(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានគូសបញ្ជាក់ថា សភាពាណិជ្ជកម្មកម្ពុជា ដែលមានទាំងនៅរាជធានី និងតាមបណ្តាខេត្តនានា បានដើរតួនាទីយ៉ាងសំខាន់​ ក្នុងការដោះស្រាយរាល់ការលំបាក និងបញ្ហាប្រឈមនានារបស់វិនិយោគិនបរទេស ក៏ដូចជាម្ចាស់ក្នុងស្រុក​។

លោកបានឱ្យដឹងថា កន្លងមក អ្នកធុរកិច្ចជាច្រើនបានប្រឈមនឹងបញ្ហាផ្សេងៗនៅក្នុងខ្សែសង្វាក់ផលិតកម្ម ​ នីតិវិធី​ក្រដាសស្នាមស្មុគស្មាញ ​បញ្ហានៃការធ្វើការងារមួយមន្ត្រីមួយចំនួន ក៏ដូចជាបញ្ហាច្បាប់​។ បញ្ហាទាំងនេះបានបង្កជាឧបសគ្គដល់ដំណើរការអាជីវកម្មរបស់ពួកគេ។ ក្នុងន័យនេះ សភាពាណិជ្ជកម្មកម្ពុជាបានដើរតួជាអ្នកសម្របសម្រួល និងដោះស្រាយបញ្ហាទាំងនេះជូនអាជីវករ ដែលបានបោះឆ្នោតជ្រើសរើសសភាពាណិជ្ជកម្មជាតំណាងរបស់ពួកគេ។

ក្រៅពីការដោះស្រាយបញ្ហា សភាពាណិជ្ជកម្មកម្ពុជាក៏ផ្តោតសំខាន់លើការបណ្តុះបណ្តាល និងអភិវឌ្ឍសមត្ថភាពអាជីវករផងដែរ។ បច្ចុប្បន្ននេះ សភាពាណិជ្ជកម្មកំពុងបណ្តុះបណ្តាលផ្នែកសហគ្រាសធុនតូច និងមធ្យម ដើម្បីត្រៀមខ្លួនសម្រាប់យុគសម័យឧស្សាហកម្មឌីជីថល ឧស្សាហកម្ម ៤.០ និងបច្ចេកវិទ្យា AI ដែលកំពុងរីកចម្រើនយ៉ាងឆាប់រហ័ស។ ការបណ្តុះបណ្តាលទាំងនេះមានគោលបំណងជំរុញកំណើនផលិតកម្មរបស់អាជីវករ ទាំងគុណភាព និងបរិមាណ ឲ្យស្របតាមតម្រូវការទីផ្សារ និងការប្រកួតប្រជែងសកល។

អ្នកឧកញ៉ា លឹម ហេង គូសបញ្ជាក់បែបនេះធ្វើឡើងក្នុងកម្មវិធី FRESH BUSINESS​ កិច្ចពិភាក្សាលើប្រធានបទ៖ «ការអនុវត្តច្បាប់ធុរកិច្ចរវាងមន្ត្រី និងធុរជន»។

សូមស្តាប់ការលើកឡើងរបស់ ​អ្នកឧកញ៉ា លឹម ហេង៖