មេផ្សារហ៊ុនប្រដូចអាជីវកម្ម ដែលឈររឹងមាំក្នុងស្ថានភាពលំបាកទៅនឹង «មាសទឹកដប់ តែងតែត្រូវបានសម្រិតសម្រាំង ក្នុងភ្លើងដ៏ក្តៅបំផុត»
02-07-2026 15:22
(ភ្នំពេញ)៖ លោក ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃផ្សារមូលបត្រកម្ពុជា បានប្រដូចក្រុមហ៊ុនដែលឈរយ៉ាងរឹងមាំ ក្នុងស្ថានភាពលំបាកទៅនឹង «មាសទឹកដប់តែងតែត្រូវបានសម្រិតសម្រាំងក្នុងភ្លើងដ៏ក្តៅបំផុត» ពោលបង្ហាញថាក្រុមហ៊ុននោះរឹងមាំ និងមានភាពធន់ខ្ពស់។
លោក ហុង សុហួរ លើកឡើងបែបនេះ ដោយលោកមើលឃើញថា ក្នុងរយៈពេលប៉ុន្មានឆ្នាំចុងក្រោយនេះ ចាប់តាំងពីការរីករាលដាលជំងឺកូវីដ១៩មក សេដ្ឋកិច្ចសាកល ក៏ដូចជាកម្ពុជា បានរងផលប៉ះពាល់ ដែលបានជះឥទ្ធិពលដល់ដំណើររបស់អាជីវកម្មនានា តែយ៉ាងណា មានអាជីវកម្មយ៉ាងច្រើនបានឈរជើងយ៉ាងរឹងមាំក្នុងដំណាក់កាលដ៏លំបាកនេះ ដូច្នេះហើយលោកជឿថា អាជីវកម្មដែលអាចរស់រានមានជីវិតនូវក្នុងដំណាក់កាលលំបាក គឺបង្ហាញថា ក្រុមហ៊ុននោះរឹងមាំ និងមានភាពធន់ខ្ពស់។
លោកបានលើកឡើងយ៉ាងដូច្នេះថា «យើងទាំងអស់គ្នាដឹងហើយថា ដំណាក់កាលប្រឈមខ្លាំង ជាមួយនឹងការប្រកួតប្រជែងយ៉ាងស្វិតស្វាញ និងសម្ពាធពីសេដ្ឋកិច្ច សកល។ ខ្ញុំតែងតែជឿជាក់ថា «មាសទឹកដប់ គឺតែងតែត្រូវបានសម្រិតសម្រាំងក្នុងភ្លើងដ៏ ក្តៅបំផុត» ប្រដូចទៅនឹងអាជីវកម្មដែលអាចរស់រានមានជីវិតនូវក្នុងដំណាក់កាលលំបាក គឺបង្ហាញថាក្រុមហ៊ុននោះរឹងមាំ និងមានភាពធន់ខ្ពស់»។
លោក ហុង សុហួរ លើកឡើងបែបនេះ ធ្វើឡើងក្នុងកម្មវិធី រ៉ូដសូ ស្តីពីការបោះផ្សារលក់មូលបត្រកម្មសិទ្ធិជាសាធារណៈលើកដំបូង របស់ក្រុមហ៊ុន បុរីវិមានសំណាង ម.ក នៅផ្សារមូលបត្រកម្ពុជា នាថ្ងៃទី២ ខែកក្កដា ឆ្នាំ២០២៦នេះ។ ក្រុមហ៊ុននេះគ្រោងនឹងកៀរគរទឹកប្រាក់ប្រមាណ ១០លានដុល្លារអាមេរិក ជាមួយចំនួនភាគហ៊ុនបោះផ្សាយ សរុបប្រមាណជា ៣៣,៣ លានភាគរហ៊ុន និងថ្លៃបោះផ្សាយ ១.២០០រៀលក្នុងមួយភាគហ៊ុន ជាមួយការធានាភាគលាភអប្បបរមាចំនួន៨% សម្រាប់ រយៈពេល៥ឆ្នាំបន្ទាប់ពីចុះបញ្ជី។
លោកបានគូសបញ្ជាក់ផងដែរថា ផ្សារមូលបត្រកម្ពុជាមានមោទនភាព ដែលបានប្រែក្លាយជាច្រកហិរញ្ញប្បទានថ្មីមួយ ដែលអនុញ្ញាតឱ្យក្រុមហ៊ុនឯកជនក្តី សហគ្រាសសាធារណៈក្តី ដែលមានសក្តានុពល អាចកៀរគរទុន សម្រាប់ពង្រឹង និងពង្រីកអាជីវកម្មរបស់ខ្លួន និងអាចបង្កើននូវអត្ថប្រយោជន៍ ប្រកួតប្រជែងក្នុងតំបន់បាន។ ជាមួយគ្នានេះផងដែរ ផ្សារមូលបត្រកម្ពុជាបានចូលរួមយ៉ាង សកម្មជាមួយនិយ័តករមូលបត្រកម្ពុជាក្នុងការបង្កើននូវផលិតផលហិរញ្ញវត្ថុថ្មី ដែលនឹងបង្កើតជាជម្រើសសម្រាប់ការវិនិយោគរយៈពេលខ្លី និងវែងជូនទៅដល់វិនិយោគិនទាំងរូបវ័ន្ត បុគ្គល និងនីតិបុគ្គលផងដែរ។
គិតត្រឹមថ្ងៃទី២ ខែកក្កដា ឆ្នាំ២០២៦នេះ ផ្សារមូលបត្រកម្ពុជា មានក្រុមហ៊ុនចុះបញ្ជីសរុបចំនួន២៧ ដែលរួមមានក្រុមហ៊ុនចំនួន១២ បានចុះបញ្ជីលក់ភាគហ៊ុន និងក្រុមហ៊ុនចំនួន១៥ទៀត បានចុះបញ្ជីលក់មូលបត្របំណុល។ នាពេលខាងមុខនេះ នឹងត្រៀមទទួលស្វាគមន៍នូវវត្តមានសមាជិកមួយបន្ថែមទៀតគឺ បុរី វិមានសំណាង។ ក្រុមហ៊ុនទាំង២៧នេះបានធ្វើការកៀរគរទុនសរុបពីផ្សារមូលបត្រប្រមាណ ជា ៧០៣ លានដុល្លារអាមេរិក។
លោករំពឹងថាក្នុងឆ្នាំនេះ នឹងអាចទទួលការកៀរគរទុនរហូតទៅដល់ប្រមាណជា ៣០០លានដុល្លារអាមេរិកបន្ថែមទៀត។ ដោយ បច្ចុប្បន្ននេះ CSX បាននិងកំពុងទទួលពាក្យស្នើសុំពិនិត្យលទ្ធភាពអាចចុះបញ្ជីពីក្រុមហ៊ុន ទាំងមូលបត្រកម្មសិទ្ធិ និងសញ្ញាបណ្ណជាបន្តបន្ទាប់៕
