្សាយលក់មូលបត្រកម្មសិទ្ធិ ជាសាធារណៈលើកដំបូង (IPO) របស់ក្រុមហ៊ុនបុរី វិមានសំណាង នៅថ្ងៃទី២ ខែកក្កដា ឆ្នាំ២០២៦ នៅអគារផ្សារមូលបត្រកម្ពុជា។

លោកអគ្គនាយកទាំំងពីរបានលើកថា វត្តមានរបស់បុរីវិមានសំណាង ក្នុងផ្សារភាគហ៊ុន​ ក៏នឹងចូលរួមចំណែកក្នុងជំរុញឱ្យការកៀរគរទុនពីទីផ្សារ កើនឡើងដល់ ១ប៊ីលានដុល្លារផងដែរក្នុងឆ្នាំ២០២៦នេះ។

លោក ហុង សុហួរ បានបញ្ជាក់ថា គិតត្រឹមថ្ងៃនេះ ផ្សារមូលមានក្រុមហ៊ុនចុះបញ្ជីសរុបចំនួន២៧ ដែលរួមមានក្រុមហ៊ុនចំនួន១២ បានចុះបញ្ជីលក់ភាគហ៊ុន និងក្រុមហ៊ុនចំនួន ១៥ទៀត បានចុះបញ្ជីលក់មូលបត្របំណុល។ ក្រុមហ៊ុនទាំង២៧នេះ បានធ្វើការកៀរគរទុនសរុបពីផ្សារមូលបត្រប្រមាណជា ៧០៣ លានដុល្លារអាមេរិក។

លោកបន្ថែមថា «យើងក៏រំពឹងថាក្នុងឆ្នាំនេះ យើងនឹងអាចទទួលការកៀរគរទុនរហូតទៅដល់ប្រមាណជា ៣០០លានដុល្លារអាមេរិកបន្ថែមទៀត»។

លោក ស៊ូ សុជាតិ បន្ថែមថា បើគិតក្រុមហ៊ុនបុរីវិមានសំណាង ដែលកំពុងដំណើរការបោះលក់ភាគហ៊ុន ប្រមូលទុនចំនួន ១០លានដុល្លារ និងធនាគារ LOLC ដែលគ្រោងនឹងបោះលក់មូលបត្របំណុល ៥០លានដុល្លារ ហើយនឹងធនាគារល្បីឈ្មោះមួយទៀត ដែលគ្រោងប្រមូលទុន ១០០លានដុល្លារនោះ លោកជឿជាក់ថានឹងអាចសម្រេចគោលដៅ ក្នុងការប្រមូលសាច់ប្រាក់ពីទីផ្សារមូលបត្ររហូតដល់ ១ប៊ីលានដុល្លារ នៅត្រឹមដំណាច់ឆ្នាំ២០២៦។

លោក ស៊ូ សុជាតិ បញ្ជាក់ទៀត ថ្ងៃនេះមិនត្រឹមតែជាការផ្សព្វផ្សាយ អំពីការបោះផ្សាយលក់មូលបត្រកម្មសិទ្ធ លើកដំបូងរបស់ក្រុមហ៊ុន បុរីវិមានសំណាង នោះទេ ប៉ុន្ដែក៏ជាបង្ហាញឲ្យឃើញពីឆន្ទៈនៃការចូលរួមចំណែករបស់ក្រុមហ៊ុន ក្នុងការអភិវឌ្ឍវិស័យមូលបត្រនៅកម្ពុជា តាមរយៈការប្រើប្រាស់នូវយន្ដការនៃការកៀរគរមូលធនពីការបោះផ្សាយ និងការចុះបញ្ជីនៅក្នុងផ្សារមូលបត្រកម្ពុជា ចូលរួមចំណែកបញ្ចូលទៅក្នុងប្រភពទុនរបស់ក្រុមហ៊ុន ដែលអាចនិយាយថា ហិរញ្ញប្បទានតាមយន្ដការផ្សារមូលបត្រកម្ពុជា គឺជាប្រភពទុនយូរអង្វែងមិនចេះរីងស្ងួត។

លោក ហុង សុហួរ បានបង្ហាញនូវមោទនភាព ដែលផ្សារមូលបត្រ បានប្រែក្លាយជាច្រកហិរញ្ញប្បទានមួយ អនុញ្ញាតឲ្យក្រុមហ៊ុនឯកជនក្ដី សហគ្រាសាធារណៈក្ដី ដែលមានសក្ដានុពល អាចកៀរគរទុនសម្រាប់ពង្រីក និងពង្រឹងអាជីវកម្មរបស់ខ្លួន ក៏ដូចជាអាចបង្កើននូវអត្ថប្រយោជន៍ប្រកួតប្រជែងក្នុងតំបន់បាន។

លោកបណ្ឌិត គីម ហ៊ាង ប្រធានក្រុមប្រឹក្សាប្រតិបត្តិនៃក្រុមហ៊ុនបុរីវិមានសំណាង បានបង្ហាញមោទនភាព ដែលបានសម្រេចគោលដៅឡើងផ្សារហ៊ុនកម្ពុជា ដែលជាការបញ្ចប់នូវការបុកគ្រឹះធ្វើអាជីវកម្ម ក្រោយចំណាយពេលជិត២៦ឆ្នាំ និងបន្ដបេសកកម្មសាងសង់នៅក្នុងរយៈពេល ៣០ឆ្នាំបន្ទាប់ ជាមួយគម្រោងធំៗជាច្រើន ដែលមិនត្រឹមរួមចំណែកក្នុងវិស័យមូលបត្រនៅកម្ពុជា តែក៏ជាការចូលរួមជំរុញសេដ្ឋកិច្ច និងសង្គមជាតិផងដែរ។

សូមជម្រាបថា ក្រុមហ៊ុនបុរីវិមានសំណាង ជាក្រុមហ៊ុនអភិវឌ្ឍន៍ដំបូងគេ បោះជំហានចូលផ្សារភាគហ៊ុន ដោយគ្រោងបោះលក់ភាគហ៊ុនរបស់ខ្លួន ១០% នៃតម្លៃសរុបក្នុងទីផ្សារភាគហ៊ុន ឬស្មើនឹង ៣៣លានភាគហ៊ុន ដើម្បីប្រមូលទុនពីផ្សារ ១០លានដុល្លារ ជាមួយតម្លៃ IPO ចំនួន ១២០០រៀល ក្នុង១ហ៊ុន ដែលសាធារណជនអាចទិញភាគហ៊ុនក្នុងទីផ្សារដំបូង ចាប់ផ្ដើមពីថ្ងៃទី២ ខែកក្កដា ឆ្នាំ២០២៦ នេះតទៅ៕